MUTU WUDI HEFU DATACHI: KUSAÑUKA KWAYESU CHIKWALEMENA NICHIMUKAHETELAMU

Kusañuka kwaYesu Komana Kwamwekeni?

HERODOTUS, mukwakusoneka nsañu yakunyaka wakuGreece wadiñaku yaaka 2,500 yinahituhu, washimwini nsañu yawaEjipitu amumafuku indi. Wasonekeli nindi: “Hayawija yawantu aheta elileña neyi anamanishi dehi kudya, muntu wahitishileñamu mukishi wakusoña nawa wakupenta chiwahi neyi chochekalayi owu muntu nawa amushileña mumbokoshi, wadiña wamulehi mita yimu hela chikuku chamita. Wayilejeleña ejima apompeleña nindi, ‘Nwenu nikuzañalala, muloña neyi munafwi mwakekala neyi iwu mukishi.’”

Bayi neyi aEjipitu nkawawu diwu adiña nayitoñojoka yamuchidiwu kutalisha hawumi nikufwaku. Makonu nhoshelu yakwila nawu “Dyaku, nwaku nawa zañalalaku” yatanda kwejima. Neyi wumi wakumaña chafwayi muntu, muloñadi chitwatelela kubula kudiluñisha henohu tuchidi amomi? Muloñadi wutwatelela kuzata nañovu hakwila yuma yaloña? Neyi wumi wakumaña chafwayi muntu, chachiwahi kudiluñisha wumi makonu. Kapostolu Pawulu wahosheli nsañu yadifwanaku. Walumbulwili yililu yawantu abula kukuhwelela mukusañuka nindi: “Neyi afu hiyakuyisañulaku? Komana tukumini dakudya nakunwa, muloña kumadiki tukufwa.”—1 Akorinda 15:32.

Hela chochu, Pawulu hakuhweleleli nindi afu akayivulamena haya nyakaku. Welukili chikupu nindi afu akahanda cheñi, akekala nakuchiñeja kwakushakama haya nyaka. Kuchiñeja kwenakuna kwashindameneni hachuma chasweja kulema, nsañu yalala yelukiliyi nindi yakahimpa wanyi, kusañuka * kwaKristu Yesu. Kafwampi, kusañuka kwaYesu hichuma chabadika kulema chakolesheli chikuhwelelu chawatumbanji akusambila.

Hanu dinu, kusañuka kwaYesu kwalumbulukadi kudi etu? Tweluka ñahi netu chalala Yesu amusañwili? Tutalenu Pawulu chalumbulwiliyi iyi nsañu  hampinji yayisonekeleliyi akwaKristu adiña muKorinda.

CHUMANYI CHADI KUMWEKANA NEYI KRISTU HIYAMUSAÑWILUKU?

AkwaKristu amakwawu amuKorinda wakushankulu elukili iyi nsañu chiwahi wanyi, nawa amakwawu hiyakuhweleleli nsañu yakusañukaku. Mumukanda windi watachi wayisonekeleliyi akwaKristu amuKorinda, kapostolu washimwini yuma yadi kufumamu neyi kusañuka hikwadiña kwalalaku. Wasonekeli nindi: ‘Dichi neyi afu hiyakayisañulaku, komana niKristu hiyamusañwiluku. Neyi Kristu hiyamusañwiluku, komana kushimuna kwetu kunekali dehi kwamukunkulwayi, nikukuhwelela kwetu kunekali dehi kwamukunkulwayi nawa. . . . Tunekali dehi ayinsahu akutwambila Nzambi. . . . Kukuhwelela kwenu kunekali dehi kwamukunkulwayi, muchidi munshidi jenu, niantu anakami dehi tulu mudi Kristu ananoñi dehi kwawu.’—1 Akorinda 15:13-18.

Pawulu watachikili namazu atela kubula kutaadikawu antu nindi: Neyi afu hiyakayisañulaku, dikwila nawu Kristu wafwili hiyamusañwili mudi afuku. Chumanyi chadi kumwekana neyi Kristu hiyamusañwiluku? Dikwila nawu nsañu yayiwahi yitwashimwinaña yadi kwikala yakutwamba chikupu. Kafwampi kusañuka kwaKristu hichuma chalema hashindameneni chikuhwelelu chawakwaKristu, chendeleleña hamu nantañishilu yikwawu yalema yamuBayibolu yahosha hachiyuulu chaNzambi, ijina dindi, Wanta windi niwamwinu wetu. Neyi Yesu amusañwili wanyi, nsañu yashimwinineñayi Pawulu niapostolu amakwawu yadi kwikala yamukunkulwayi.

