YUMA YALETAÑA MUZAÑALU MUCHISAKA

Neyi Mwanenu Hichifwayi

CARLO: * “Mwanetu weyala, Angelo wavwalikili chihewu. Yikatu yindi yatuzeyeshaña kumujimba nimuyitoñojoka. Fwikijenu ñovu yakeñekaña hakwakamena mwana wakola, hanu muyibombi kapampa nkulakaji. Mpinji yikwawu maluwi etu ekalaña mukukala.”

MIA: “Chakeñekaña kuwundisha muchima nimpinji yeneni hakwila tumudizishi Angelo yuma yapela. Neyi nazeyi nankashi namuhililaña nfumwami Carlo. Mpinji yikwawu twaditejaña wanyi hansañu nawa twataadekaña.”

Munateli kwanuka ifuku davwalikili mwanenu? Chakadi nikujina, mwakeñeleña chikupu kumwakata nkemba. Hela chochu, anvwali adi neyi Carlo niMia hela chakwila azañalalaña, akamenaña neyi ayileja nawu mwanawu wakata hela nawu hichifwayi.

Komana mukweti mwana wachifwayi? Munateli kujinoka neyi chakwila mukumwakamena chiwahi. Neyi mukweti mwana wachifwayi, bayi mutiya kukalaku. Anvwali adi neyi enu ashinda kukala kwokumu. Shinshikenu kukala kusatu kwavula kumonawu antu kumunateli kumona nimaana ekala muBayibolu chiyanateli kuyikwasha.

KUKALA 1: CHAYIKALILAÑA KWITEJA NENU MWANENU HICHIFWAYI.

Anvwali amavulu aneñaña chikupu neyi eluka nawu mwanawu wakata. Juliana mama yawantu wakuMexico wahosheli nindi: “Ndotolu chanlejeliyi nindi mwanetu Santiago wakata chikatu chazeyashaña woñu nimujimba, namweni neyi hichilota. Naneñeli chikupu.” Amakwawu anateli kutiya neyi chatiyili mama yawantu wakuItaly wejina daVillana. Wahosheli nindi, “Nakeñeleña kwikala namwana hela chakwila ambanda akula dehi neyi ami amonaña kukala. Neyi mwanami weyala hakumona  kukala muloña wavwalikili chihewu, natiyaña kutama.”

Neyi mutiya kutama, ilukenu nenu chuma chimunakutiya dichatiyañawu antu ejima. Nzambi chaleñeliyi antu hakusambila hakeñeleña nindi akateñaku. (Kutachika 1:27, 28) Haleñeli anvwali nawuswa wakushikena dakwiteja yuma yadimwekenañaku. Munjila yikwawu, mwatela kuneña chimweluka nenu mwanenu hichifwayi. Mwakahita mpinji yeneni hakwila nawu mwinjilili chumichi.

Chumanyi chimukwila neyi mutoñojoka nenu yenu mwakojeja mwanenu yekali chifwayi? Anukenu nenu kwosi muntu weluka chikupu yuma yitwaswanaña hakusemuka, yuma yitwadikuma nayu niyuma yikwawu chiyaleñelaña mwana kwikala chifwayi. Mpinji yikwawu munateli kumwinka mwini kwenu muloña. Bayi mwilaña mwenimuku. Chikuwaha neyi muzatilaña hamu namwini kwenu nikusha maana hakwakamena mwanenu.—Mukwakutaŋisha 4:9, 10.

NJILA YIMWATELA KUZATISHA: Ilukenu kukala kukweti mwanenu. Bayibolu yahosha nawu: “Itala kudituña adituñaña namaana; kudikolesha adikoleshaña nakashinshi.”—Yishimu 24:3.

Munateli kudiza yuma yayivulu kudi andotolu nimunyikanda mwekala nsañu yimunateli kukuhwelela. Munateli kwesekeja yuma yakeñekaña hakwiluka chikatu chamwanenu nakudiza idimi dadiha. Hakusambila chakalaña, ilaña munateli kwiluka.

