Kuhanjeka naMwiniitala Komana Antu Ejima Amawahi Ayaña Mwiwulu?

AYINSAHU JAYEHOVA atiyaña kuwaha kuhanjeka nsañu yamuBayibolu nawantuñi nawu. Komana kuduhu nsañu yamuBayibolu yimwajinokaña? Komana mwakeñaña kwiluka yuma yakuhwelelawu aYinsahu jaYehova? Neyi mwakeñaña kwiluka, bayi mukashintajala kuhanjeka oyu nsañu ifuku dikwawu dimwakadimona naChinsahuku. Wakatiya kuwaha kuhanjeka nenu iyi nsañu.

Iyi mpanji yinalondeluhu diyi yavula kuhanjekawu aYinsahu jaYehova nawantuñi nawu. Fwikijenu neyi Chinsahu wejina daMukula nayi kwitala damukulumpi Kabwita.

Indi Antu Ayaña Mwiwulu Akazataña Mudimwinyi?

Mukula: Neyi mushinshika chihandilu chakumbidi, mwatoñojokaña nenu yuma yakawaha, kutaminaku chikupu tahindi yakekala chochimu?

Kabwita: Natoñojokaña nami yuma yakawaha. Natalilaña kuya mwiwulu kulonda nakekali naMwanta.

Mukula: Oku hikuchiñeja kwakuwaha hama. Bayibolu yahosha chikupu chimwekala mwiwulu nikukooleka kwekala nawantu ayañamu. Komana mwatoñojokahu dehi chikupu hamudimu wakazataña antu ayaña mwiwulu?

Kabwita: Tukekala naNzambi nawa tukamushimekaña haya nyaka.

Mukula: Oku hikuchiñeja kwakuwahi nankashi. Kafwampi Bayibolu hiyahosha hohu hayuma yayiwahi yakatambwilawu antu ayaña mwiwuluku ilaña yahosha cheñi hamudimu walema wakazatañawu.

Kabwita: Mudimwinyi wenowu?

Mukula: Himudimu watenawu haChimwekeshu 5:10. Iyi vasi yahosha nawu: ‘Eyi [Yesu] wunayilishi dehi kwikala wanta waNzambi niatupristu; hiyakuyuula hamaseki.’ Mukulumpi Kabwita, munamoni mudimu wakazatañawu antu akaya mwiwulu?

Kabwita: Vasi yinahosha nawu akayuulaña hamaseki neyi anyanta.

Mukula: Iyi nsañu yayiwahi, hidimuku?

Akayuulaña Anyi?

Mukula: Komana himukwiteja nenu neyi antu akaya mwiwulu akayuulaña neyi anyanta, kwatela kwikala antu akayuulañawuku? Tahindi mwamonaña dehi nfulumendi yakubula antu ayuulañawu?

Kabwita: Neluki mumunatalishi.

Mukula: Dichi lwihu lwaluwahi lutwatela kwihula ilu, Akayuulaña anyi?

Kabwita: Namoni twakayuulaña antu ahamaseki achidi kanda afwi nakuya mwiwulu.

Mukula: Munatoñojoki chachiwahi neyi antu amawahi ejima akaya mwiwulu. Ilaña kudi  chuma chikwawu chitwatela kushinshikahu. Komana dikwila nawu antu amakwawu amawahi hiyakaya mwiwuluku?

Kabwita: Kanda nitiyeñahu dehi akwaKristu adi ejima akuhwelela nsañwiyi.

Mukula: Nehula ilu lwihu muloña wansañu yitwatañaña haMasamu 37:29. Munateli kutaña iyi vasi?

Kabwita: Eña. Yinakuhosha nawu: “Akwakuloña akaswana ituña, akashakamamu haya nyaka.”

Mukula: Kusakililaku. Munamoni kwakashakamañawu antu amawahi amavulu?

Kabwita: Vasi yinahoshi nawu akashakama mwituña.

Mukula: Dimu, bayi neyi hakapinji kantesha hohuku. Talenu vasi yahosha nawu: ‘Akashakamamu haya nyaka.’

Kabwita: Hadaha yinakulumbulula hohu nawu hamaseki hakekalaña antu amawahi mpinji yejima. Neyi tunafwi nikuya mwiwulu, atuhiñaña kudi antu amakwawu amawahi avwalikaña.

Mukula: Antu amavulu iyi vasi ayitiyilaña munoyu njila. Komana iyi vasi yinakulumbulula chuma chikwawu chambukaku? Ntahindi yinakuhosha nawu antu amawahi akashakama hamaseki haya nyaka?

Kabwita: Namoni natiyishisha wanyi chimwalumbululaña.

Paradisa Yakumbidi Hamaseki

Mukula: Shinshikenu nsañu yikwawu yamuBayibolu chiyahosha kutalisha hawumi wahamaseki kumbidi. Tutañi Chimwekeshu 21:4. Iyi vasi yahosha kutalisha hadi antu akashakama hampinji yakumbidi nawu: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Iku hikuchiñeja kwakuwahi hama, hidimuku?

Kabwita: Eña. Ilaña neluki nami yinakuhosha hachakekala wumi mwiwulu.

Mukula: Wunahoshi mwalala, antu akaya mwiwulu akadiluñisha nkisu yoyimu. Shinshikenu cheñi haniyi vasi. Chumanyi chiyinahoshi kutalisha hakufwa?

Kabwita: Nawu “hikwakekala nawa cheñi kufwaku.”

Mukula: Dimu. Nakuhweleli mukwiteja nenu hakwila ahoshi nawu hikwakekala nawa cheñi ichi chumaku, dikwila nawu chadiñi kwoku.

