IMBUJOLENU CHIKUHWELELU CHAWU

‘Hela Wafwa Wuchidi Kuhosha Nihanu’

ABELI wadiña nakushinshika mukanka wawanyikoku yindi chiyadiña nakudya matahu chiwahi kumpidi. Hadaha wahanwishili mesu hadi anyikoku nakutala heluña hamweniyi chejeji chafuwela. Welukili nindi hadi mulañu wakesi wampoku yakabali yabalumukileña niniku niniku, yakiñileña njila yaya mwitempa daEdeni. Anvwali jindi adiña nakushakama kweniku, ilaña ichi wena nianyanawu hiyikutwesha kwiñila cheñi mwitempaku. Fwikijenu nampinji yamelela mpepela yinakukunka dichi nsuki jaAbeli jinakuleloka chafumbwiliyi mesu indi nakutala mwiwulu nakutoñojoka hadi Nleñi yindi. Komana wulumbu wekala hakachi kawantu naNzambi wamba kamana? Dichuma chakeñeleñayi kwiluka Abeli nankashi.

Abeli wuchidi kuhosha nenu makonu. Hadaha munateli kuhosha nenu chuma chamuchidiwu hichishimashima. Muloña, iwu mwana kaAdama wamuchiyedi wafwili dehi kushankulu kwakweni. Mafwahindi atoka dehi, kwakwihi namakulakaji ayaaka akushika ku 60 anahituhu. Bayibolu yatudizishaña hadi afu nawu: “Hiyeluka chumaku.” (Mukwakutaŋisha 9:5, 10) Kubombelahu, Abeli hahosheluhu mazu adi ejima asonekawu muBayiboluku. Hanu dinu nateli kuhosha ñahi kudetu?

Kapostolu Pawulu amoneneni kuhosha awa mazu kutalisha hadi Abeli nindi: “Dichi hela wafwa wuchidi kuhosha nihanu.” (Aheberu 11:4) Indi Abeli wahoshaña kuhitila muchumanyi? Kuhitila muchikuhwelelu. Abeli diyi muntu watachi kwikala nanichi chililu chabadika kuwaha. Wamwekesheli chikuhwelelu chakola nankashi, chakwila chakutalilahu chindi chichidi kuzatika, watwimikila chuma chachiwahi chitwatela kwimbujola makonu. Neyi tudizila kuchikuhwelelu chindi nikwimbujola chikuhwelelu chindi, dikwila nawu Abeli nakuhosha nanetu munjila yalala nawa yayiwahi.

Yumanyi yitunateli kudizila kudi Abeli nichikuhwelelu chindi henohu muBayibolu mwekala hohu nsañu yantesha yahosha hadi yena? Tushinshikenu.

HAMPINJI YAKULILEÑAYI ABELI ANTU ACHIDIÑI ANTESHA HAMASEKI

Abeli wavwalikili kumatachikilu achihandilu chawantu. Kuhiñahu Yesu wahosheli hadi Abeli nindi wadiñaku “haaliluwu chikuku champata yamunu mwishina.” (Luka 11:50, 51) Chakadi nikujina Yesu hakutena mpata yamunu mwishina watalishili kudi antu achiñejaña kukuulewa kunshidi. Chineli Abeli wadiña wamuchiwana hadi antu atachi, chakadi nikujina diyi wadiña watachi wamweniyi Nzambi nindi watela kukuulewa. * Chakadi nikujina Abeli hakulilili hakachi kawantu ateleleli kumwimikila chakutalilahu chachiwahuku.

