“Nsañu Yayiwahi yaYudasi” Hinsañu Yamuchidinyi?
“Nsañu Yayiwahi yaYudasi” Hinsañu Yamuchidinyi?
MUAPRIL 2006, yipapilu yansañu mukaayi kejima yadiña nansañu yakomwesheli antu yakwila nawu izanvu dawantu adiza chikupu dedishileña nsañu yayiha yawaninuwu yadiña namutu wunakwila nawu, “Nsañu Yayiwahi yaYudasi.” Iyi yibaaba yahosheli nawu antu adiza chikupu atoñojokeli nawu iyi nsañu yinahimpi chikupu chitwatoñojokaña hadi Yudasi, kambanji wamufukejeleli Yesu. Awa antu adiza chikupu amwilisha Yudasi kwikala chilobu kuhitila mukuhosha nawu Yudasi welukili chatiyili Yesu nawa nawu wamuhanini Yesu kulonda amujahi muloña Yesu wamulejeli kwila mwenimu.
Komana iyi hinsañu yakunyaka yalala tahindi yakutwamba? Neyi yalala, komana yashimuna nsañu yakujinda yahosha hadi Yudasi Isakaroti, Yesu Kristu hela akwaKristu akusambila? Komana yatela kutukwasha hansañu yitweluka hadi Kristu nintañishilu yindi?
CHAWANINUWU “NSAÑU YAYIWAHI YAYUDASI”
Kwosi weluka chawaninuwu “Nsañu Yayiwahi yaYudasi.” Iyi nsañu ateleleli kuyiwana nikuyihemba kudi akwakuvumbujola, ilaña atachikili kuyilandisha chakukasumwisha hanyima yachaaka cha 1978. Hadaha ayiwanini muEjipitu mu 1978 mwijamu, indi kwiji mwiyeñu. Yadiña hakachi kanyivuñilu yiwana yasonekeluwu mwidimi daweniEjipitu akushankulu.
Chafumishiluwu iwu muvuñilu mwiluña dominina daEjipitu mwawuhembeleluwu hayaaka yayivulu, watachikili kutaboka swayi-swayi. Antu antesha adiza chikupu ayitalishili hakapinji kantesha iwu muvuñilu mu 1983, ilaña wuseya waswejeli nawa hiyawulandiluku. Chineli iwu muvuñilu awuhembeli chiwahi wanyi, mukuhita kwayaaka watabokeli. Mu 2000 awulandili kudi muntu watalaña hayuma yakushankulu wakwituña daSwitzerland. Dichi wawuhanini kwizanvu dawankuluñaña azatileña kuhitila muwukwashu wamutayi waMaecenas Foundation for Ancient Art niaNational Geographic Society, nawa antu wenawa adiña namudimu weneni wakutuñulula muvuñilu weniwu watabokeli mutuyitabu twanyanya. Idi izanvu dateleleli cheñi kwiluka yaaka yashakamini muvuñilu nikutuntulula nsañu yadiñamu.
Chapiminuwu yuma yazatishiluwu hakusoneka, awanini neyi muvuñilu weniwu awusonekeli muyaaka yamuma 200 hela 300 C.E. Hela chochu, antu adiza chikupu abokeli nawu muvuñilu “waNsañu Yayiwahi yaYudasi” awutuntulwili kufuma mwidimi dachiGriki kunyaka kwakweni. Indi “Nsañu Yayiwahi yaYudasi” ayisonekeli chaakanyi nawa yuma yadiña ñahi?
“NSAÑU YAYIWAHI YAYUDASI” HINSAÑU YAYIWAHI YANSAKILILU YAGNOSTIC
“Nsañu Yayiwahi yaYudasi” ayiteneni katachi munyikanda yaIrenaeus, waditeneneña nindi hinsoneki wawakwaKristu wamuyaaka yakukumisha yamuma 100 C.E. Mumukanda wumu, Irenaeus wasonekeli hadi izanvu dimu datañishileña yuma yadimbulwiliyi nindi: “Ashimunaña nawu Yudasi nfukeji wadiña weluka chikupu iyi yuma, nawa yena hohu diyi welukili nsañu yalala yabulili kwilukawu akwawu, wazatili mudimu wakujinda wakufukeja. Yuma yejima yamwiwulu niyahamaseki yekalili muwufwinda kuhitila mudi yena. Asoneka nsañu yanyaka yakulumbisha yatenañawu nawu Nsañu Yayiwahi yaYudasi.”—Against Heresies.
