BAYIBOLU YAHIMPAÑA YIHANDILU YAWANTU

“Ichi nasubuka chikupu”

Washimwini Brian Hewitt

CHAAKA CHAKUVWALIKA: 1981

ITUÑA KWAFUMAYI: UNITED STATES

KUHANDA KWINDI: MWANA WAJIMBELI

CHIHANDILU CHAMI CHAKUNYIMA: Navwalikilili muMoundsville, musumba wamwena kwakwihi naKaloña kaOhio kukabeta kaluwunda kaWest Virginia. Hakwikala mwana wamuchiyedi hakachi kawanyana awana, amayala asatu, hitwatiyileña wuudi muchisaka chetuku. Anvwali jami azatileña nañovu chikupu, adiña antu ashinshika nawa akeña akwawu. Hitwadiña namali amavuluku ilaña twadiña nayuma yejima yitwakeñeleña mafuku ejima. Hakwikala aYinsahu jaYehova, anvwali jami azatili hakumina ñovu jawu hakwila nawu atudizishi yishina yamuBayibolu hitwadiña atwansi.

Hela chochu, chinashikili muwukwenzi, muchima wami watachikili kuheñuka nakufuma kuyuma yatañishiluwu. Natachikili kujinoka neyi chakwila nateli kwikala namuzañalu neyi chihandilu chami chilombolewaña nayishina yamuBayibolu. Natoñojokeleña nami kwikala wasubuka hakwila yuma yinakukeña dikwaletaña muzañalu waweni. Hashimbwili wanyi, nalekeli kuya kukupompa kwawakwaKristu. Yayami weyala nimwanyikami wamumbanda niwena adikañili. Anvwali jetu azatili nañovu kulonda atukwashi, ilaña twakaanini.

Ilaña nelukili wanyi nami kusubuka kunakeñeleña kukunleñela kuteñuka nayitumbu yashetana. Ifuku dimu chinafumineña kushikola ibwambu dami wanyikeli ikanya. Natambwili. Kufuma tuhu dina ifuku, natachikili kwila yuma yikwawu yakisañanaña mujimba. Mukuhita kwampinji natachikili kunwa yitumbu yashetana niwalwa nawa nelileña niwuvumbi. Hayaaka yayivulu yalondeleluhu natwalekeluhu kuzatisha yitumbu yasweja kushetana nawa nekalili nduñu wayitumbu yashetana yayivulu. Hamuloña wakusweja kwiñija mutu muyitumbu yashetana, natachikili kulandisha yitumbu yashetana kulonda nidikwasheña nachu.

Hela chakwila nesekeleña kudiwula chinleji chami, mpinji yejima chanlejeleña nawu chihandilu chami chatama. Ilaña natoñojokeli nami nakisiki chikupu kwila nihimpa nehi. Hela chakwila nadiña nawantu kuyidika nikumaluña akwimbila tumina, kakavulu natiyileña wuudi nichikela. Mpinji yikwawu natoñojokeleña chekalawu chiwahi anvwali jami nawa nadihwileña chuma chanletesheli niheñuki.

 BAYIBOLU CHIYAHIMPILI CHIHANDILU CHAMI: Hela chakwila, natoñojokeleña nami hinateli kuhimpaku, hidichatoñojokeleña amakwawuku. Mu 2000, anvwali jami antambikili kuya kukupompa kwankambi kwawa Yinsahu jaYehova. Nayili hela chakwila nakeñeleña wanyi. Nahayami muloña ayayami nimwanyikami adikañili niwena ayili.

Hampinji yinadiña hakupompa, nanukili nami mwahitili hohu chaaka chimu kufuma hampinji yinayili kunidi iluña kwembilileñawu tumina. Chaambu chinamweni chanshikili hamuchima. Hampinji yitwadiña kutumina iluña denzeli nanswadi yayakudya niwishi wamakanya. Antu amavulu enjili kutumina adiña nawulumbu nawa mazu amutumina adiña atama. Ilaña hakupompa kwankambi, nadiña hakachi kawantu azañalala chikupu nawa antambwilili namuzañalu hela chakwila hahitili yaaka yayivulu kufuma hampinji yinayimweni. Heluña hadiñi hawunyonji nawa mpanji jahanineñawu jahosheleña hayuma yayiwahi yakumbidi. Chinelukili yuma yayiwahi yekala munsañu yalala yamuBayibolu nahayamini chanletesheli nikaani nsañu yalala.—Isaya 48:17, 18.

Hanyima yakupompa kwankambi, nafukwiluhu kufunta muchipompelu chawakwaKristu. Yuma yamweniwu hakupompa kwankambi yaletesheli ayayami nimwanyikami niwena kufunta. Wejima wetu asatu twetejeli kudiza Bayibolu.

Vasi yamuBayibolu yanshikili chikupu hamuchima hiYakoba 4:8, yahosha nawu: “Kundamenu kwakwihi naNzambi, niyena wukukundama kwakwihi nanenu.” Nelukili nami neyi inakukeña kukundama kwakwihi naNzambi natela kuwahisha chihandilu chami. Nateleleli cheñi kuleka kunwa makanya, kuzatisha yitumbu yashetana nikunwa walwa.—2 Akorinda 7:1.

Nalekeli kudikunda nawamabwambu jami amakulu nawa nakwatili amaha hadi akwakudifuukula aYehova. Eluda mukwaKristu wandizishileña Bayibolu wankwashili chikupu. Wantemesheleleña nshiña nawa wenjileña nakunhempula. Nikulelu wekala hakachi kawamabwambu jami inadikunda nawu chikupu.

Mu 2001, nadihanini kudi Nzambi kuhitila mukupapatishewa, nawa ayayami nimwanyikami apapatisheweli. Anvwali jami nimwanyikami weyala washinshika azañaleli chelili chisaka chetu chinuñañani mukudifukula kudi Yehova.

CHINAHETELUMU: Natoñojokeleña nami yishina yamuBayibolu yakala nankashi, ilaña ichi nayimonaña neyi hiyuma yayiwahi yatela kunkiña. Bayibolu yanyinkeli ñovu yakuleka kunwa nikulandisha yitumbu yashetana nawa nekalili muntu wamuwahi.

Nikweti kukooleka kwakwikala hakachi kawamana kwetu amukaayi kejima adifukulaña kudi Yehova. Awa antu adikeña chikupu nawa anuñaña hakumuzatila Nzambi. (Yowanu 13:34, 35) Hakachi kawamana kwetu, natambwilahu wuloku walema nankashi, ñodami Adrianne inakeña nawa namulemesha chikupu. Twekala azañalala nankashi hakumukalakela Nleñi yetu hamu.

Chatela nifwileña yuma yakuditiyisha amaweni kuwaha muchihandilu, nadihana kukalakala mudimu wampinji yejima, nakutañisha antu chiyatela kuhetela Mwizu daNzambi. Iwu mudimu wanzañaleshaña hama. Nateli kuhosha chikupu nami Bayibolu yahimpa chihandilu chami. Ichi nasubuka chikupu.

[Mazu ekoku adi hefu 11]

“Bayibolu yanyinkeli ñovu yakuleka kunwa nikulandisha yitumbu yashetana nawa nekalili muntu wamuwahi”