Hela chakwila antu achidiña antesha hamaseki, atachikili kumona yihuñu yayeni. Anvwali jaAbeli, Adama naEvu adiña alubanji nawa añovu. Ilaña akoñeli chiluwa cheneni muchihandilu chawu, nawa elukili chuma chakoñeluwu. Adiña awanini, nawa adiña nakuchiñeja kwakushakama wumi wahaya nyaka. Ilaña adikañili naYehova Nzambi nawa ayihañili muParadisa mwashakamineñawu, mwitempa daEdeni. Hamuloña wakutwamijaku yuma yakeñeleñawu kubadika yuma yejima nichihandilu chawanyanawu, ekalili abula  kuwanina nawa ajimbesheli wumi wahaya nyaka.—Kutachika 2:15–3:24.

Chatachikiluwu kushakama kunsa yetempa, chihandilu chayikalilili Adama naEvu. Ilaña, chavwalikili mwanawu wawedi amutumbili ijina nawu Kena hela “Chuma Chakusoña,” nawa Evu wahosheli nindi: ‘Yehova nankwashi kuvwala iyala.’ Mazwindi amwekeshaña nawu watela watoñojokeleña hachikaninu chaYehova chakaniniyi mwitempa, chashimwiniyi nindi mumbanda wakavwala ‘mwana’ wakakisañana watama wakojejeli Adama naEvu kulumbuka. (Kutachika 3:15; 4:1) Komana Evu watoñojokeleña nindi diyi mumbanda atenenuwu muwuprofwetu nawa Kena diyi ‘mwana’ akaninuwu?

Neyi dichatoñojokeleñayi, dikwila nawu watoñojokeleña mwaluwa. Kubombelahu, neyi Evu naAdama amulejeleña Kena nsañu yamuchidiwu chakulileñayi, dikwila nawu yuma yamulejeleñawu iwu mwana wabula kuwanina hiyamukwashiluku. Mukuhita kwampinji, Evu wavweli mwana wamuchiyedi, ilaña hitwawanañahu mazu amuchidiwu akumushimekaku. Amutumbili nawu Abeli, chalumbuluka nawu ‘Mpepela’ hela ‘Chuma Chakuhemesha.’ (Kutachika 4:2) Komana idi ijina datondeluwu damwekesheli nawu amudiwili Abeli, nakulemesha Kena? Hadaha dimu, ilaña hituneluki chikupuku.

Hela chochu, anvwali anateli kudizilaku yuma yayivulu kudi awa anvwali atachi. Komana mwadizishaña anyanenu kwikala nayililu yakudinka wanta, kufwila yuma, nilwisu kuhitila muyuma yimwahoshaña niyimwelaña? Tahindi mwayidizishaña kumukeña Yehova Nzambi nikukwata wubwambu nayena? Chawushona, anvwali atachi akañenyi kuzata mudimu wawu. Ilaña, kumbidi kwadiña chuma chachiwahi chakwashili anyanawu.

CHUMANYI CHAMUKWASHILI ABELI KUMUKUHWELELA NZAMBI?

Hampinji yakulileña awa anyana ayedi, hadaha Adama wayidizishileña nyidimu yatela kuyikwasha muchisaka. Kena wekalili ndimi; Abeli wekalili kabiña.

Hela chochu, Abeli wazatili chuma chabadika kulema. Chimwahitili yaaka, wekalili nachikuhwelelu, chililu chachiwahi chasonekeliyi Pawulu mukuhita kwayaaka. Toñojokenu. Hikwadiña muntu wamwimikililili Abeli chakutalilahu chachiwahuku. Hanu dinu chumanyi chamukwashili kumukuhwelela Yehova Nzambi? Shinshikenu iyi yuma yisatu yamukwashili Abeli kwikala nachikuhwelelu chakola.

Yileñaleña yaYehova. Eñañi, Yehova washiñili iseki, chumichi chaleñeleli disoñeña nyiña ninyisonsonyi yakañesheleña mbutu kumena. Hela chochu, iseki dasoñeleña chachiwahi yakudya yahandilileña chisaka chaAbeli. Nawa anyama ayishiñili wanyi, kushilahu niatujila, inshi; mapidi, majiya, tuloña, tuluñalwiji, mawulu, mavu, itañwa, kakweji nitutumbwa. Kwejima kwatalileñayi Abeli wamweneña yuma yamwekesheleña wunsahu wakukeña kwasweja, maana nikuwaha kwaYehova Nzambi, waleñeli yuma yejima. (Aroma 1:20) Kutoñojoka chikupu hayuma yamuchidiwu kwakolesheli chikupu chikuhwelelu chindi.

