MUTU WUDI HEFU DATACHI: KOMANA MWATELA KUCHIINA KUKUMA KWAKAAYI?

Kukuma Kwakaayi Woma, Muzañalu Nichikela

Mwatiyaña ñahi kutalisha hefuku da 21 December, 2012, didi hakalenda yawaMaya dashimunañawu antu amavulu nawu dikahimpa yuma mukaayi kejima? Kwesekeja nayuma yimwachiñejeleña munateli kuzañalala, kutiya kutama hela kubula kushaku maana. Tahindi hinsañu yikwawu yaluwa yashimwineñawu dehi yakukuma kwakaayi?

Mwatiyaña ñahi ‘hakukuma kwakaayi,’ kwashimunawu muBayibolu? (Matewu 24:3) Antu amakwawu achiinaña nawu iseki akadocha. Amakwawu azañalalaña muloña akeñaña kumona yuma yikamwekana hakukuma kwakaayi. Antu amavulu anazeyi hakutiya nsañu yakwila nawu kukuma kwakaayi kudi kwakwihi. Komana iyi yitoñojoka yashindamena hansañu yakutwamba tahindi yalala?

Munateli kuhayama hakwiluka chahosha Bayibolu hansañu yakukuma kwakaayi. Bayi neyi Bayibolu yashimuna nyiloña yinateli kutuleñela kutalila kukuma hohuku, ilaña yashimuna cheñi nawu amakwawu anateli kutiya kutama neyi kukuma kubula kwinza hampinji yatalilañawu. Shinshikenu Bayibolu chiyakula malwihu avula kwihulawu kutalisha hakukuma kwakaayi.

 Komana iseki akadocha?

ÑAKWILU YAMUBAYIBOLU: ‘[Nzambi] wahatishili iseki hamashina adu, kulonda dibuli kuswila chahaya nyaka.’—MASAMU 104:5.

Iseki hiyakadikisañana nakesi hela nayuma yacheñuku. Ilaña Bayibolu yatañishaña nawu iseki dakushakama antu haya nyaka. Masamu 37:29 yahosha nawu: “Akwakuloña akaswana ituña, akashakamamu haya nyaka.”—Masamu 115:16; Isaya 45:18.

Nzambi chaleñeliyi iseki, wahosheli nindi ‘dinawahi nankashi,’ nawa dichatiyañayi. (Kutachika 1:31) Chatela yadikisañani, wakana nindi ‘wukajilumuna akisañana iseki,’ nawa wukadikiña kulonda akabuli kudikisañana haya nyaka.—Chimwekeshu 11:18.

Hela chochu, munateli kuhayama chahosha nsona ya 2 Petulu 3:7. Iyi vasi yamuBayibolu yahosha nawu: “Mawulu niiseki aduku katataka, anayiswekeli kesi.” Komana chumichi hichinakumwekesha nawu iseki akadochaku? Kafwampi mpinji yikwawu Bayibolu yazatishaña mazu akwila nawu “mawulu,” “iseki,” “nikesi” muchifwikija neyi yinjikijilu. Chakutalilahu, mukanda waKutachika 11:1 chiwahosha nawu: “Mumpata yejima yamunu mwishina mwadiñi idimi dawu dimu hohu,” wazatisha “mpata yejima yamunu mwishina” hakutena antu.

Nsañu yaha 2 Petulu 3:7 yamwekeshaña nawu mawulu, iseki, nikesi katenawu hiyifwikija. Vasi 5 ni 6 yahosha hansañu yesekeja naDibaji damumafuku aNowa. Hayina mpinji, mpata yamunu mwishina yayikulu ayijilumwini, ilaña pulaneti yetu hiyakisikiluku. Dichi “iseki” dashimuna Bayibolu nawu adikisañeni naDibaji datalisha kudi antu atama nawa amadombu adiñaku hayina mpinji. Nawa “mawulu,” akisañenuwu atalisha kudi antu ayuulileña antu ahamaseki. ( Kutachika 6:11) Munjila yoyimu, nsona ya 2 Petulu 3:7 yashimwineñahu dehi nawu antu atama ninfulumendi yatama akayijilumuna haya nyaka neyi kwiji nakesi.

Chumanyi chikamwekana hakukuma kwakaayi?

ÑAKWILU YAMUBAYIBOLU: ‘Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.’—1 YOWANU 2:17.

“Mpata yamunu mwishina” yinakuhita bayi neyi hiisekuku, ilaña hiyantu ahamaseki abulaña kwila mwaya muchima waNzambi. Nzambi ‘wakafumishahu’ antu atama kulonda antu amawahi akadiluñisheña wumi hamaseki neyi chochinateli ndotolu kuladika muntu  wukweti ikuma dakansa kulonda muyeji yakoli. (Masamu 37:9) Chumichi chinakumwekesha nawu ‘kukuma kwakaayi’ hichuma chachiwahi.

