Mosi Muntu Wadiña Nachikuhwelelu Chakola

CHIKUHWELELU HICHUMANYI? Kwesekeja naBayibolu, “Chikuhwelelu hikutalila yuma yalala yitwachiñejaña netu yakamwekana, wunsahu wamwekanaña wayuma yalala hela yakadi kumonewa.” (Aheberu 11:1, NW) Muntu wamukuhwelela Nzambi weluka chikupu nindi Nateli kushikija yikaninu Yindi yejima.

MOSI WAMWEKESHELI ÑAHI CHIKUHWELELU? Mosi wafuukwiluhu yuma yamwekesheleña nawu wakuhwelela muyikaninu yaNzambi. (Kutachika 22:15-18) Wadiña nakukooleka kwakudiluñisha chihandilu chachiwahi muEjipitu, ilaña washili yumiyi “hakutonda kumona ihuñu chimu nawantu aNzambi, hakuleka kuluña mpinji yantesha nachiseki chanshidi.” (Aheberu 11:25) Komana wafuukwiluhu chakadi kutoñojoka chakwila waditoñesheli chimwahitili yaaka? Inehi, Bayibolu yahosha nawu Mosi ‘watwalekeluhu kumona Wakamonewaña hakutatakena.’ (Aheberu 11:27) Mosi wafuukwiluhu yuma yashindameneni hachikuhwelelu chadiñiyi nachu muyikaninu yaNzambi.

Mosi wakeñeleña kukwasha amakwawu kulonda ekali nachikuhwelelu chakola mudi Nzambi. Chakutalilahu, shinshikenu chuma chamwekeni chelili aIsarela atoñojoki nawu anayishintakeshi hakachi kamashidika aFwaro naKaluñalwiji Kachinana. A Isarela amudilili Yehova niMosi chatiyiluwu woma nikutoñojoka nawu akumona kukala. Indi Mosi welilidi?

Mosi welukili wanyi nindi Nzambi keña yaambuli Kaluñalwiji Kachinana kulonda yapulwishi aIsarela. Hela chochu, Mosi wakuhweleleli nindi kudi chuma chikwilayi Nzambi kulonda yapulwishi antu Jindi. Mosi wakeñeleña nindi akwawu aIsarela niwena akuhweleli. Twatañaña nawu: ‘Mosi wayilili antu ana, nindi, Bayi mutiyaña womaku, imanenu kuka mumoni wamwinu waYehova wakuyikoñelayi lelu.’ (Kwidika 14:13) Komana Mosi wayikwashili aIsarela kulonda ekali nachikuhwelelu chakola? Eña, muloña Bayibolu yahosha hadi Mosi niaIsarela ejima nawu: ‘Nakukuhwelela ahitili muKaluñalwiji Kachinana nakwenda hamaseki awuma.’ (Aheberu 11:29) Chineli Mosi wadiña nachikuhwelelu, ejima amukuhweleleli Yehova ahetelelumu.

YUMANYI YITWADIZILAÑAKU? Tunateli kumwimbujola Mosi kuhitila mukufuukulahu yuma yamwekeshaña nawu twakuhwelela muyikaninu yaNzambi. Chakutalilahu, Nzambi watushiika nindi wukutwinka yuma yitwakeñaña neyi tutwamijaku kudifukula kwindi. (Matewu 6:33) Eña, chinateli kutukalila kuleka kutwamijaku yuma yakumujimba muloña diyi yuma yavula kutwamijaku antu mukaayi. Ilaña tunateli kukuhwelela chikupu netu neyi tuzata nañovu nikupelesha chihandilu chetu nikusha maana hakudifukula, Yehova wukatwinka yuma yejima yitwakeñaña. Watukana nindi: “Hinamba kakulekaku, hela kukushiya hinakakushiyaku.”—Aheberu 13:5.

Twafwilaña cheñi kukwasha amakwawu kwikala nachikuhwelelu. Chakutalilahu, anvwali akweti maana eluka kukooleka kwabadika kukwetuwu kwakukwasha anyanawu kumukuhwelela Nzambi. Anvwali atela kutañisha anyanawu henohu achidi atwansi kulonda eluki nawu kwekala Nzambi watudizishaña yuma yayiwahi niyatama. Kubombelahu, anvwali atela kwiluka chikupu nawu anyanawu aneluki nikutiyishisha nawu kwovwahila nshimbi jindi dichuma chachiwahi. (Isaya 48:17, 18) Anvwali ayinkaña anyanawu chawana chalema neyi ayikwasha kukuhwelela nawu Nzambi ‘wudi kwoku, nawa wasomwenaña antu amukeñakeñaña.’—Aheberu 11:6.