Mosi Muntu Wadiña Nachililu Chakukeña

KUKEÑA HICHUMANYI? Kukeña kwabombelamu kukunda antu amakwawu. Muntu wukweti kukeña wamwekeshaña chatiyañayi hadi antu akeñayi kuhitila muyuma yelañayi nimazu ahoshañayi hela chakwila kwila mwenimu kwakeñekaña kudihana.

MOSI WAMWEKESHELI ÑAHI KUKEÑA? Mosi wadiña wamukeña Nzambi. Munjilanyi? Anukenu mazu asonekawu ha 1 Yowanu 5:3 nawu: “Kumukeña Nzambi yowu kwila mwatulejañayi.” Chineli Mosi wamukeñeli Nzambi, wovwahilileña nshimbi jindi. Mosi wovwahilili mwejima mwamulejeluwu kudi Nzambi kwila, chidi neyi mudimu wakala wakuya nakudimona naFwaro wañovu nimudimu wamwekeneña neyi wapela wakwolola mbwechi yindi haKaluñalwiji Kachinana. Mosi wazatili mudimu wudi wejima chili wakala hela wapela. “Dimu mweliliyi.”—Kwidika 40:16.

Mosi wakeñeli akwawu aIsarela. Elukili nawu Yehova wamuzatishileña Mosi hakulombola antu jindi, dichi ayileña kudi Mosi nakumuleja kukala kwawu kwashiyashana. Twatañaña nawu: ‘Antu chochemanawu kwadiñiyi Mosi kufumisha kubudidi ndo-o nikumelela.’ (Kwidika 18:13-16) Fwikijenu Mosi chazeyeleñayi hanyima yakusompesha aIsarela enjileña nakumuleja nyiloña yawu mwaana wejima. Ilaña Mosi wakeñeli antu, dichi watiyileña kuwaha kuyikwasha.

Kubombela hakutiyilila nyiloña yawu, Mosi wadiña nakuyilombelelaku antu akeñeliyi. Walombeleleñaku niantu amwilileña katama. Chakutalilahu, chelili muhela aMosi Miriyami yamutobeli Mosi, Yehova wamukatishili nambumba. Chatela yazañalali chamubabesheluwu, Mosi wamulembeleleli nikulomba nindi: “Eyi Nzambi muuki nalembi.” (Kuchinda 12:13) Kukeña dichuma chamukojejeli Mosi kulomba muniyi njila.

YUMANYI YITWADIZILAÑAKU? Tunateli kumwimbujola Mosi kuhitila mukumukeña Nzambi chikupu. Kukeña kweniku kukutuleñela kwovwahila nshimbi jindi ‘chakufuma munyichima.’ (Aroma 6:17) Neyi tumwovwahila Yehova chakufuma munyichima yetu tukutiyisha muchima windi kuwaha. (Yishimu 27:11) Cheñi nawa, yetu twahetelañamu. Kafwampi, neyi tumukalakelaña Nzambi muloña twamukeña chikupu, bayi neyi tukwilaña yuma yayiwahi hohuku ilaña tukudiluñishaña kuyila.—Masamu 100:2.

Njila yikwawu yitwatela kumwimbujolelamu Mosi hikukeña akwetu chikupu. Neyi amabwambu jetu hela antaña jetu atuleja kukala kukwetuwu, kukeña kwatusañumunaña (1) kutiyilila nakanañachima; (2) kuyitiyila wushona; nawa (3) atela kwiluka nawu twayakamenaña.

Kufwana Mosi, twatela kulombelaku antu itwakeña. Mpinji yikwawu neyi atuleja kukala kukwetuwu tunateli kutiya kutama neyi hitukutwesha kuyikwashaku. Tunateli nikuditoñesha netu, “Kwosi chuma chinatela kwila, chiña kuyilombelaku hohu.” Anukenu nenu: “Kulembelela kwamuntu waloña kwekala nañovu.” (Yakoba 5:16) Kulomba kwetu kunateli kumuleñela Yehova kumwilila muntu chuma Chatelelayi kubula kwila. Eñañi, kwosi chuma chitwatela kwilila akwetu itwakeña kubadika kuyilombelelaku. *

Komana himukwiteja nenu tunateli kudizilaku yuma yayivulu kudi Mosuku? Hela chakwila, wadiña neyi chochitwekala etu, wemikili chakutalilahu chachiwahi chakwikala nachikuhwelelu, kudizoza nikukeña. Chitwembujola chikupu chakutalilahu chindi, tukuhetelamu etu aweni chikupu niamakwawu.—Aroma 15:4.

[Tumazu twaheshina]