Irenaeus wemeneni hakukaana ntañishilu yashiyashana yawakwaKristu aGnostic aditeneneña nawu akweti maana adimena. Gnosticism hiizu datenañawu mazanvu amavulu, wejima wawu atiyaña nikulumbulula “nsañu yalala” yawakwaKristu munjila yashiyashana. A Gnostic atandishileña ntañishilu yawu kushindamena hanyikanda yawu yavulili chikupu muyaaka yamuma 100 C.E.
Nyikanda yamuchidiwu yawaGnostic kakavulu yatwambaña nawu apostolu aYesu aya mpuhu hiyatiyishishili nsañu yinduku nawa kwekala ntañishilu yakujinda yatañishiliyi Yesu yatiyishishiluwu kudi atumbanji antesha hohu. * A Gnostic amakwawu akuhweleleli nawu mpata yamunu mwishina hikaleya. Dichi “nzambi nleñi” wamuNyikanda yachiHeberu wadiña hinzambi wakuminamu kubadika anzambi amaneni ashiyashana akuhweleleluwu. Akuhweleleli nawu muntu wukweti maana adimena diyi wukwiluka nindi muntu watela kufuma mumujimba wawuntu.
“Nsañu Yayiwahi yaYudasi” yashindamena haniyi yuma yakuhwelelawu antu. Yatachika namazu akwila nawu: “Awa diwu mazu akujinda amulejeluwu Yudasi Isakaroti kudi Yesu, hamafuku atanu naasatu henohu kunashali mafuku asatu nakwanakana Paseka.”
Komana iwu dimuvuñilu waweni wateneniyi Irenaeus washimunañawu nawu wajimbeli hadi yaaka yayivulu? Marvin Meyer, wadiña mwizanvu datachi dadizili nikutuntulula iwu muvuñilu wahosheli nindi “yuma yalumbulwiliyi [Irenaeus] chantesha yesekana chikupu naMuvuñilu wamakonu wukweti mutu wunakwila nawu Nsañu Yayiwahi yaYudasi.”
ANTU ADIZA CHIKUPU AJINOOKAÑA CHAMUSHIMUNAWU YUDASI MUNSAÑU YAYIWAHI YAYUDASI
“Nsañu yayiwahi yaYudasi” yahosha nawu Yesu waseheleña munjila yakusekesha neyi atumbanji twindi akañanya kwiluka yuma chiwahi. Ilaña Yudasi diyi kapostolu wumu hohu hadi apostolu 12 wamwilukili Yesu chikupu. Dichi, Yesu wamulejeli kumbadi “yuma yakujinda yawanta.”
Izanvu datachi dawantu adiza chikupu datuntulwili “Nsañu Yayiwahi yaYudasi” dalondeleli yuma yahosheliyi Irenaeus. Munsañu yatuntulwiluwu, amwekesha nawu Yudasi diyi kambanji akeñeluwu nankashi kudi Yesu watiyishishili nsañu yakujinda nawa “weñila muwanta.” Hela chakwila apostolu akeñeli muntu wakumusinsa Yudasi, Yudasi watambwilili “wuloku weneni [kubadika atumbanji amakwawu] muloña wamukwashili Yesu kufuma mumujimba windi wawuntu.”
Ansoneki asonekaña nyikanda yalandañawu chikupu adi neyi Bart Ehrman niElaine Pagels, antu aya mpuhu adiza chikupu nsañu yawakwaKristu akusambila niyawaGnosticism, niwena edishili swayi-swayi yuma yasonekeluwu “haNsañu Yayiwahi yaYudasi” yadifwanini chikupu nayuma yatuntulwili izanvu datachi. Hela chochu, chimwahitili kapinji kantesha, antu amakwawu adiza chikupu adi neyi April DeConick niBirger Pearson, ashimwini yuma yajinookeluwu. Ashimwini nawu hamuloña wakukeña kushimuna nankashi iyi nsañu hayikunzulemba, mutayi waNational Geographic Society walusukilili kwidisha iyi nsañu yanyaka. Kubombelahu, April DeConick niBirger Pearson akameneni nawu iwu mukanda awidishili swayi muloña wakukeña kuwutiyakesha hayikunzulemba. Amweni cheñi nawu hiyalondeleleli njila yalondelañawu hakuhituluka munyikandaku.