Kwadi kwikala yuma yikwawu yadi kulondelahu. Neyi Kristu hiyamusañwili mudi afuku, chikuhwelelu chawakwaKristu chadi kwikala chamukunkulwayi, chashindamena hayuma yakutwamba. Kubombelahu, Pawulu niamakwawu adi kushimuna wunsahu wakutwamba bayi neyi hakusañuka kwaYesu hohuku, ilaña nihadi muntu ashimwineñawu nawu wamusañwili Yesu, Yehova Nzambi. Cheñi nawa wunsahu wakwila nawu Kristu “wafwili kukoola nyiloña yetu” wadi kwikala wakutwamba, muloña neyi Chamwinu yamweni amupulwishili wanyi mukufwa, hadi kutwesha kwamwina akwawuku. (1 Akorinda 15:3) Chumichi chadi kulumbulula nawu akwaKristu afwili kukola yuma yakuhweleleluwu, afwili nachikuhwelelu chakutwamba chakwila nawu akayisañula.

Pawulu wakunkulwili nindi: “Neyi tunakuhweleli Kristu muwumi hohu bweñi, komana yetu tunabadiki antu ejima wushona.” (1 Akorinda 15:19) Kufwana akwaKristu amakwawu, Pawulu wakabakeni, amuyandishili, womikili kukala kwakuvulu nawa akeñeleña kumujaha muloña wakuhweleleli mukusañuka niyuma yejima yaletesheli kusañuka kwikali kwalala. Chadi kwikala chamukunkulwayi neyi kusañuka kwadiña kwakutwamba.

MULOÑA WUMWATELA KUKUHWELELA

Pawulu watoñojokeleña wanyi nindi yuma yakuhweleleluwu akwaKristu yadiña yakutwamba. Welukili nindi Yesu amusañwili mudi afu, nawa washimwini wunsahu kudi Akorinda nindi, ‘Kristu wafwili kukoola nshidi jetu, mwomwaya Nyikanda yajila; nawu, amujiikili, amusañwili mudi afu hefuku damuchisatu, mwomwaya Nyikanda yajila; nawu, wamwekeni kudi Petulu, kulondelahu nikudi ikumi nayedi.’ * Pawulu wabombeleluhu nindi: ‘Kulondelahu hakumwekana kudi ana kwetu apompeli hamu, kuyichinda abadikili nkulakaji jitanu; amavulu achidi kwoku nilelu, amakwawu anakami dehi tulu twakufwa. Kulondelahu hakumwekana kudi Yakoba, kulondelahu hakumwekana kudi apostolu ejima.  Nkumininaku hakumwekana nikudami nawa.’—1 Akorinda 15:3-8.

Pawulu wakuhweleleli chikupu hakuhosha nindi Kristu wafwili kukoola nshidi jetu, amujiikili nawa amusañwili. Chumanyi chamuleñeleli Pawulu kukuhwelela chikupu? Chuma chimu chamukwashili hiwunsahu wawayinsahu akumona namesu amavulu. Yesu asañwiluwu wamwekeni kudantu (kushilahu niPawulu), kumazanvu anyanya, nikwizaza dawantu 500, chakadi nikujina amavulu ajinokeleña chatiyiluwu nawu Yesu anamusañuli. (Luka 24:1-11) Ayinsahu akumona namesu amavulu achidiña amomi mumafuku aPawulu nawa muntu wudi wejima wateleleli kuyihula kulonda ayileji nawu amumweni Yesu. (1 Akorinda 15:6) Antu anateli kukaana wunsahu wawayinsahu ayedi hela wumu, ilaña kwosi wunateli kukaana wunsahu wawantu 500 amweni namesuku.

Ilukenu cheñi nenu Pawulu wahosheli kapampa kayedi nindi kufwa, kujiika nikusañuka kwaYesu kwadiñi ‘mwomwaya Nyikanda yajila.’ Yumiyi yamwekesheli nawu wuprofwetu wekala muNyikanda yachiHeberu yahosha hadi Mesiya washikijeweli, nawa wamwekesheleña nawu mwalala Yesu wadiña Mesiya akaninuwu.

Hela chakwila kwekala wunsahu wawayinsahu amweni namesu niNyikanda yajila, kwadiña amakwawu ajinokeleña, nimakonu kudi antu ajinokaña nawu Yesu amusañwili wanyi. Amakwawu ahoshaña nawu mujimba windi awiyili kudi atumbanji twindi ahosheleña nawu hiyayinsahu amweni nawu anamusañuli. Hela chochu, atumbanji hiyadiña nañovu yakukañesha amashidika awaRoma ahembeleña kwijamuku. Amakwawu ahoshaña nawu nyijimu diyamwekeneña nawu Yesu anamusañuli. Iyi nsañu yaditadikishaña hiwunsahu walala wamwekeshaña nawu Yesu wamwekeni kudi antu amavulu hampinji yashiyashana. Komana tunateli kwiteja netu mujimu nateli kuyiloñeshela antu inshi nikuyinka neyi cheliliyi Yesu kuÑaliliya hampinji yamusañwiluwu? (Yowanu  21:9-14) Komana mujimu wunakumwekana neyi muntu nateli kutambika antu kulonda amukwati?—Luka 24:36-39.