Chakadi nikujina Abeli wadiña nampinji yakutoñojoka nankashi hayuma yakuspiritu. Fwikijenu nakubiña nyikoku yindi. Mudimu wawukabiña wakeñekeleña kwenda chikupu. Walombweleña ayimuna amwovu kumapidi, muyinekineki, nakuyawusha  tuloña, hakwila yawani kudi munyenvu wawuwahi, kutupila twamenji amawahi nikumaluña amawahi kwakunookela. Hadi anyama ejima aleñeliyi Nzambi, anyikoku amwekana neyi adana ñovu, neyi kwiji ayileñeli kulonda ayibiñeña nikuyikiña kudi muntu. Komana Abeli niyena watoñojokeleña nindi wakeñeleña wunlomboli, kukiñewa nikumwakamena kudi Muntu wasweja maana nawa wabadika antu ejima ñovu? Chakadi nikujina wahosheli yuma yayivulu yatoñojokeleñayi mukulomba nawa ichi chakolesheli chikuhwelelu chindi.

Yikaninu yaYehova. Adama naEvu atela ayilejeli anyanawu yuma yamwekeni mwitempa daEdeni yaletesheli ayihañumu. Dichi, Abeli wadiña nayuma yayivulu yakutoñojokahu chikupu.

Yehova wahosheli nindi iseki dikekala dashiñewa. Abeli wamweni namesu kapu nyiña ninyisonsonyi yamwekesheleña kushikijewa kwanawa mazu. Yehova washimwineñahu dehi cheñi nindi Evu wakamona yihuñu hakubaaba nihakuvwala anyana. Hampinji yavwalikileña anyikijindi, chakadi nikujina Abeli wamweni nindi ana mazu ashikijeweli. Yehova welukili cheñi nindi Evu wakatiyaña neyi kwiji nfwimwindi wamukeña wanyi, hamusha maanaku nawa Adama wakamuyuulaña. Abeli wamweneña iyi yuma chiyazatikileña. Muyuma yejima, Abeli wamweni nindi mazu aYehova alala chikupu. Dichi, Abeli wamweni yuma yalala yaletesheli yakuhweleli muchikaninu chaNzambi ‘chamwana’ wamba kafumishahu yuma yatama yatachikilili muEdeni.—Kutachika 3:15-19.

Ambuña aYehova. Kwosi antu adiña nachakutalilahu chachiwahi chateleleli kwimbujolayi Abeli, ilaña heseki hadiña añelu achikuhwelelu ateleli kwimbujolayi Abeli. Chelili Adama naEvu anayihañi dehi mwitempa, Yehova hakeñeli nindi Adama naEvu nianyanawu afunti cheñi muParadisaku. Hakwila yakiñi hawiñililu, Yehova wemikiluku akerubi, añelu akweti chifulu cheneni, kushilahu nimulañu wakesi wampoku yakabali wadiña nakubalumuka niniku niniku.—Kutachika 3:24.

Toñojokenu Abeli hampinji yadiñayi kansi chatiyileñayi hakumona akerubi. Chineli adibalumwini munyijimba yawuntu, Abeli wayimweneña nindi adiña nañovu hama. Nawa mulañu wakesi “wampoku yakabali,” wabutukileña chakadi kujima, watwalekeleñahu nakubalumuka niniku niniku, niwena wamuhayamishileña. Chakulileñayi Abeli, komana wamweni nindi ana akerubi azeyeli nakushiya mudimu wayinkeluwu? Inehi. Wufuku nimwaana, chaaka nichaaka, nichimwahitili yaaka yayivulu, iyi yileñeleña yikweti maana yatwalekeluhu nakuzata wuna mudimu. Dichi Abeli welukili nindi Yehova Nzambi wadiña nawambuñindi aloña nawa ashinshika. Abeli wamweni nindi akerubi adiña ashinshika nawa amwovwahila Yehova, iyi yililu hayimwenuhu muchisaka chinduku. Mwamweni chakutalilahu chawañelu chakolesheli chikuhwelelu chindi.