Nmwenu yamuchidiwu kutalisha ‘hakukuma kwakaayi’ diyazatishawu akwakubalumuna Bayibolu, azatisha iyi nhoshelu ‘kukuma kwanyaka yamakonu’ hela ‘kukuma kwayaaka.’ (Matewu 24:3; New International Version) Chineli antu niiseki dikapuluka hakukuma, chaya mukwila nawu hakulondela nyaka yayiha. Kafwampi Bayibolu yahoshaña “hanyaka yakenza.”—Luka 18:30.

Yesu wahosheli haniyi hampinji yakumbidi nindi ‘kuleña kwakwiha kwayuma yejima.’ Hayina mpinji, Yesu wakelisha antu kwikala cheñi neyi chakeñeleñayi Nzambi hakutachika. (Matewu 19:28) Twakadiluñisha

◼ Paradisa heseki mwakabula wubanji nawa mwakashakamawu ejima chiwahi.—Isaya 35:1; Mika 4:4.

◼ Nyidimu yayiwahi.—Isaya 65:21-23.

◼ Nyisoñu yejima yikamana.—Isaya 33:24.

◼ Kubula kushinakaja.—Yoba 33:25.

◼ Afu akayisañula.—Yowanu 5:28, 29.

Neyi twilaña ‘mwaya muchima waNzambi,’ yuma yatulejañayi, hitunateli kuchiina kukuma kwakaayuku. Nawa tunateli kutalila kukuma kwakaayi.

Komana chalala kukuma kwakaayi kudi mukamwihi?

ÑAKWILU YAMUBAYIBOLU: ‘Chimwakamona yumiyi hiyikumwekana, kelukenu nenu wanta waNzambi keña wushiki.’—LUKA 21:31.

Nkuluñaña wejina daRichard Kyle wasoneka nindi “yuma chiyahimpaña mukukasumwisha nikukala kwamonañawu antu kwaleñelaña antu kuhosha nawu kukuma kwakaayi kudi mukamwihi.” Sweje-e dinu neyi hiyakutwesha kulumbulula yuma yinakuhimpika nikukala kwamonañawu antuku.—The Last Days Are Here Again.

Hela chochu, atuprofwetu amuBayibolu hiyafuukwiluhu kusoneka kutalisha hakukuma nakulumbulula muloña wamwekenaña yuma yatamaku. Ilaña, ayoneneni kudi Nzambi kulonda alumbululi yuma yamwekeshaña nawu kukuma kwakaayi kudi kwakwihi. Shinshikenu wuprofwetu wukwawu kulonda mudimweni neyi wunakushikijewa makonu.

 ◼ Njita, nzala, nyitentanshi, niyipupu yafwana.—Matewu 24:7; Luka 21:11.

◼ Wubanji wukasweja.—Matewu 24:12.

◼ Antu anakukisañana iseki.—Chimwekeshu 11:18.

◼ Antu akekala akwakudikeña, akwakufwila mali niyisela ilaña kumukeña Nzambi nehi.—2 Timotewu 3:2, 4.

◼ Kwambokelamu kwayisaka.—2 Timotewu 3:2, 3.

◼ Kaneñawudi kutalisha hawunsahu wakukuma kwakaayi.—Matewu 24:37-39

◼ Kushimwina nsañu yayiwahi yaWanta waNzambi mukaayi kejima.—Matewu 24:14.

Neyi chahosheliyi Yesu, chitwamona “yuma yejimiyi” twatela kwiluka netu kukuma kwakaayi kudi kukamwihi. (Matewu 24:33) A Yinsahu jaYehova akuhwelela nawu iwu wunsahu walala, nawa alejaña akwawu yuma yakuhwelelawu kuhitila mukushimwina mumatuña 236.

Komana neyi kukuma kubula kwinza hampinji yinakutalilawu antu chalumbulula nawu kwakenza wanyi?

ÑAKWILU YAMUBAYIBOLU: ‘Chakwilawu nawu, Kwamwena, kwanzo-o; hohenohu kujilumuka kwakayikasumwisha, neyi chakasumwishañawu mumbanda wudi nevumu kudi nyisoñu yakuvwala; hiyakapuluka nihantuku.’—1 ATESALONIKA 5:3.

