Kuwaha hiChililu Chalema Kumesu aNzambi

M UKWENZI wumu wakuJapan watiyili kuwaha nayililu yayiwahi yamwekesheliyi mukulumpi weyala. Iwu kamishonali hashakamini munidi ituña yaaka yayivuluku nawa wachidiñi kudiza idimi dakuJapan. Hela chochu, wayileña kwitala daniwu mukwenzi mulungu nimulungu nakuhanjeka nindi nsañu yamuBayibolu. Watumbileña chimwemweta hakwakula munjila yayiwahi malwihu amavulu enhwileña iwu mukwenzi nawa mumesu awunda.

Yililu yayiwahi yamwekesheliyi mukulumpi kamishonali dichuma chanukañayi iwu mukwenzi mpinji yejima. Mukwenzi weyala watoñojokeli nindi, ‘Neyi chakwila Bayibolu yinateli kukwasha muntu kwikala nayililu yayiwahi nikukeña, chalala natela kudiza Bayibolu.’ Chumichi chamukolesheli kudiza yuma yadiña yawenyi nankashi kudi yena. Eña, antu atiyaña kuwaha kuyilila kakawahi kubadika mazu itwahoshaña.

Chililu Chamwekeshaña Chekalayi Nzambi

Chekala hichisemwa kuyilila antaña jetu kakawahi. Hela chochu, kuwaha kwekala kwalema muloña hichililu chaNzambi. Yesu wahosheli nindi Tata yindi wekala wamuwahi bayi neyi kudi antu amukeña Yena hohuku, ilaña nikudi antu “abulaña kusakilila.” Yesu wayikolesheli atumbanji twindi kumwimbujola Nzambi hakwilila antu ejima yuma yayiwahi nindi: ‘Dichi enu chiña mwikala awanina, neyi chadiyi Tata yenu wamwiwulu niyena wawanina.’—Luka 6:35; Matewu 5:48; Kwidika 34:6.

Chineli Nzambi waleñeli antu neyi chekalayi yomweni, anateli kumwekesha chililu chakuwaha. (Kutachika 1:27) Eña, tunateli kumwimbujola Nzambi nikudiza kwikala amawahi kudi antu amakwawu kubadika antaña jetu hohu. Bayibolu yalumbulula nawu kuwaha kwekala hakachi kamukabu wawuwahi waspiritu yaNzambi yajila, hela ñovu yazatikaña. (Aŋalija 5:22) Dichi muntu nateli kwikala nanichi chililu neyi yadiza nsañu yaNzambi, Nleñi nikukundama kwakwihi nayena.

Chineli etu antu twekala nachililu chakumwekesha kuwaha nawa Nzambi walemesha chililu chenichi, dichatulejelañayi Nzambi nindi ‘tudikokweji muntu namukwawu.’ (Aefwesesa 4:32) Atulejaña cheñi nawu: “Bayi muvulamena kukeña enyuku.”—Aheberu 13:2.

Mukanu kaayi mudi antu abula kwikala nachililu chakuwaha nawa abulaña kusakilila, komana tunateli kumwekesha kuwaha kudi antu amakwawu hela enyi? Chumanyi chikutukwasha kwila mwenimu? Nawa muloñanyi wutwatela kushilaku maana?

Chalema Kumesu aNzambi

Kafwampi, hanyima yakuhosha nindi bayi muvulamena kukeña enyuku, kapostolu Pawulu watwalekeluhu nindi: “Amakwawu adiishili dehi añelu chakadi kuyiluka.” Munateli kutiya ñahi neyi ayinka kukooleka kwakutambwila añelu? Ilaña Pawulu wazatishili iyi nhoshelu namazu akwila nawu ‘chakadi kwiluka aweni.’ Munjila yikwawu watalishili mukwila nindi neyi twikala nachaaku chakwilila antu amakwawu kakawahi, kushilahu nienyi hela antu itwabula kwiluka, akatukiswila munjila jajivulu.

MaBayibolu amavulu mwekala nsañu yikwawu esekejaña mazu aPawulu nansañu yaAbarahama niLoti yasonekawu haKutachika kapetulu 18 ni 19. Muniyi nsañu yejima twatañañamu nawu añelu enjili kudi wena neyi enyi nakuyileja nsañu yalema. Nsañu yamulejeluwu Abarahama yadiña yakushikijewa kwachikaninu  chamukaninuwu kudi Nzambi nawu wukavwala mwana, nawa nsañu yamulejeluwu Loti yadiñi yakupuluka kujilumuka kwadiña kwakwihi kwanyisumba yaSodoma naGomora.—Kutachika 18:1-10; 19:1-3, 15-17.

Neyi mutaña nsona yinatenuwu hewulu mukuwana nenu Abarahama niLoti amwekesheli chililu chakuwaha kudi enyi enjili mwiluña dawu. Antu akushankulu adiñi nakashidikilu nimudimu wakutambwila enyi, chili amabwambu, antaña hela antu abulili kwilukawu. Kafwampi, Nshimbi yamwinkeluwu Mosi yahosheleña nawu aIsarela ateleleli kukwasha antu abulili kwikala aIsarela muyuma yakaankililuwu. (Kuhituluka 10:17-19) Hela chakwila kushankulu adiñi nakashidikilu kakutambwila enyi, Abarahama naLoti ahitakesheli hakumwekesha chisambu kubadika chichakeñekeleña munshimbi. Azatili nañovu chikupu hakwilila enyi chuma chachiwahi nawa ayikiswilili.