Kutoñojoka chikupu Yehova chamwekesheliyi yililu yindi yejima kuhitila muyileñaleña, muyikaninu yindi niyakutalilahu yemika Ambuñindi, chikuhwelelu chaAbeli chakoleli chikupu. Tunateli kudizilaku yuma yayivulu kuchakutalilahu chindi. Sweje-e atwansi atela kukoleshewa hakwiluka nawu anateli kwikala nachikuhwelelu chalala mudi Yehova Nzambi, hichikweti muloña nayuma yelañawu antu amuchisaka chawuku. Tukweti yuma yayivulu yatela kutukwasha kwikala nachikuhwelelu makonu, yidi neyi yileñaleña yakuhayamisha yitwamonaña, Bayibolu yejima, kushilahu niyakutalilahu yayivulu yawantu achikuhwelelu.

INDI MULAMBU WAABELI WAWAHILILIDI?

Chelili Abeli yasweji kumukuhwelela Yehova wakeñeleña kumwekesha chikuhwelelu chindi munyidimu. Hanu dinu, muntu nateli kumwinka Nleñi wakuleña kwejima chumanyi? Eña, Nzambi hakeñeleña chawana chidi chejima hela kumukwasha kudi antuku. Mukuhita kwampinji, Abeli welukili chikuma chalema chakwila nawu: Neyi yamwinka Yehova yuma yayiwahi yaheteliyi namuchima wumu, Tata yindi wamwiwulu wadi kuzañalala.

Dichi Abeli wanoneli nyikoku yamwiyinda dindi kulonda yayilambuli. Watondeluhu nyikoku yayiwahi dikwila nawu anyana kanyikoku awedi nawa hakuhana mulambu windi wabombelelumu yimamu yamweniyi nindi diyi yabadika kuwaha. Hampinji yoyimu, Kena niyena wakeñeleña kwikala nankisu niwuselewa waNzambi, waloñesheli mulambu wanyikabu yadimineñayi. Ilaña yitoñojoka yindi hiyadiña neyi  yaAbeluku. Ichi chaambu chamwekeni hampinji yahanineñawu awa akansi namukulumpi nyilambu yawu.

Anyana kaAdama ejima atela azatishili kameña nikesi hakuhana nyilambu yawu, hadaha kukamwihi nawakerubi, adiña nakumwimenaku Yehova hamaseki hayina mpinji. Yehova wakwili. Twatañaña nawu: “Yehova watalili kudi Abeli nikumulambu windi.” (Kutachika 4:4) Iyi nsañu hiyashimuna Nzambi chamwekesheliyi wuselewa winduku. Muloñadi chamukiswililiyi Abeli?

Komana wamukiswilili hamuloña wamulambu wahaniniyi? Abeli wahanini kanyama kakweti wumi, wapwekesheli mashi alema. Kamona Abeli welukili kulema kwamulambu waheniyi? Chimwahitili yaaka yayivulu henohu Abeli wafwa dehi, Nzambi wazatishili mulambu wamwana kamukoku wemenenuku mulambu waMwanindi wawanina “Mwana kamukoku waNzambi,” wapwekesheli mashindi akadi muloña. (Yowanu 1:29; Kwidika 12:5-7) Hela chochu, Abeli helukili hela hatiyishishili yuma yejimiyuku.

