Kundamenu Kwakwihi naMukwakutiya Mwalombañawu Antu

ANTU amavulu ahoshaña nawu amukuhwelela Nzambi hiyanateli kushimuna jiika chuma chayiletesha kukuhwelelaku. Nawa hiyanateli kushimuna chuma chinakuletesha nsakililu kwila yuma yatama hela muloña wetejelayi Nzambi makabuku. Akuminaña dakulomba kudi Nzambi abula kwilukawu.

Ilaña enu munateli kukundama kwakwihi naNzambi kubadika wena. Munateli kukolesha chikuhwelelu chenu kushindamena hakumwiluka Nzambi nawa chumichi chikuyikwasha kumukeña nikumulemesha. Chikuhwelelu chalala chashindamena hawunsahu. (Aheberu 11:1) Neyi mudiza nsañu yalala hadi Nzambi, munateli kumwiluka nawa mukuhoshaña nindi neyi ibwambu denu. Shinshikenu yakutalilahu yawantu adiña nakulomba hela chakwila ajinokeleña neyi chakwila Nzambi wekala kwoku.

◼ Patricia atenawu muchibaaba chatachi. “Ifuku dimu nadiña hezanvu dawakwetu akushika kwikumi nawa atachikili kuhanjeka nsañu yansakililu. Nayilejeli nami nafumini kwitala kuchiina mpanji yahanjekeleñawu atata abulili kukuhwelela mudi Nzambi naChinsahu chaYehova wenjili hetala. Ibwambu dami wumu wahosheli nindi, ‘Hadaha aYinsahu jaYehova ahoshaña mwalala.’

“Mukwawu wahosheli nindi, ‘Kwila tuya kukupompa kwawu kulonda tukaditiyili nehi?’ Twayili nakupompa. Hela chakwila twadiña nakujinoka, etu amakwawu twatwalekeluhu kupompa muloña aYinsahu adiña aseha.

“Hela chochu, ifuku dimu Hamulungu natiyili nsañu yahimpili yililu yami. Nhoshi walumbulwili chakabakenañawu antu. Nelukili wanyi nami muntu amuleñeli wawanina hakusambila nawa nshidi nikufwa kwatachikilili kudi muntu wumu nichikwashikeneni antu ejima. Nhoshi walumbulwili cheñi muloña wateleleliyi Yesu kufwa kulonda antu aheti chuma chajimbesheliyi muntu watachi. * (Aroma 5:12, 18, 19) Chakubula nikumba mpinji natiyili chikupu yuma yejima. Nelukili nami ‘kwekala Nzambi watwakamenaña.’ Natwalekeluhu kudiza Bayibolu nawa kapampa katachi muchihandilu chami nelukili nami nalombeleña kudi muntu walala.”

◼ Allan, atenawu muchibaaba chatachi. “Ifuku dimu aYinsahu jaYehova enjili hetala detu, nawa ñodami wayiñijili mwitala muloña watiyili kuwaha nsañu yahosheluwu kutalisha hakushakama hamaseki haya nyaka. Nahilili nankashi. Dichi  twashili enyi mukapeka kakwawu, namusendeli ñodami kuchisambu nakumuleja nami, ‘Inakukeña wusupi wanyi. Kwila wukuhwelela yuma yamuchidiwu nehi!’

“Wañakwili nindi, ‘Yaku wuyikonkoleli eyaweni.’

“Kafwampi hinadiña nawunsahu wudi wejimaku. Ilaña adiña chiwahi nawa anshilili mukanda wahosheleña hayuma yikweti wumi neyi chakwila ayileñeli hela yenjili hamuloña wakubalumoka. Nsañu yadiñamu yadiñi yatiyakana chikupu chakwila nafuukwiluhu nami natela kudiza nsañu yayivulu kutalisha hadi Nzambi. Natachikili kudiza Bayibolu nawaYinsahu, chakubula nikumba mpinji nelukili nami nsañu yahosha Bayibolu yambukaku chikupu nansañu yejima yinatoñojokeleña kutalisha hansakililu. Chinadizili hadi Yehova natachikili kulomba kudi yena hohu. Nadiñi nayaaku yatama dichi nalombeli nami ankwashi. Neluka chikupu nami Yehova wakwili kulomba kwami.”

◼ Andrew, washakamaña kuEngland. “Hela chakwila nashili muchima chikupu munsañu jasayansi, nakuhweleleli muyitoñojoka yakwila nawu yuma yadinjilili yayeni muloña antu amavulu ahosheleña nawu mwalala. Nakaanineña  kumukuhwelela Nzambi muloña wayuma yatama yejima yamwekanaña.

“Hela chochu, mpinji yikwawu natoñojokeleña nami: ‘Neyi chakwila Nzambi wekala kwoku, natela kwiluka chalumbuluka yuma yejimiyi. Muloñadi chikwekalila wubanji nimajita?’ Neyi nidi nakukala, mpinji yikwawu nalombeleña, ilana nelukili muntu inahosheleña nindi wanyi.

