Dizishenu Anyanenu

Lwisu Lwamuleñeleli Gehazi Kujimbesha Kukeña kwaNzambi

KOMANA wafwilahu dehi kwikala nachuma?— * Neyi dimu wekala neyi chekala antu amavulu. Komana watela kutwamba kulonda wikali nayuma yiwunakukeña?— Inehi, hiwatela kwila mwenimuku. Muntu welaña mwenimu wukweti lwisu. Tushinshikenu muntu wejina daGehazi chajimbesheliyi kukeña kwaNzambi muloña walwisu. Wadiña kalama kaElisha kaprofwetu kaNzambi walala, Yehova.

Elisha naGehazi adiñaku kushankulu kwakweni, henohu Mwana kaNzambi, Yesu kanda yavwaliki hamaseki. Yehova wamuzatishili Elisha kwila yuma yekomwesha, yihayamisha. Chakutalilahu, Bayibolu yashimuna hadi mukulumpi wawamashidika awaSiriya wadiña nachikatu chatama chambumba. Kwosi muntu watwesheli kumuuka chiña Elisha hohu.

Elisha chamuzatishileñawu kudi Nzambi hakuuka antu, hetejeleña kutambula maluku. Wuneluki muloña wakaaninineñayi?— Muloña Elisha welukili nindi Yehova diyi wakoñeleña yihayamisha bayi yenaku. Nayamani chamuukiluwu watiyili kuwaha chakwila wakeñeleña kumwinka Elisha yawana yawuru, siliva niyakuvwala yayiwahi. Elisha wakaanini kutambula chuma chidi chejima, ilaña Gehazi wafwilileña nankashi iyi yawana.

Chaholokeleliyi Nayamani munjila Gehazi wamulondeleli lufuchi chakubula kumuleja Elisha. Chamuwaniniyi Nayamani, wuneluki nsañu yamulejeliyi Gehazi?— ‘Elisha nantemeshi nindi katatakichi kunenzi enyi ayedi. Nakukeña yakuvwala yiyedi kulonda yayinki.’

 Ilaña watwambili. Nsañu yashimwiniyi Gehazi yawenyi ayedi enjili yadiñi yakulumbisha. Washimwini iyi nsañu muloña wakeñeleña kutambula yakuvwala yakeñeleñayi Nayamani kumwinka Elisha. Kafwampi Nayamani wadiñi muwilaji. Dichi watiyili kuwaha kumwinka Gehazi yawana. Nayamani wamushililuhu Gehazi yuma yayivulu kubadika yalombeliyi. Wuneluki chuma chamwekeni?—

Chafuntiliyi Gehazi kwitala Elisha wamwihwili nindi: ‘Waya kudihi?’

Gehazi wakwili nindi, ‘Kwosi kunaya.’ Hela chochu, Yehova wamulejeli Elisha chuma cheliliyi Gehazi. Dichi Elisha wahosheli nindi: ‘Awunu himwaka wakutambula mali hela mahinaku!’

Gehazi watambwili mali niyakuvwala yabulili kwikala yindi. Dichi Nzambi wamukatishili Gehazi nambumba yaNayamani. Wunatoñojoki neyi twatela kudizilaku chumanyi?— Twadizilañaku chuma chimu chakwila nawu hitwatela kulumbisha nsañu yakutwamba nakuyishimunaku.

Muloñadi Gehazi chalumbishiliyi nsañu yakutwamba?— Muloña Gehazi wadiñi nalwisu. Wakeñeleña kwikala nayuma yabulili kwikala yindi nawa wafwilileña kuyitambula kuhitila mukutwamba. Muloña wakwikala nalwisu wakatili chikatu chatama muchihandilu chindi chejima.

Gehazi wamweni kukala kukwawu kwasweja kubadika mbumba yakatiliyi. Wuneluki kukala kweniku?— Wajimbesheli wuselewa windi naNzambi nikukeña kwindi. Bayi twila chuma chidi chejima chikutukojeja tujimbeshi yumiyuku. Ilaña, twatela kwikala naluwi nikwinka akwetu yuma yitukweti.

Tañenu muBayibolu yenu

2 Anyanta 5:5, 20-27; Yuda 21

Yowanu 15:10

[Tumazu twaheshina]