Ilaña amakwawu ahoshaña nawu atumbanji twaYesu atwambili chikupu nawu anamusañuli. Neyi atwambili adi kuhetelamu mwodi? Atumbanji adiñi nakuyikabisha, kuyiseha nikuyijaha muloña wakushimwina nsañu yakusañuka. Adi kushiladi wumi wawu hakatoña nakushimuna nsañu yakutwamba? Kubombelahu, asambilili kushimuna wunsahu wawu muYerusalema, hamesu awayilumbu jawu akwatileña antu adi ejima amweneñawu nawu analuwañeshi kulonda ayifwishi namuloña.

Kusañuka hichuma chayileñeleli atumbanji kwikala nawulobu wakushimwina hadi Mwanta wawu hela chakwila ayikabishileña chikupu. Kusañuka kwekalili chuma chalema hachikuhwelelu chawakwaKristu. AkwaKristu akusambila hiyashileña wumi wawu hakatoña hakushimuna wunsahu hadi ntañishi wamaana ajahiluwuku. Ilaña ashili wumi wawu hakatoña hakushimuna nsañu yakusañuka kwaYesu muloña kwamwekesheli nawu wadiña Kristu, Mwana kaNzambi, wañovu, muntu wayikwashileña nikuyilombola. Kusañuka kwindi kwamwekesheleña nawu niwena akayisañula mudi afu. Mwamweni, neyi Yesu amusañwili wanyi, kachi chipompelu chawakwaKristu kwosi. Neyi Yesu amusañwili wanyi, chiña hitwatiyahu ninsañu yinduku.

Indi kusañuka kwaKristu kwalema munjilanyi kudi etu makonu?

[Tumazu twaheshina]

[Mazu ekoku adi hefu 4]

‘Hakumwekana kudi ana kwetu apompeli hamu, . . . Kulondelahu hakumwekana kudi Yakoba, kulondelahu hakumwekana kudi apostolu ejima. Nkumininaku hakumwekana nikudami nawa.’—1 Akorinda 15:6-8

[Chikasha chidi hefu 6]

MALWIHU AVULA KWIHULAWU

Anyi akasañulawu?

“Kwamba kekala kusañuka kwawaloña nikwawabula kuloña.” (Yililu 24:15) Hakachi kawantu aloña hakekala amayala niambanda ashinshika adi neyi Nowa, Abarahama, niSara. Antu abula kuloña hiyantu akañenyi kwovwahila nshimbi jaNzambi muloña hiyadiña nakukooleka kwakudiza nikujovwahilaku.

Indi antu akasañulawu akekala kudihi?

Antu amakwawu akayisañwila kuwumi wamwiwulu neyi yileñeleña yakuspiritu nawa akayuulaña naKristu hamaseki neyi anyanta niatupristu. (Chimwekeshu 5:9, 10) Ilaña amavulu akayisañwila kuwumi hamaseki. Akadiluñisha wumi wahaya nyaka muparadisa hamaseki.—Luka 23:39-43.

Indi Afu akayisañula mpinjinyi?

Kumpinji yakumbidi neyi antu atama anayifumishuhu dehi hamaseki. Bayibolu yashimuna nawu antu amavulu chikupu akayisañula muchiyuulu chaYesu chayaaka ikombakaji, haniyi mpinji iseki akadibalumuna kwikala paradisa.—Chimwekeshu 20:6.

Komana tushidikilu twaIsita twakundama kukusañuka?

Tushidikilu twaIsita twakusha anyana kakachinchi, mateta awulombu, makandulu ninkenu twejima twafuma kukwitiya kwawusenji neyi mwatalisha ijina daIsita. Yuma yejimiyi hiyakundama kukusañuka kwaYesu neyi chashimunañawu nawu yemeneñaku Isitaku. Komana chalema kwiluka yumiyi? Eña. Izu daNzambi datulejaña nawu tufumi mukwitiya kwakutwamba kulonda ‘tudifukuleña kudi Tata muspiritu nimuwalala.’—Yowanu 4:23; 2 Akorinda 6:17.

Neyi Yesu hiNzambi, neyi chatañishaña machechi amakwawu, hinyi wamusañwili Yesu?

Bayi neyi Yesu diyi Nzambi wukweti ijina daYehovaku, ilaña hiMwana kaNzambi. Yehova wamusañwili Yesu mudi afu. (Aroma 10:9) Muntu wumu wadiza chikupu wahosheli nindi: “Muntu wudi wejima hela tuhu Kristu kwila yadisañula yomweni nehi.” *

[Tumazu twaheshina]