Carlo niMia, atenawu kumatachikilu ehwili nsañu kudi ndotolu wawu niizanvu deluka chikatu chamwanawu. Ahosheli nawu, “Chumichi chatukwashili kwiluka kukala kutukumonaña niyuma yinateli kwilayi muntu wahewuka. Twamweni netu mwanetu nateli kwila yuma yayivulu yalumbuluka muchihandilu. Chumichi chatuzañalesheli hama.”

ESEKENU KUZATISHA IYI NJILA: Shenu maana hayuma yatela kwilayi mwanenu. Fwilenu kuzata nyidimu hamu nachisaka. Neyi kudi chuma chachiwahi chineliyi mwanenu, nyakalenu kumuhameka ninenu nawa zañalalenu.

KUKALA 2: MWAZEYAÑA CHIKUPU NAWA MWATOÑOJOKAÑA NENU KWOSI MUNTU WAKUHANJEKA NINDI.

Munateli kutoñojoka nenu kwakamena mwanenu wakata kwayizeyeshaña chikupu. Jenney, mama yawantu wakuNew Zealand wahosheli nindi, “Chimwahitili yaaka yantesha kufuma hampinji yakatiliyi mwanami chikatu chamumoñololu chakañeshaña muntu kwenda, nomokeleña nawa nadilileña neyi nizata nyidimu yikwawu yahetala.”

Kukala kukwawu kumunateli kumona hikutiya wuudi. Ben wukweti mwana wachifwayi wahosheli nindi, “Antu amavulu eluka wanyi chitwahandaña.” Mwafwilaña kuhanjeka nawantu, ilaña amabwambu jenu amavulu akweti anyana akola. Dichi mwashintajalaña kuyileja chimunakutoñojoka.

NJILA YIMWATELA KUZATISHA: Ilenu antu ayikwashi. Nawa itejenu neyi anakukeña kuyikwasha. Juliana atenawu hakusambila wahosheli nindi: “Mpinji yikwawu ami nanfumwami twatiyaña nsonyi yakulomba wukwashu.” Wabombeleluhu nindi: “Ichi tweluka netu atela kutukwasha kudi antu acheñi. Neyi atukwasha kudi antu twatiyaña kuwaha.” Neyi ibwambu hela ntaña yela nindi yashakami namwanenu hachidika hela hakupompa kwawakwaKristu, itejenu. Chishimu chamuBayibolu chahosha nawu, ‘Ibwambu damuntu wamukeñaña mukwawu mwahita mpinji jejima; himana kwamuntu wavwalikila yakala.’—Yishimu 17:17.

Dihembenuña enu aweni kumujimba. Neyi chochakeñekaña kusha manji mpinji yejima mumotoka yasendaña ayeji kulonda yitwalekuhu kutwala ayeji kuchipatela, mwatela kufuntisha ñovu mumujimba kuhitila mukudya chiwahi, kunyika mujimba nikunooka kulonda mutwalekuhu kumwakamena mwanenu chiwahi. Javier, wukweti mwana wachifwayi wahosheli nindi: “Mwanami hendañaku, dichi namonaña nami natela kudya chiwahi. Kafwampi yami namutwalaña kwejima. Yami nyendu yindi.”

Munateli kuwana ñahi mpinji yakudakamena enu aweni? Anvwali amakwawu adihimpahimpaña hakwakamena mwanawu. Nvwali wamumbanda hela weyala nateli kunooka hela kuzata nyidimu yikwawu. Chinateli kuyikalila ilaña mwatela kwiluka nyidimu yabula kulema yimwatela kuzata nakushiyaku mpinji yakudakamena enu aweni. Mayuri mama yawantu wakuIndia wahosheli nindi, “Mukuhita kwampinji munateli kwinjilila.”

Hoshenu nebwambu imwalemesha. Hela tuhu amabwambu abula mwana wakata anateli kuyikundeja. Mwatela cheñi kulomba kudi Yehova Nzambi. Komana kulomba kunateli kuyikwasha? Yazmin wadiña nawanyana ayedi akatili chikatu chakubula koona chiwahi wahosheli nindi, “Mpinji yikwawu natiyaña kukala chikupu chakwila natiyaña neyi keña nifwi.” Wabombeleluhu nindi: “Nalombaña kudi  Yehova kulonda yankwasha nikunyika ñovu. Chinalomba natiyaña ñovu yakutwalekahu kwakamena anyanami.”—Masamu 145:18.