Chelili azati nkawawu, aDeConick naPearson ahosheli nawu yibalu yikwawu yalema yamumuvuñilu ayituntulwili chiwahi wanyi kudi antu adiza chikupu akusambila. Kwesekeja nachatuntulwiliyi DeConick iwu muvuñilu, Yesu wamuteneni Yudasi neyi “Ndemoni Wamwikumi naTusatu,” bayi “spiritu wamwikumi natusatuku.” * Yesu wamulejeli cheñi Yudasi chakubula kuhita mumbadi nindi hamba keñila “muwantaku.” Chatela yabadiki atumbanji amakwawu, Yesu wamwilili Yudasi nindi: “Wukakoña chuma chatama kubadika ejima. Muloña muntu wukunvwika, diyi wukanlambula.” Kwesekeja nayitoñojoka yaDeConick, ansoneki “aNsañu Yayiwahi yaYudasi” adiña nakudimbulula apostolu ejima. Nsañu yakunkulwiluwu aDeConick niPearson yakwila nawu muniyi “Nsañu Yayiwahi yaYudasi,” bayi neyi Yudasi hichilobuku.
YUMANYI YITWATELA KUDIZILA KUNSAÑU YAYIWAHI YAYUDASI?
Chili atoñojokaña nawu Yudasi wasonekeli iyi nsañu yayiwahi hichilobu hela hindemoni, kwosi antu adiza chikupu ashinshikili iyi nsañu ahosha jiika nawu iyi nsañu yakushankulu yashimuna nsañu yalalaku. Bart Ehrman walumbulwili nindi: “Bayi neyi hiNsañu Yayiwahi yasonekeluwu kudi Yudasi, hela muntu waditeneni nindi hiYudasuku. . . . Bayi neyi hiNsañu Yayiwahi yasonekeluwu mumafuku aYudasi kudi muntu wamwilukiluku . . . Dichi bayi neyi himukanda wunateli kutuleja nsañu yikwawu yamwekeni mumafuku aYesuku.”
“Nsañu Yayiwahi yaYudasi” himukanda wawaGnostic wamuyaaka yamuma 100 C.E. wasambililuwu kusoneka muchiGriki. Antu adiza chikupu kanda eluki neyi chakwila iyi “Nsañu Yayiwahi yaYudasi” yayiha yawaninuwu yoyimu nansañu yateneniyi Irenaeus. Ilaña “Nsañu Yayiwahi yaYudasi” yamwekesha chikupu nawu kwadiña mpinji yatiyakesheluwu akwaKristu akutwamba ntañishilu yawu, yayikojejeli kwamboka mumazanvu ashiyashana. Chatela yitadikishi chahosha Nsona, “Nsañu Yayiwahi yaYudasi” yamwekesha chikupu iku kusoñamisha kwawapostolu kudi neyi kwasonekeliyi Pawulu haYililu 20:29, 30 nindi: “Ami neluki nami chinakafumahu, . . . mukachi kenwenu aweni mwakanyamuka antu akuhosha yuma yaheña, akadikokela atumbanji awenawu.”
[Tumazu twaheshina]
^ Iyi nsañu yayiwahi kakavulu ayitenaña kushindamena hadi antu ashimunañawu nawu atiyishishili chiwahi ntañishilu yalala yaYesu, chidi neyi “Nsañu Yayiwahi yaTomasi” “niNsañu Yayiwahi yaMariya Mandaleni.” Nyikanda yejima yayikulu yamuchidiwu yawanawu yashika kwakwihi na 30.
^ Antu adiza chikupu atoñojokeleña nawu Yudasi hindemoni muniyi nsañu, muntu wamutiyishishili chikupu Yesu kubadika atumbanji amakwawu, amweni yuma yadifwana yamwekeshaña andemoni amuNsañu Yayiwahi yamuBayibolu yashimuna choloka kutalisha hachekalayi Yesu.—Maku 3:11; 5:7.
[Mwevulu wudi hefu 13]
Mwevulu wunakumwekesha Yudasi nakumufukeja Yesu, wabaziluwu kudi Gustave Doré wadiñaku muma 1800
[Mazu aKusakilila]
Engravings by Doré
[Mazu ekoku adi hefu 14]
“Bayi neyi hiNsañu Yayiwahi yasonekeluwu mumafuku aYudasi kudi muntu wamwilukiluku”
[Mazu aKusakilila 15]
Kenneth Garrett/National Geographic Stock
[Mazu ekoku adi hefu 15]
Kwosi antu adiza chikupu ashinshikili iyi nsañu ahosha jiika nawu iyi nsañu yakushankulu yashimuna nsañu yalalaku