“Nkumininaku muntu wumu wamwinkeli ñodami tilakiti yasonekawu kudi aYinsahu jaYehova yahoshaña nawu Komana Kanu Kaayi Kamba Kapuluka? Natoñojokeleña hanilu lwihu kakavulu. Tilakiti yanleñeleli kudihula hansañu yamuBayibolu, ‘Komana kwiluka ñakwilu yekalamu kwalema?’ Chimwahitili mafuku muntu wumu wanyikeli mukanda wunakwila nawu The Bible—God’s Word or Man’s? * hampinji yinayili nakunooka. Chinelukili nami Bayibolu yaditeja nasayansi yalala, nafuukwiluhu kudiza nsañu yayivulu yahosha haBayibolu. Chelili Chinsahu chaYehova wumu yanleji nindi tudizeña nindi iwu mukanda, netejeli. Chinelukili chuma chafuukulayi Yehova, nelukili nami namwiluki neyi muntu yamweni inatela kuhosha nindi mukulomba.”

◼ Jan, wakulilili muchipompelu chaProtestanti muLondon. “Wunfwikiji wamunsakililu nimakabi asweja anletesheli kudiwula nsakililu. Nawa nalekeli kutaña hakoleji, dichi natachikili kwimba tumina nagita kulonda anfweteña mali. Diyi mpinji yinadimweni naPat. Wakulilili muKatolika nawa wejima wetu hitwadiña akwakwitiyaku.

“Twashakamineña mwitala mwafuminuwu antu hamu nawakwetu amavulu alekeli kutaña hakoleji akeñeli kwiluka nsakililu yakuAsia. Twahanjekeleña chikupu nakushika nimukachi kawufuku kutalisha chitwekalilaku hamaseki. Hela chakwila ami niPat twakuhweleleli wanyi mudi Nzambi, twatoñojokeleña netu kwekala muntu wukweti ñovu waleñeli yuma yikweti wumi.

“Chitwabukilili kukabeta kaluwunda kaEngland nakukeñakeña mudimu neyi añimbi, twavweli mwana weyala. Mpinji yimu nawufuku mwana wakatili nawa natachikili kulomba kudi Nzambi inabulili kukuhwelela. Hashimbwili wanyi twalekeli kutiyañana naPat, nasendeli mwana nakumushiya Pat. Nalombeli cheñi wukwashu nami hadaha kudi muntu wunakutiya chinakulomba. Hinelukiluku, ilaña Pat niyena wadiña nakulomba.

“Chimwahitili mpinji ifuku denidi, aYinsahu jaYehova ayedi enjili kwitala daPat nawa amulejeli kufumba kwakuwahi kwamuBayibolu. Pat wantemesheleli nshiña nakuñihula neyi nateli kwiteja kudizila hamu nindi Bayibolu nawaYinsahu. Haleheli niwanyi twelukili netu hakwila tumuzañalesheña Nzambi twatela kusonekesha wulu wetu. Chumichi chamwekeni neyi chakala nankashi muloña wulunda wetu wadiña wakola wanyi.

“Twakeñeleña kwiluka nsañu yayivulu kutalisha hakushikijewa kwawuprofwetu wamuBayibolu, muloña wutwakabakenaña, nichalumbuluka Wanta waNzambi. Twelukili chovu-chovu netu Nzambi wakamenaña antu nawa twakeñeleña kwila yuma yakeñañayi. Twadisumbwili. Maana ekala Mwizu daNzambi atukwasha kukulisha anyanetu. Tweluka chikupu netu Yehova watiyili kulomba kwetu.”

Shinshikenu Wunsahu Enu Aweni

Kufwana antu amakwawu amavulu, antu ahosheli nsañu yinasonekuwu muchinu chibaaba hiyetejeli kuyidimba munsakililu yakutwambaku nawa elukili muloña wetejelayi Nzambi makabi. Komana mwamona nenu kutiyishisha Bayibolu dikwaletesheli awa antu ejima eluki jiika nawu Yehova watiyaña mwalombañawu antu?

Komana munakukeña kushinshika wunsahu wamwekeshaña nawu Nzambi wekala kwoku? A Yinsahu jaYehova akutiya kuwaha kuyikwasha kulonda mudizi nsañu yalala kutalisha hadi Yehova nichimwatela kukundama kwakwihi ‘naMukwakutiya mwalombañawu antu.’—Masamu 65:2.

[Tumazu twaheshina]

[Mazu ekoku adi hefu 10]

“Chinelukili chuma chafuukulayi Yehova, nelukili nami namwiluki neyi muntu yamweni inatela kuhosha nindi mukulomba”

[Mwevulu wudi hefu 9]

Chikuhwelelu chalala chashindamena hawunsahu nikukeña kwiluka nsañu yalala hadi Nzambi