Mukwakutiya Mwalombañawu Antu Wetejeladi Makabi?

HELA chakwila alombaña, antu amakwawu ajinokaña neyi chakwila Nzambi wekala kwoku. Ajinokelañadi? Hadaha ajinokaña muloña amonaña makabi asweja mukanu kaayi. Komana mwadihulahu dehi muloña wetejelayi Nzambi makabi?

Komana mwalala Nzambi dichaleñeliyi antu neyi chadiwu makonu, abula kuwanina nawa akabakanaña? Hitunateli kulemesha nzambi wakeñaña nindi antu akabakaneñaku. Shinshikenu chumiche: Neyi chakwila munakutalatala motoka yayiha dichi himukuwana kabadi kamu kakisika, komana mukutoñojoka nenu dichawutuñiluwu? Inehi. Mukuhosha nenu mukwakutuña wawutuñili “chiwahi” nawa nenu awukisañeni kudi muntu hela chuma chacheñi.

Munjila yoyimu, hampinji yitwatalaña yuma yaleñawu yabadika kuwaha mukaayi nikushinshika yuma yatama yakabishaña antu, twatela kuhosha netudi? Bayibolu yatañishaña nawu Nzambi waleñeli antu atachi awanina ilaña awenawu diwu aletesheli ekali abula kuwanina. (Kuhituluka 32:4, 5) Nsañu yayiwahi yakwila nawu Nzambi wakana nindi wukafumishahu kutama, nawa wukelisha antu ovwahila kwikala awanina. Muloñadi chetejelayi mpinji yayilehi hakwila yashikiji chikaninu chindi?

Muloñadi Chetejelayi Makabi Hampinji Yayilehi?

Weteja makabi hampinji yayilehi kulonda twiluki muntu watela kuyuula antu. Yehova hakeñeleña nindi antu adiyuuleña awenawuku. Wateleleli kwikala Nyuuli yawu. Bayibolu yahoshaña nawu: ‘Mudi muntu wendaña himwekala yakuyuula nyendu yinduku.’ (Yeremiya 10:23) Chawushona, antu atachi atondeluhu kudikaña nachiyuulu chaNzambi. Chuma chatama chakoñeluwu chayileñeleli kwikala akwanshidi. (1 Yowanu 3:4) Chumichi chaleñeleli kwikala abula kuwanina nawa adileteleli yihuñu aweni nianyanawu.

 Yehova weteja antu kudiyuula aweni hadi yaaka yayivulu nankashi nawa wunsahu wamwekesha nawu antu hiyakweti wuswa wakudiyuula awenuku. Chamwekana hatooka nawu nfulumendi yawantu yejima yaletaña makabi. Kwosi nfulumendi yafumishahu njita, wubanji, kutama hela nyisoñuku.

Indi Nzambi Wakafumishahu Ñahi Makabi?

Bayibolu yakana nawu Nzambi keña yaleti ituña dadiha daloña. (2 Petulu 3:13) Chiña hohu antu afuukulañahu kukeña akwawu antu niNzambi diwu akashakama mwituña dadiha.—Kuhituluka 30:15, 16, 19, 20.

Bayibolu yashimuna cheñi nawu “ifuku dakusompesha” didi kwakwihi, Nzambi wukafumishahu makabi niantu akojejaña makabi. (2 Petulu 3:7) Nkumininaku, Nyuuli atondawu kudi Nzambi, Yesu Kristu wukayuula antu ovwahila. (Danyeli 7:13, 14) Indi chiyuulu chaYesu chikazata mudimwinyi? Bayibolu yahosha nawu: “Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:11.

Hakwikala Mwanta wamwiwulu, Yesu wukafumishahu kutama, kushilahu niyikatu, wushinakaji nikufwa, kwatachikili hampinji yadikañiluwu antu naYehova, “kaseloki kawumi.” (Masamu 36:9) Yesu wukooka antu ejima aketeja kwikala nyuuli yawu wukweti kukeña. Muchiyuulu chindi, iyi yikaninu yamuBayibolu yikashikijewa:

◼ “Mwenimbu hakahosha nindi, Ami nakataku; antu ashakamamu akayanakena kuluwa kwawu.”—Isaya 33:24.

◼ “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila  hela kukataku. Yuma yakusambila yinahiti dehi.”—Chimwekeshu 21:4.

Komana chatukundejaña wanyi hakwiluka netu Nzambi keña yashikiji chikaninu chindi chakufumishahu makabi ejima? Chayinu mpinji twatela kukuhwelela chikupu netu watiyaña mutwalombaña, hela chakwila weteja makabi hakapinji kantesha.

Nzambi wekala kwoku. Watiyaña chimwalombaña, nikumuleja yuma yayineñeshaña. Wafwilaña nindi mwakadiluñisheña hampinji yimwakabulaña kujinoka nikuneña.