Abarahama amukiswilili kuhitila mukumwinka mwana hamuloña wakwilila antu yuma yayiwahi, anetu nawa atukiswilili kumu. Munjilanyi? Abarahama nimwanindi Isaka azatili mudimu walema nankashi hakushikija nkeñelu yaNzambi. Diwu azatili mudimu walema muchikota mwavwalikililiyi Mesiya, Yesu. Nyidimu yachikuhwelelu yazatili Abarahama niIsaka yamwekesheleña Nzambi chakaloñeshayi chuma chakupulwisha nachu antu kuhitila mukukeña niluwi lwindi lwasweja.—Kutachika 22:1-18; Matewu 1:1, 2; Yowanu 3:16.

Iyi nsañu yinakumwekesha chikupu yuma yakeñañayi Nzambi kudi antu akeñayi nichalemeshayi ichi chililu chakuwaha. Bayi nawu twatela kutondahu kwikala nanichi chililuku, ilaña chalema kumesu aNzambi.

Kuwaha Kwatukwashaña Kumwiluka Nzambi Chiwahi

Bayibolu yashimuna nawu mumafuku antu amavulu akekala “abulaña kusakilila, abula kujila, abulaña kukeñañana mwasemwakenawu.” (2 Timotewu 3:1-3) Chakadi nikujina mwazataña nawantu amuchidiwu mafuku ejima. Hela chochu, chumichi hichatela kutukañesha kwilila akwetu yuma yayiwahuku. AkwaKristu ayikonkomwenaña nawu: “Bayi mwila mwinenu chatama nakatama kanayiliyuku. Keñenu kwila yuma yalumbwa kumesu awantu ejima.”—Aroma 12:17.

Twatela kuzata nañovu kulonda twikali nachisambu. Bayibolu yahosha nawu: “Ejima akeñaña . . . aneluki Nzambi,” nawa njila yimu yitwamwekeshelañamu kukeña kwetu hikumwekesha chililu chakuwaha kudi antu amakwawu. (1 Yowanu 4:7; 1 Akorinda 13:4) Eñañi, twamwilukaña Nzambi chiwahi kuhitila mukwilila akwetu antu kakawahi nawa chumichi chatuzañaleshaña. Yesu wahosheli muMpanji yindi yahaMpidi nindi: “Akwaluwi anakooleki, muloña akayitiyila luwi. Atooka munyichima anakooleki, muloña akamona Nzambi.”—Matewu 5:7, 8.

 Shinshikenu chakutalilahu chaAki, chañadima chamumbanda wakuJapan wasumbuka nawa wukweti anyana ayedi. Hanyima yakufwisha amama yindi, waneñeli chikupu. Mpinji yikwawu wakatileña chakwila wayileña nakudimona nandotolu. Dichi chisaka chimu chatuntulukilili kwakwihi nakwashakamineñayi. Chafumini tuhu hakufwisha tata yawu mumaposu, nawa mama yawantu washalili nakuhemba anyana anyanya atanu nkawindi. Aki watiyilili ichi chisaka wushona nankashi nawa wakwatili wubwambu namama yawantu nianyanindi. Wazatili nañovu chikupu hakukwasha ichi chisaka, kuyinka yakudya, niyakuvwala yabulileña kuzatishawu niyuma yikwawu, nawa chumichi chamukwashili Aki kubula kusweja kuneña. Wamweni Bayibolu chiyahosha chalala nawu: ‘Mukuhana mwekala muzañalu weneni kubadika wekala mukutambwila.’ (Yililu 20:35) Eña, kwilila antu yuma yayiwahi dichuma chabadika kuwaha chimwatela kwila neyi mudi nachineñi.

‘Kumusondamisha Yehova’

Himwatela kuzatisha mali amavulu hakwila nawu mwilili antu yuma yayiwahuku. Cheñi nawa hichakeñekaña kuzata nañovu hakwila mwili chumichuku. Antu asakililaña neyi tutumba chimwemweta, tuyitiyila wushona, tuyikwasha, tuyinka chawana hela chanyanya, nikuyileka netu atwaminuku neyi tudi mumusululu. Neyi muneluki wanyi chuma chimwatela kuhosha hela kwila hanoyu mpinji, hoshenu hela ilenu yuma yayiwahi. Yililu yayiwahi yamwekesheliyi kamishonali wamukulumpi yashikili chikupu hamuchima wanona mukwenzi atenawu kumatachikilu achinu chibaaba kubadika yuma yejima yahosheliyi. Dichakeñelañayi Nzambi nindi akwakudifukula indi ekali ‘nakukeña kwalala.’—Mika 6:8.

Kumuzatila muntu chuma chanyanya kunateli kumukwasha chikupu. Neyi muntu yazata namuchima wumu, sweje-e muloña wakukeña kwamukeñayi Nzambi, chumichi chinateli kuzañalesha antu ejima akuhetelamu. Hela neyi kwosi muntu wukuhameka hachuma chachiwahi chimuneli, hichinayi mukwila nawu ñovu jenu jinayi mumenjuku. Nzambi diyi wahamekaña chumichi. Bayibolu yatulejaña nawu neyi twilila akwetu chuma chachiwahi, ‘tunakumusondamisha Yehova.’ (Yishimu 19:17) Kwila mumonahu njila yimwatela kwilila akwenu yuma yayiwahi nehi?

[Mazu ekoku adi hefu 20]

Neyi muneluki wanyi chuma chimwatela kuhosha hela kwila, hoshenu hela ilenu yuma yayiwahi

[Mwevulu wudi hefu 19]

Abarahama amukiswilili chikupu muloña wakwilila antu yuma yayiwahi

[Mwevulu wudi hefu 20]

Kwilila antu yuma yayiwahi kudi neyi ‘kumusondamisha Yehova’