BAYIBOLU YAHIMPAÑA YIHANDILU YAWANTU

“Akeñeleña nawu niluki ami aweni chuma chacheni chahosha Bayibolu”

Washimwini Luis Alifonso

CHAAKA CHAKUVWALIKA: 1982

ITUÑA KWAFUMAYI: DOMINICAN REPUBLIC

KUHANDA KWINDI: WAKULILILI MUCHECHI YAMORMON

CHIHANDILU CHAMI CHAKUNYIMA: Navwalikilili muSanto Domingo, Dominican Republic, yami kabinda hadi anyana awana. Anvwali jami adiña ataña chikupu nawa akeñeleña nawu tukuli nakwikala anyana alumbuluka nawa ashinshika. Kufuma hampinji yadibulakenuwu anvwali jami nawamishonali amuchechi yaMormon mwahitili yaaka yiwana hakwila nivwaliki. Anvwali jami atiyili kuwaha hakumona atwansi awamayala chavwaliluwu chiwahi, nawa afuukwiluhu nawu chisaka chetu chikali hakachi kayisaka yatachi muchina chitutu kwikala muchechi yatenañawu nawu Church of Jesus Christ of Latter-day Saints, hela Chechi yaMormon.

Chinakulili nadiluñishileña nyidimu yamuchechi nawa nalemesheli chihandilu chawaMormon kutalisha hachisaka niyililu yayiwahi. Natiyileña kuwaha kwikala muchechi yaMormon nawa nadiña nachikonkwanyi chakwikala kamishonali.

Chinashikijili yaaka 18, chisaka chami chabuukilili kuUnited States kulonda nitañileña hashikola yamuñoñi yayiwahi. Chimwahitili chaaka chimu, atata wamumbanda niamandumi aYinsahu jaYehova enjili nakutuhempula kuFlorida. Atutambikili nawu tuyi hamu nawu kukupompa kwankambi. Natiyili kuwaha muloña antu ejima itwadikumini nawu atañileña nsona nikusoneka yikuma. Nalombeli nsonekeshu nichipapilu nawa natachikili kusoneka.

Chamanini kupompa kwankambi atata wamumbanda niamandumi anlejeli nawu chineli inakukeña kwikala kamishonali anateli kunkwasha kudiza yuma yikwawu yamuBayibolu. Namweni nami hichuma chachiwahi muloña hayina mpinji, natañileña nankashi mukanda wawaMormon kubadika Bayibolu.

BAYIBOLU CHIYAHIMPILI CHIHANDILU CHAMI: Hampinji yitwahanjekeleña nsañu yamuBayibolu hanshiña, atata wamumbanda  niamandumi ankolesheleña mpinji yejima kwesekeja yuma yinakuhweleleli nayuma yatañishaña Bayibolu. Akeñeleña nawu niluki ami aweni chuma chacheni chahosha Bayibolu.

Kwadiña yuma yayivulu nankashi yakuhwelelawu aMormon yinakuhweleleli, ilaña hinelukili iyi nsañu chiyesekana naBayiboluku. Atata wamumbanda antemesheleli magazini yaAwake! yaNovember 8, 1995 yasonekawu kudi aYinsahu jaYehova, mwadiña yibaaba yahosheleña hayuma yakuhwelelawu aMormon. Nahayamini hakuwana neyi nelukili wanyi yuma yayivulu yatañishañawu aMormon. Ichi chanleñeleleli kusandujola haWebu sayiti yawaMormon kulonda niluki neyi yuma yashimwinuwu muAwake! yalala. Yadiña yalala, nawa nelukili chikupu nami yalala chinayili nakutala mumatala awaMormon mwahembelañawu yuma yalema yakunyaka muUtah.

Mpinji yejima nakuhweleleli nami Mukanda wawaMormon wendelaña hamu naBayibolu. Ilaña chinatachikili kutaña Bayibolu nakanañachima, namweni chaambu chekala hakachi kantañishilu yawaMormon nansañu yamuBayibolu.

Kubombela hantañishilu yambukaku, natiyileña kutama hantañishilu yawaMormon yakuhameka nyunza yawu. Chakutalilahu, aMormon ayitañishaña nawu itempa daEdeni dadiña muJackson County, Missouri, United States of America. Atuprofwetu amuchechi atañishaña nawu ifuku dimu Nzambi wamba kayuula iseki dejima kuhitila munfulumendi yaUnited States.

Nahayamini yuma yatañishañawu aMormon neyi yakamwekena mumatuña amakwawu, chidi neyi ituña dinavwalikila. Chantemesheleluwu nshiña kudi mukwenzi wamuchechi yaMormon wadizishileñawu kulonda akekali kamishonali, namwihwili iyi nsañu mumpanji yitwahanjekeleña. Namwihwili chakubula kuhita mumbadi neyi nateli kulwa nawakwawu aMormon neyi chakwila ituña dawu dinakulwa njita netuña dawakwawu. Nahayamini chetejeliyi. Nasandujoleli chikupu kutalisha hantañishilu yinakuhweleleli nawa nayihwili akulumpi amuChechi yaMormon. Anlejeli nawu ñakwilu yamalwihu inehwili mwabombeleli nsañu yakujiinda yamba kakulewa neyi chejeji chinatoñekeluku.

Yuma yanlumbulwililuwu yantiyishili kutama, dichi natachikili kudishinshika nichuma chinakeñeleleña kwikala kamishonali wawaMormon. Nelukili nami nakeñeleña kwikala kamishonali muloña nakeñeleña kukwasha antu amakwawu. Nakeñeleña cheñi kwikala kamishonali muloña nakeñeleña antu anlemesheña. Ilaña hinelukili nsañu yayivulu yahosha hadi Nzambuku. Hela chakwila natalileña muBayibolu kakavulu, hinayilemesheli chikupuku. Hinelukili chuma chafuukwilayi Nzambi iseki hela antuku.

CHINAHETELUMU: Kuhitila mukudiza Bayibolu nawaYinsahu jaYehova, nadizili yuma yayivulu chidi neyi, ijina daNzambi, chuma chamwekanaña neyi muntu nafwi, nimudimu waYesu hakushikija nkeñelu yaNzambi. Nkumininaku nelukili yuma yekala muniwu mukanda wawuwahi nawa natiyileña kuwaha kulejaku amakwawu nsañu yalala yinadizileña. Nelukili nami Nzambi wekala kwoku, ilaña ichi nahoshaña nindi mukulomba neyi Ibwambu dami nakeña chikupu. Napapatisheweli nakwikala Chinsahu chaYehova haJuly 12, 2004, nawa chimwahitili tukweji tutanu nakamu natachikili kukalakala mudimu wawakwaKristu wakushimwina mpinji yejima.

Nazatilili hachishina chawaYinsahu jaYehova muBrooklyn, New York yaaka yitanu. Nadiluñishili chikupu kuzata mudimu wakupulinta nyikanda yashindamena haBayibolu yaheteshaña antu amavulu hamaseki nawa nichidi kudiluñisha kukwasha amakwawu kudiza hadi Nzambi.