Ichi dichuma chitweluka chakwila nawu: Abeli wahanini mulambu wayuma yayiwahi yadiñiyi nayu. Bayi neyi Yehova watiyili kuwaha namulambu hohuku ilaña namuntu yomweni. Kukeña kwamukeñeliyi Yehova nichikuhwelelu chalala dichamusañumwini Abeli kuhana mulambu.

Ilaña Kena hazatili muniyi njilaku. Yehova ‘hatalili kudi Kena hela kumulambu winduku.’ (Kutachika 4:5) Bayi neyi mulambu waKena wadiña watamaku; muloña mukuhita kwampinji Nshimbi jaNzambi jetejeli kuhana mulambu wayisakola yaheseki. (Alevi 6:14, 15) Bayibolu yahoshaña hadi Kena nawu “nyidimu yindi yadiñi yatama.” (1 Yowanu 3:12) Kufwana antu amavulu makonu, hadaha Kena watoñojokeleña nindi kumwekesha hohu kwakama Nzambi kumesu dichuma chalema. Kubula chikuhwelelu hela kumukeña Yehova kwamwekeni hatooka nanyidimu yindi.

Kena chelukiliyi nindi hanawani wuselewa waYehovaku, komana wakeñeleña kudizila kuchakutalilahu chaAbeli? Inehi. Wamuhililili mana kwindi. Yehova wamweni yuma yadiña mumuchima waKena nawa wamulejeli mumesu awunda. Wamusoñamishili Kena nindi yililu yindi yikumuleñela kwila nshidi yahamesu bwi-i, nawa wamulejeli chuma chachiwahi chateleleli kwilayi kulonda ‘amutiyi,’ neyi chakwila Kena wahimpili yililu yindi.—Kutachika 4:6, 7.

Kena wadiwili kusoñamisha kwaNzambi. Ilaña wamwilili mana kwindi wovwahila nindi ayi chimu nakwenda mwisaña. Kena wamunyamukilili Abeli nakumujaha. (Kutachika 4:8) Dikwila nawu, Abeli diyi muntu watachi wakabishiluwu hansañu yansakililu, nawa muntu watachi kufwa kukola nsakililu. Wafwili, ilaña nsañu yindi yichidi kutwalekahu.

Mashi aAbeli alobeli kudi Yehova Nzambi muchifwikija kulonda yatendi. Nzambi wamwekesheli wuñaji, kuhitila mukubabesha Kena hachuma chatama chakoñeliyi. (Kutachika 4:9-12) Sweje-e dinu, nsañu yaAbeli yahosha hachikuhwelelu yatudizishaña yuma yayivulu makonu. Yaaka yashakaminiyi, hadaha yashikili muyaaka nkulakaji, iyi yaaka yakeheli kwesekeja nachahandileña antu munana mafuku, ilaña Abeli wazatishili chiwahi yaaka yashakaminiyi hamaseki. Hela wafwili welukili nindi amukeña kudi Tata yindi wamwiwulu Yehova, nawa wukweti wuselewa windi. (Aheberu 11:4) Tunateli kukuhwelela chikupu netu Yehova wamwanukaña, nakuhembelela kusañukila kuwumi wahamaseki muparadisa. (Yowanu 5:28, 29) Komana mwakamumona muparadisa? Munateli neyi mufuukulahu kutiyilila chinakuhoshayi Abeli nawa neyi mwimbujolaña nichikuhwelelu chindi.

[Tumazu twaheshina]

[Mwevulu wudi hefu 13]

Muchihandilu chindi chejima, Abeli wamweni nindi akerubi hiyambuña aYehova ashinshika nawa ovwahila

[Mazu ekoku adi hefu 14]

Muyileñaleña dimwakolesheleliyi Abeli chikuhwelelu chindi mudi Nleñi yindi wukweti kukeña

[Mwevulu wudi hefu 15]

Abeli wahanini mulambu windi nachikuhwelelu; ilaña Kena nehi