“Wunayimwekeshi Kudi Anyikeki”
KUNDAMENU KWAKWIHI NANZAMBI
“Wunayimwekeshi Kudi Anyikeki”
Komana munakukeña kwiluka nsañu yalala yahosha hadi Nzambi, chekalayi, yuma yakeñayi niyahelayi nichekala nkeñelu yindi? Yehova Nzambi wamwekesha nsañu yalala yahosha hadi yena Mwizu dindi, Bayibolu. Bayi neyi muntu wudi wejima nateli kutaña Bayibolu nikutiyisha chikupu iyi nsañu yalalaku. Muloñadi? Muloña kutiyishisha nsañu yalala yakuspiritu yamuchidiwu hichawana; bayi neyi muntu wudi wejima watambwila ichi chawanaku. Tushinshikenu chahosheliyi Yesu haniyi nsañu.—Tañenu Matewu 11:25.
Iyi vasi yatachika namazu akwila nawu: “Hamafuku owu Yesu hakwila nindi.” Yuma yinakukeña kushimunayi Yesu hadaha yinakundami kuyuma yinamwekani. Nafumi tuhu hakuzuwila antu abulili kukeña kwikala atumbanji twindi amunyisumba yisatu yaÑaliliya mwakoñeliyi yihayamisha yañovu. (Matewu 11:20-24) Munateli kwihula nenu, ‘Indi muntu wunamoni yihayamisha yaYesu yañovu nateli ñahi kubula kutiyilila nsañu yalala yatañishileñayi?’ Chumichi chafumini hakuchinchika kwanyichima yawantu.—Matewu 13:10-15.
Yesu welukili nindi hakwila tutiyishishi nsañu yalala yakuspiritu yekala muBayibolu, twatela kwikala nayuma yiyedi: Wukwashu waNzambi nimuchima wawuwahi. Yesu hakulumbulula nindi: “Eyi Tata, Mwanta wewulu niiseki, nakusakilili chiwajindili yumiyi kudi akwamaana nikudi ashinshika, hiwukuyimwekesha kudi anyikeki.” Komana munamoni nenu kutiyishisha nsañu yalala yakuspiritu yekala muBayibolu hichawana? Yehova, wukweti ñovu yakutonda antu anateli kumwekeshelayi nsañu yalala muloña ‘hiMwanta wewulu niiseki.’ Muntu wejima nateli kwikala nachawana chakutiya nsañu yalala, muloña Nzambi hekala nachambuku. Chumanyi chaleñelaña yamwekeshi nsañu yalala yamuBayibolu kudi amakwawu, amakwawu nehi?
Yehova wakeña antu adizoza bayi adinka wantaku. (Yakoba 4:6) Wajindaña nsañu yalala kudi “akwamaana nikudi ashinshika,” akwamaana amukaayi niataña adinkaña wanta abulaña kukeña kuyikwasha kudi Nzambi. (1 Akorinda 1:19-21) Ilaña wamwekeshaña nsañu yalala kudi “anyikeki,” antu enzaña kudi yena nanyichima yalala, adizoza neyi mwana wanyanya. (Matewu 18:1-4; 1 Akorinda 1:26-28) Yesu Mwana kaNzambi welukili antu ejima amuchidiwu. Anlomboli jansakililu amavulu ataña chikupu nawa adinkeli wanta, hiyatiyishishili mazu aYesuku, ilaña ayibinda yanshi adizoza atiyishishili. (Matewu 4:18-22; 23:1-5; Yililu 4:13) Hampinji yoyimu, antu aheta nawa ataña amwekesheli kudizoza kwakweni ekalili atumbanji twaYesu.—Luka 19:1, 2, 8; Yililu 22:1-3.
Tushinshikenu halwihu lutwehula kumatachikilu lwakwila nawu: Komana munakukeña kwiluka nsañu yalala yahosha hadi Nzambi? Neyi dimu, munateli kutiya kuwaha hakwiluka nenu Nzambi hakeña antu amukaayi adimonaña nawu akweti maanaku. Ilaña wakeña antu asekeshawu kudi akwamaana amukaayi. Neyi mudizaña Izu daNzambi namuchima wawuwahi nawa wakudizoza, munateli kwikala hakachi kawantu enkañayi Yehova chawana chalema, kutiyishisha nsañu yalala yahosha hadi yena. Kutiyishisha nsañu yalala kukuyiletela muzañalu muchihandilu chenu makonu nawa kunateli kuyilombola ‘kuwumi walala chikupu,’ wumi wakamanaña mwituña dadiha daloña dakanayi Nzambi didi kwakwihi nakwinza. *—1 Timotewu 6:12, 19; 2 Petulu 3:13.
Nsona yimwatela kutaña muJanuary
[Tumazu twaheshina]
^ A Yinsahu jaYehova akutiya kuwaha kuyikwasha kulonda mudizi nsañu yalala yahosha hadi Nzambi niyikaninu yindi. Adizishaña Bayibolu hetala chawaana kuzatisha mukanda waChumanyi Chacheni Chatañishaña Bayibolu?
