BAYIBOLU YAHIMPAÑA YIHANDILU YAWANTU

“Yililu yami yadiña yawukatu”

Washimwini Esa Leinonen

CHAAKA CHAKUVWALIKA: 1960

ITUÑA KWAFUMAYI: FINLAND

KUHANDA KWINDI: MUKWAKWIMBA TUMINA TWAHEAVY-METAL

CHIHANDILU CHAMI CHAKUNYIMA: Nakulilili muchituñilu mwekala antu abula kuheta mumusumba waTurku mwashikenaña jimbopolu. Tata wadiña mukwakwasa nkonyi waya mpuhu, nawa twasileña nkonyi namwanyikami. Hampinji yinadiña hashikola, neyi anvuloka kakavulu twazuñileña. Hinachidiña kampululu nekalili mwizanvu dawayiluwañimbi, danleñeleli kwikala mukwamadombu. Natachikili kwimba tumina twatenañawu nawu heavy-metal nawa nakeñeleña kuya mpuhu.

Nalandili jiñoma, nituña nizanvu dawakwakwimba nawa yami nadiña nakwimba tumina twatuvulu munidi izanvu. Natiyileña kuwaha kukiloka hachinañamu. Chineli izanvu detu dadiña damadombu nawa twamwekeneña neyi ayiluwañimbi, twatachikili kutiyakana. Twatachikili kwimbila hadi antu amavulu, twakwatili tumina twantesha nawa twakukumishaku atukeñeli kudi antu. Hakukuma kwayaaka yamuma 1980 twayili kuUnited States kulonda tutiyakeshi izanvu detu. Twembililili mafuku antesha muNew York nimuLos Angeles nawa twatiyañeni nawankuluñaña atalaña hansañu yatumina henohu kanda tufunti kuFinland.

Hela chakwila nadiluñishileña mwizanvu dawakwakwimba, nakeñeleña kwikala nachihandilu chachiwahi muwumi wami. Yililu yatama yawakwakwimba yanneñesheleña nawa natiyileña kutama chinelileña yuma neyi kansi. Natoñojokeleña nami nadiña muntu watama nawa natiyileña woma wakuha mukesi kahelu. Nafwilileña kuwana ñakwilu munyikanda yashiyashana yawakakwitiya, nawa nalombeleña chikupu nami Nzambi yankwashi hela chakwila natoñojokeleña nami hinateli kumuzañaleshaku.

BAYIBOLU CHIYAHIMPILI CHIHANDILU CHAMI: Nazatileña kuposita ofesi yamwiluña detu. Ifuku dimu nelukili nami mukwetu mutwazatilileña wadiña Chinsahu chaYehova. Namupopeli malwihu. Yuma yahosheleñayi yashindamena muNyikanda yajila yantiyishili kuwaha nawa netejeli kudiza Bayibolu nindi. Chimwahitili nyilungu kufuma hinatachikili kudiza Bayibolu, izanvu detu aditejeli kukwata tumina hadaha nikwidisha  tumina muUnited States. Natoñojokeli nami chumichi hichamwekanaña kayeduku.

Namulejeli Chinsahu wandizishileña Bayibolu nami nakeñeleña chikupu kwidisha tumina kakukumishaku, kufumahu nukuzatishaña chikupu yishina yamuBayibolu muchihandilu chami. Hanlejeli chuma chatoñojokeleñayuku; wakuminini dakunleja nindi nitañi mazu aYesu asonekawu haMatewu 6:24. Iyi vasi yahosha nawu: “Kwosi muntu natweshi kukalakela anyanta ayeduku.” Nahayamini chinelukili mwatalisha mazu aYesu. Ilaña chimwahitili mafuku antesha, ntañishi yami waBayibolu diyi wahayamini. Namulejeli nami nafumi mwizanvu dawakwakwimba muloña inakukeña kumulondela Yesu.

Bayibolu yadiña neyi chibanjilu chamwekesheleña yiluwa yami. (Yakoba 1:22-25) Namweni nami yililu yami yadiña yawukatu: Nadiña wadivinya, nawa nakeñeleña kwila yuma yayivulu hama. Nadiña nakutukana, kuzuña, kunwa makanya nikusheta walwa. Chinelukili nami hinadiña nakwovwahila yishina yamuBayibolu muchihandilu chamuku, natiyili kutama nankashi. Hela chakwila chankalilili, nafuukwiluhu kuhimpa chihandilu chami.—Aefwesesa 4:22-24.

Sweje-e hakusambila, natiyileña kutama chikupu hayililu yami yatama yinakoñeleña kunyima. Ilaña Chinsahu wandizishileña Bayibolu wankwashili chikupu. Wanlejeli chahosha Bayibolu haIsaya 1:18 nawu: “Hela neyi nshidi jenu jichinana, jakatooka to-o neyi mpeza.” Iyi vasi nimavasi amakwawu amuBayibolu anshinjilili chikupu nawa nelukili nami Tata yetu wamwiwulu wukweti luwi nawa wakeñaña kukuswisha yilonda yawantu abalumukaña munyichima hanyiloña yawu.

Chinamwilukili Yehova nikumukeña, nakeñeleña kudihana kudi yena. (Masamu 40:8) Napapatisheweli mu 1992 hakupompa kwanyunza kwawaYinsahu jaYehova kwadiña muSt. Petersburg, muRussia.

CHINAHETELUMU: Nakwati amabwambu amavulu amawahi hakachi kawakwakudifukula aYehova. Mumpinji mumpinji twahumañanaña nakwimba tumina twatuwahi nikudiluñisha ichi chawana chatwinkayi Nzambi. (Yakoba 1:17) Nkisu yasweja kuwaha yinatambwili hiñodami inakeña, Kristina. Twazatilaña hamu yuma yayivulu nañodami, tunadiluñishi nawa tunamoni kukala hamu nawa namulejaña yuma yejima yinatoñojokaña.

Neyi nekalili Chinsahu chaYehova wanyi, chiña nafwa dehi. Kunyima nelileña nifuma mukukala kumu nakwiñila mukukala kukwawu. Chayinu mpinji nidi namuzañalu nankashi muchihandilu chami, nawa natiyaña nami nikweti yuma yejima.

[Mazu aKusakilila]

© Kaj Ewart

[Mazu ekoku adi hefu 9]

“Tata yetu wamwiwulu wukweti luwi nawa wakeñaña kukuswisha yilonda yawantu abalumukaña munyichima hanyiloña yawu”