Kundamenu Kwakwihi Nanzambi

Nzambi Chanakenayi Muntu, Wavulamenaña?

ÑAKWILU yidi nawu, eña. Yehova wakana antu ekala nawuselewa windi, nindi: “Ami nakayanakena kuluwa kwawu, ninshidi yawu hinakayanuka nawa cheñuku.” (Yeremiya 31:34) Yehova watuleja chikupu nindi chanakenayi akwanshidi abalumukaña munyichima, hanukaña cheñi nshidi jawuku. Komana ichi chaya mukwila nawu Nleñi waleñeli yuma yejima hanateli kwanuka nshidi yawantu anakenañayuku? Mazu aEzekeli alumbulula chanakenañayi Nzambi nikuvulamena.—Tañenu Ezekeli 18:19-22.

Yehova wamuzatishili kaprofwetu Ezekeli neyi wakumuhoshelaku hakubidika wunsompeshi hadi aYuda abula kushinshika niYerusalema. Muza wejima walekeli kudifukula kudi Yehova nakwinzesha ituña dejima namadombu. Yehova washimwineñahu dehi nindi Yerusalema akamujilumuna kudi akwaBabiloni. Hela chakwila washimwini mazu awunsompeshi Yehova waheni cheñi nsañu yakuchiñeja. Muntu nimuntu wateleleli kufuukulahu; wudi wejima amwinkeli muloña hela kumuyiñisha kwesekeja nayuma yelileñayi.—Vasi 19, 20.

Chumanyi chamwekeneña neyi muntu yaleka kwila yuma yatama nakwila yayiwahi? Yehova wahosheli nindi: ‘Neyi muntu watama yabalumuka hakuleka nshidi jindi jejima janavulumuniyi, hakuhemba nshimbi jami jejima, hakwila yuma yaya muwuñaji nakuloña, chalala yena wakahanda, hakafwaku.’ (Vasi 21) Eña Yehova ‘waanakenaña’ mukwanshidi walekaña kwila yuma yatama, nakubalumuka chikupu mumuchima.—Masamu 86:5.

Chumanyi chakelayi nanshidi jakoñeliyi muntu? Yehova walumbulula nindi, “Nyiloña yindi yaneliyi yejima hiyakamutenenayuku.” (Vasi 22) Ilukenu nenu mukwanshidi wabalumukaña mumuchima ‘hiyakamutenena’ nshidi jinduku. Indi iyi nsañu yalemenadi?

Kutalisha hezu dachiHeberu dabalumunawu muBayibolu nawu ‘kutena,’ mukanda wumu wahosha nawu: “Kafwampi kakavulu [idi izu] datalisha hakwila chuma nawa damwekenaña hamazu amakwawu akundama hakwila chuma.” Dichi izu dakwila nawu ‘kutena’ dinateli kulumbulula “kwila chuma.” Yehova chahoshayi hadi mukwanshidi wunabalumuki mumuchima nindi nshidi yindi “hiyakamutenenayuku,” Watalisha mukwila nindi Hakela chuma hadi muntu hamuloña wanshidi yindi, chidi neyi kumufwisha namuloña hela kumubabeshaku. *

Mazu ekala haEzekeli 18:21, 22 amwekeshaña chanakenañayi Nzambi chikupu. Yehova chatwanakenayi nshidi jetu, hakajanuka cheñi kumbiduku. Ilaña wanatilaña nshidi jawantu abalumukaña mumuchima kunyima yindi. (Isaya 38:17) Chidi neyi kwiji wajimañeshaña chikupu nshidi jenoju.—Yililu 3:19.

Chineli twekala antu abula kuwanina twakeñaña Nzambi yatutiyili luwi. Kafwampi twavulumunaña kapampa kakavulu. (Aroma 3:23) Ilaña Yehova wakeñaña twiluki netu chitwabalumuka mumuchima chikupu, nateli kutwanakena. Nawa neyi nanakeni, wavulamenañaku, dikwila nawu hakatufwisha namuloña hanshidi jetu kulonda yakatubabeshi hanshidi jatwanakenayuku. Iyi nsañu yatukundejaña chikupu. Komana luwi lwaNzambi lwayisañumunaña kukeña kukundama kwakwihi nayena?

[Tumazu twaheshina]