Mosi Wadiña Muntu Wadizoza

INDI KUDIZOZA HICHUMANYI? Kudizoza hikubula kudivuna hela kudinka wanta. Muntu wadizoza hadimonaña nindi wabadika akwawuku. Muntu wadizoza weluka nindi wawanina wanyi nawa kudi yuma yakañanyañayi kwila.

MOSI WAMWEKESHELI ÑAHI KUDIZOZA? Mosi hadinkeli wanta chamwinkeluwu ñovuku. Kakavulu neyi muntu anamwinki ñovu hashimbulaña wanyi nakumwekesha neyi wadizoza hela wadinka wanta. Nsoneki wamuma 1800 Robert G. Ingersoll wahosheli nindi: “Antu amavulu anateli kuumika makabi. Ilaña neyi munakukeña kwiluka chekalayi muntu, mwinkenu ñovu.” Chumichi chamwekeshaña nawu Mosi wemika chakutalilahu chachiwahi nankashi chakudizoza. Munjilanyi?

Mosi watambwilili ñovu chikupu, muloña Yehova wamwinkeli mudimu wakulombola aIsarela. Ilaña iji ñovu hijamuleñeleli Mosi kudinka wantaku. Chakutalilahu, shinshikenu njila yayiwahi yamanishililumu muloña wakala wakundama kuwuswana. (Kuchinda 27:1-11) Iwu muloña wadiña wakala kuhakula, muloña hiwakundamini kudi ana ambanda hohuku, ilaña ninyiloña yadi kumwekana kumbidi.

Indi Mosi wahakwili ñahi? Komana watoñojokeli nindi chineli wadiña nlomboli yawaIsarela, welukili chikupu chakuhakula? Komana washindameneni hawuswa windi, indi kwiji hayuma yelukiliyi, tahindi hayuma yelukiliyi chikupu nindi dichatoñojokañayi Yehova?

Hadaha muntu wadinka wanta wadi kwila mwenimu. Bayi Mosuku. Bayibolu yatulejaña nawu: “Mosi watweli nsañu [iyi] kudi Yehova.” (Kuchinda 27:5) Toñojokenu chumichi. Hela chakwila walombweli munza waIsarela hayaaka 40, Mosi washindameneni hadi Yehova, bayi yomwenuku. Tunamoni chikupu netu Mosi wadiña wadizoza hama.

Mosi hatoñojokeleña nindi diyi watela kwikala hohu nañovuku. Watiyili kuwaha chelili Yehova yatondi aIsarela amakwawu kwikala atuprofwetu. (Kuchinda 11:24-29) Chelili muku windi weyala yamuleji nindi atondi amayala amakwawu amukwasheñaku mudimu, Mosi watiyililili. (Kwidika 18:13-24) Chelili hakukeña kufwa, hela chakwila wadiña nañovu Mosi wamwilili Yehova kulonda yatondi muntu wakumusinsa. Yehova chatondeliyi Yoshuwa, Mosi wamukwashili kansi weyala nikuleja antu kulonda alondeli wunlomboli waYoshuwa hakuya Mwituña daChikaninu. (Kuchinda 27:15-18; Kuhituluka 31:3-6; 34:7) Mwamweni, Mosi welukili nindi hikukooleka hakulombola aIsarela mukudifukula. Ilaña wazatishileña ñovu jindi wanyi hayuma yakeñeleñawu amakwawu.

YUMANYI YITWADIZILAÑAKU? Bayi tudinka wanta muloña wakwila anatwinki ñovu chili twekala nawuswa wakuzata yumaku. Ilukenu nenu: Hakwila nawu tuzati mudimu waYehova chachiwahi, kudizoza kwalema nankashi kubadika wuswa wutukweti. (1 Samweli 15:17) Neyi twadizoza chikupu, tukufwilaña kuzatisha kufumba kwakuwahi kwamuBayibolu kwakwila nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.”—Yishimu 3:5, 6.

Chakutalilahu chaMosi chatudizishaña cheñi nawu hitwatela kulemesha chikupu chifulu hela ñovu yitukwetuku.

Komana twahetelañamu neyi twimbujola chakutalilahu chaMosi chakudizoza? Mwamweni. Neyi tudizoza chikupu, antu akututiyaña kuwaha nawa tukudikunda nawu. Sweje-e dinu, tukudikunda naYehova Nzambi, wamwekeshaña chililu chakudizoza hakulemesha antu jindi. (Masamu 18:35) “Nzambi wadikañaña nawakwakudinka wanta, hakwila akwakudizoza wayinkaña luwi.” (1 Petulu 5:5) Tukweti muloña watela kutuleñela kwimbujola kudizoza kwaMosi.