Kabwita: Eña.

Mukula: Ilaña mwiwulu himwekalaña kufwaku, idi nenu mwacheñi? Antu ahamaseki hohu diwu afwaña.

Kabwita: Aaa. Natela kutoñojoka haniyi nsañu.

Mukula: Munamoni mukulumpi Kabwita, Bayibolu yatañishaña nawu antu amawahi amakwawu akaya mwiwulu, ilaña amakwawu amavulu akashakama hamaseki haya nyaka. Nakuhweleli mwatiyahu dehi awa mazu aya mpuhu akwila nawu: “Ovwaha anakooleki, muloña akaswana mpata.”—Matewu 5:5.

Kabwita: Eña, natiyaña iyi nsañu ayitañaña kapampa kakavulu kuchechi.

Mukula: Neyi chakwila amwovu akaswana ituña, komana ichi hichinayi mukwila nawu antu akashakamaña hamasekuku? Antu akashakama hamaseki akadiluñisha nkisu yashimwineñawu dehi muChimwekeshu. Akamona kaayi chikakahimpika chikupu, muloña Nzambi wakafumishahu yuma yejima yatama kushilahu nikufwa.

Kabwita: Neluki chuma chimunakuhosha, ilaña nakuhweleli wanyi neyi vasi yimu yamuBayibolu hela jiyedi hohu jikulumbulula chikuma chimunakushimuna.

Mukula: Eña dimu. Kafwampi kudi nsona jajivulu jahosha hachakekala wumi hanu hamaseki kumbidi. Neyi mukweti mpinji, hadaha nateli kuyileja nsona jinakeña nankashi.

Kabwita: Eña nikweti jiminiti jantesha.

“Muntu Watama Hakekala Nawa Mwokuku”

Mukula: Hakusambila twataña vasi 29 yaMasamu 37. Tutañi cheñi iyi nsona yamasamu. Ichi  tukutaña mavasi 10 ni 11. Munateli kutaña awa mavasi?

Kabwita: Nukutaña. “Hakuleha chanti muntu watama hakekala nawa mwokuku; mwalala, wakakeñakeña hindi hadiñilañayi, hihakamwekanaku. Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”

Mukula: Kusakililaku. Kwesekeja navasi 11, indi “akwakudizoza” hela antu amawahi akashakamaña kudihi?

Kabwita: Yinakuhosha nawu “akaswana ituña.” Hela chochu, natoñojoki nami iyi vasi yinakuhosha hayoyinu mpinji, kafwampi antu amawahi ashakamaña hamaseki makonu.

Mukula: Dimu. Hela chochu, ilukenu nenu iyi vasi yinakuhosha cheñi nawu antu amawahi akatiya kuwaha nankashi nakushakama “chachiwahi chamwena.” Makonu hitunakushakama chamwena mukanu kaayuku, hidimuku?

Kabwita: Dimu.

Mukula: Hanu dinu ichi chikaninu chikashikijewa ñahi? Hadaha nizatishi ichi chakutalilahu: Fwikijenu neyi mukweti itala. Antu amakwawu asonkelaña hiyantu amawahi ahembaña itala chiwahi nawa akamenaña antuñinawu. Mwatiyaña kuwaha chiyasonkelañawu itala denu. Ilaña amakwawu atama muchima, akisañanaña itala nawa ayandishaña antuñinawu. Munateli kwila ñahi neyi chakwila antu atama asonkelaña itala denu akaana kuhimpa yililu yawu?

Kabwita: Nateli kuyihaña.

Mukula: Dichuma chakelayi Nzambi hadi antu atama itwamonaña makonu. Shinshikenu cheñi havasi 10. Hanakuhosha nawu: “Muntu watama hakekala nawa mwokuku.” Munjila yikwawu, Nzambi “wakahaña” antu akabishaña akwawu antu. Nkumininaku antu amawahi akadiluñisha wumi hamaseki mukuwunda. Neluki chikupu nami yitoñojoka yakwila nawu antu amawahi akashakama hamaseki haya nyaka yinateli kwambukaku nayuma yayidizishiluwu hakusambila.

Kabwita: Eñañi, kanda nitiyeñahu dehi iyi nsañu kuchechi yetu.

Mukula: Neyi chimwahosha dehi, kushinshika hohu vasi yimu hela jiyedi haniyi nsañu kukuyikwasha wanyi. Twatela kushinshika chikupu Bayibolu yejima chiyahosha kutalisha hachihandilu chakumbidi chawantu amawahi. Kwesekeja nansona jitunatañi dalelu, komana munatoñojoki nenu antu amakwawu amawahi akaya mwiwulu nawa amakwawu amawahi akashakama hamaseki haya nyaka?

Kabwita: Neluki wanyi. Ilaña kwesekeja nansona yimunatañi chatela kwikala muniyi njila. Natela kutoñojokahu cheñi.

Mukula: Hampinji yimukushinshika cheñi haniyi nsañu, hadaha mukutoñojoka malwihu amakwawu. Chakutalilahu, indi antu amakwawu amawahi adiñaku henohu etu kanda twikaluku ekala kudihi? Komana wejima wawu aya mwiwulu? Neyi aya mwiwulu wanyi, adi kudihi?

Kabwita: Himalwihu amawahi.

Mukula: Hadaha natela kuyilila yuma yiyedi. Chatachi, nukuyisonekela nsona jantesha jahosha haniyi nsañu. * Chamuchiyedi, nakafunta nakuhanjeka nenu iji nsona neyi munajitañi dehi nikutoñojokahu. Mukuhosha nenudi?

Kabwita: Kukala kwosi. Nasakililuku.

[Tumazu twaheshina]