ESEKENU KUZATISHA IYI NJILA: Shinshikenu cheñi yakudya yimwadiña, mpinji yimwanyikaña mujimba nikuvula kwamaora imwakamaña. Ilukenu chimwatela kwambula mpinji kuyuma yabula kulema kulonda mudakameneña enu aweni kumujimba. Twalekenuhu kuhimpa ndandanda yenu neyi chinatwesheki.

KUKALA 3: MWAMWAKAMENAÑA MWANENU WAKATA KUBADIKA CHIMWAKAMENAÑA ANTU EJIMA AMUCHISAKA.

Yikatu yamwana yinateli kuhimpa yakudya yadyaña chisaka, kutonda maluña kwatela kuya chisaka nawa anvwali anateli kwikala nampinji yantesha yakuhanjeka nawanyana ejima. Ichi chinateli kuleñela anyana amakwawu kutoñojoka nawu ayidiwula. Kubombelahu, anvwali anateli kusha maana chikupu hakuhemba mwanawu wakata chakwila akutiyashanaña wanyi mumaluwi. Lionel, tata yawantu wakuLiberia wahosheli nindi, “Mpinji yikwawu, ñodami wanlejaña nindi wazataña nyidimu yayivulu nkawindi nawa nindi hinamwakamenaña mwanetuku. Namonaña nami wanlemeshaña wanyi, nawa mpinji yikwawu namwakulaña chatama.”

NJILA YIMWATELA KUZATISHA: Hakwila anyanenu ejima eluki chikupu nawu mwayikeña, ilenu yuma yadiluñishañawu. Jenney atenawu hakusambila wahosheli nindi, “Mpinji yikwawu twamwililaña mwanetu wamukulumpi yuma yayiwahi chili kudiila nindi hamu yakudya kulesitilanti yakeñayi.”

Hakwila muhembi maluwi enu, hanjekenu nikulombela hamu namwini kwenu. Aseem, tata yawantu wakuIndia wukweti mwana wakata chinkonya wahosheli nindi: “Hela chakwila twazeyaña chikupu nañodami, twekala nampinji yakushakama, kuhanjeka nikulombela hamu. Mafuku ejima nantetemena twahanjekaña havasi yamuBayibolu henohu anyana kanda ahinduki.” Antu amakwawu adisumbula ahanjekaña nkawawu henohu kanda akaami. Mpanji yimwahanjekaña nikulomba kwakufuma hamuchima kukukolesha maluwi enu hampinji yimunakumona kañalaña. (Yishimu 15:22) Antu amu adisumbula ahosheli nawu, “Mpinji yitwadiluñishili chikupu muwumi wetu himpinji yitwadiña mukukala kwasweja.”

ESEKENU KUZATISHA IYI NJILA: Hamekenu anyanenu amakwawu chayikwashañawu hakwakamena mwanenu wakata. Lejenu mwini kwenu nianyanenu nenu mwayikeña nawa mwayilemesha.

KUHWELELENU NENU YUMA YIKAWAHA

Bayibolu yakana nawu Nzambi keña yafumishuhu yikatu niwufwayi wakabishaña atwansi niakulumpi. (Chimwekeshu 21:3, 4) Hanodu ifuku, “Mwenimbu hakahosha nindi, Ami nakataku.” *—Isaya 33:24.

Chayinu mpinji munateli kuzata chiwahi hela chakwila mukweti mwana wachifwayi. Carlo niMia atenawu hakusambila ahosheli nawu, “Bayi muzeya neyi munamoni nenu yuma yejima yinakwenda chiwahi wanyi. Shinshikenu hayuma yayiwahi yelañayi mwanenu muloña yayivulu.”

[Tumazu twaheshina]

DIHULENU NENU . . .

▪ Chumanyi chinelaña kumujimba nimuyitoñojoka kulonda wubwambu wami naYehova wikali wakola?

▪ Ifukwinyi dinahamekeli anyanami amakwawu hawukwashu wankwashañawu?

[Mwevulu wudi hefu 12]

Mwekeshenu nenu mwakeña anyanenu ejima