Bayibolu yesekeja kujilumuka kwakaayi namusoñu wakuvwala, mama yawantu hanateli kutondolwela musoñuku nawa wenzaña mukukasumwisha. Mpinji yakutwala kukukuma yidi neyi ivumu, nawa mama yawantu wudi nevumu weluka chikupu yinjikijilu yakuvwala. Ndotolu nateli kumuleja mafuku akuvwala mwana; hela chakwila wukuvwala wanyi mumafuku amulejeluwu, neluki chikupu nindi katataka keña yavwali mwana. Chochimu, neyi kukuma kubula kwinza hampinji yinakutalilawu antu, hichikuhimpa walala wakwila nawu awa ‘himafuku akukumininaku.’—2 Timotewu 3:1.

‘Neyi chinjikijilu chakwila nawu tudi kwakwihi nakukuma chalala,’ munateli kwihula nenu, ‘muloñadi antu amavulu chakañenyañawu kuchiluka?’ Bayibolu yahosha nawu, kukuma chikwashika kwakwihi antu amavulu akadiwula wunsahu. Chatela eluki yuma yamaneni yinakumwekana mumafuku akukuminina, anakuseha nakuhosha nawu: “Chochakaminuwu ankakulula tulu [twakufwa], yuma yejima chochiyekala, neyi chiyadiñi hatachi haleñeluwu  yuma.” (2 Petulu 3:3, 4) Munjila yikwawu, chinjikijilu chamafuku akukuminina chinakumwekana hatooka, ilaña antu amavulu anakuchidiwula.—Matewu 24:38, 39.

Ichi chibaaba chinashimuni wunsahu wukwawu wamuNsona wunakumwekesha nawu kukuma kudi kukamwihi. * Mukukeña kudiza nsañu yayivulu? Neyi mukukeña, kwila muhanjeka nawaYinsahu jaYehova kulonda mwiteji kudiza nawu Bayibolu chawana nehi? Munateli kudizila mwitala denu, heluña dikwawu dimunakeñi hela tuhu hanshiña. Chuma chimwatela kuhana hohu himpinji yenu nawa mukuhetelamu chikupu.

[Tumazu twaheshina]

[Chikasha chidi hefu 8]

KOMANA AYINSAHU JAYEHOVA ASHIMUNAHU DEHI MAFUKU ALUWA KUTALISHA HAKUKUMA?

A Yinsahu jaYehova akuhweleleli mwaluwa kutalisha hampinji yakukuma kwakaayi. Kufwana atumbanji twaYesu amuyaaka nkulakaji yakusambila, aYinsahu jaYehova akuhweleleli nawu wuprofwetu wukwawu wukushikijewa hampinji yimu ilaña hiyadiña mpinji yaNzambuku. (Luka 19:11; Yililu 1:6; 2 Atesalonika 2:1, 2) Twetejaña chahosheliyi muntu wadiña Chinsahu hayaaka yayivulu A. H. Macmillan nindi: “Nelukili nami twatela kwiteja yiluwa yetu nikutwalekahu kusandujola Mwizu daNzambi kulonda tutiyishishi.”

Muloñadi wutwatwalekelañahu kushimwina netu kukuma kudi kwakwihi? Muloña tweluka kulema kwakwovwahila mazu aYesu akwila nawu: “Babalenu, tonenu.” Neyi tuleka kushimwina hakukuma kwakaayi Yesu nateli kumona nindi tudi mutulu nawa wukutiya kutama. (Maku 13:33, 36) Muloñadi?

Shinshikenu ichi chakutalilahu: Muntu wunakuhweleli nindi amakombi anakwinza nakwiya nateli kutiya ipumba dikumuleñela kutoñojoka nindi anenzi dehi, hakuhindwisha chisaka chindi komana watiya hohu mpepela yinakukunka. Hela chochu, ifuku dikwawu nateli kupulwisha chisaka chindi neyi yatwalekahu kwikala wasoñama.

Munjila yoyimu twakuhweleleli mwaluwa kutalisha hakukuma. Ilaña twasha muchima hakwovwahila mazu aYesu nikupulwisha antu kubadika kutondolwela mwahoshaña antu. Kufumba kwaYesu ‘kwakushimwina wunsahu chikupu’ kwatusañumunaña kusoñamisha antu kutalisha hakukuma kwakaayi.—Yililu 10:42.

Twakuhwelela netu chuma chalema bayi neyi hikusha maana hampinji yakenza kukumaku, ilaña twatela kukuhwelela netu kwakenza nawa dichitwatela kwila. Twalemesha mazu ekala hamukanda waHabakuki 2:3, ahosha nawu: ‘Hela [kukuma] kukulabajala [kwesekeja nachimwatoñojokaña], kuchiñililenu, muloña kwakenza chalala, hikwakalabaku.’