MUTU WUDI HEFU DATACHI: YUMA YITWADIZILAÑA KUDI MOSI

Indi Mosi Wadiñanyi?

Chumanyi chimwatoñojokaña neyi mutiya ijina daMosi? Mwatoñojokaña nenu . . .

◼ hinkemba anaswekuwu kudi mama yindi muchimpaya muKaloña Nile?

◼ himwana akulishililuwu nachihandilu chachiwahi muEjipitu kudi mwana kaFwaro wamumbanda, wabulili kuvulamena nindi wadiña kaIsarela?

◼ himuntu wadiña kabiña mwituña daMidiyani hadi yaaka 40?

◼ himuntu wahanjekeli naYehova * kukamwihi nachiputa chakwatili kesi?

◼ himuntu wamulejeli mwanta wakuEjipitu chakadi woma nindi yayumbuku aIsarela muwuduñu?

◼ himuntu alejeluwu kudi Nzambi nawu yashimuni Yipupu Ikumi muEjipitu hampinji yadikañili mwanta naNzambi walala?

◼ himuntu walombweli aIsarela hampinji yafuminuwu muEjipitu?

◼ himuntu azatishiluwu hakwambula menji aKaluñalwiji Kachinana?

◼ himuntu wayinkeli aIsarela Nshimbi Ikumi jafumini kudi Nzambi?

MOSI wakoñeli yuma yejimiyi niyikwawu. Dichaletesha akwaKristu, aYudeya niaMuzilemu kumulemesha chikupu iwu muntu washinshika.

Chakadi nikujina, Mosi wadiñi kaprofwetu wakoñeli yuma yakutiyisha “mutentu weneni.” (Kuhituluka 34:10-12) Wetejeli kumuzatisha kudi Nzambi muyuma yamaneni. Hela chochu, Mosi wadiña neyi chochitwekala. Kufwana kaprofwetu Elija wamwekeneni hamu naMosi muchimwenu hampinji yazatileñayi Yesu mudimu windi wahamaseki, Mosi wadiñi muntu “watiyaña mutwatiyañetu.” (Yakoba 5:17; Matewu 17:1-9) Mosi wamweni kukala kwakuvulu kutwamonaña ninetu nawa washindili.

Munakukeña kwiluka cheliliyi mwenimu? Shinshikenu yililu yisatu yayiwahi yamwekesheliyi Mosi niyuma yitunateli kudizilaku.

[Tumazu twaheshina]