DIZISHENU ANYANENU

Petulu niAnaniya Atwambili Chumanyi Chitunateli Kudizilaku?

Neyi chimweluka, kutwamba hikushimuna nsañu yimuneluki nenu yalala wanyi. Komana mwatwambahu dehi?— * Niakulumpi amakwawu amukeña Nzambi atwambahu dehi. Hadaha welukahu muntu asonekawu muBayibolu watwambili. Ijina dindi diyi Petulu, kapostolu wahadi apostolu 12 aYesu. Tiyaku nsañu yinakushimuna chuma chamuleñeleli kutwamba.

Chamukwatiluwu Yesu, amutwalili kwitala dakapristu muneni. Mwadiña mukachi kawufuku. Petulu wenjili hanzi yalubanza lwetala dakapristu chakadi kumwiluka. Henohu nakwota kesi, ñamba yakapristu muneni wamumbanda wamwiñijili Petulu mukachi wamwilukili. Wahosheli nindi, ‘Eyi nawa wadiñi naniwu Yesu.’ Hamuloña wawoma, Petulu wahosheli nindi hadiña ninduku.

Bayibolu yahoshaña nawu chimwahitili mpinji ‘chañadima mukwawu wamumweni.’ Wahosheli nindi: ‘Iwu muntu niyena wadiñi naYesu.’ Petulu wadikalili cheñi. Chihanahiti kapinji kantesha, amakwawu amuwanini Petulu nakumwila nawu: “Chalala yeyi mwinawu.”

Petulu watiyili woma. Watwambili kapampa kamuchisatu nindi: “Yeniwu muntu ami kwami hinamwilukaku.” Ikombu etiyila nikwitiyila. Yesu wamutalili Petulu, nawa Petulu wanukili nindi mwahitili hohu maora antesha kufuma hamulejeliyi Yesu nindi: ‘Eyi wakadikala kasatu hakela ikombu kanda etiyili.’ Petulu wadilili nankashi. Waneñeli.

Komana chuma chamuchidiwu chinateli kukumwekena?— Hadaha kushikola wunateli kutiya atudizi anakuhosha hadi aYinsahu jaYehova. Wumu nindi, “Abuzwilaña mpandela wanyi.” Mukwawu nindi, “Azuñilaña ituña dawu wanyi.” Mukwawu niyena nindi, “HiyakwaKristu wanyi, muloña hiyanakanaña Krisimansuku.” Kufumahu wumu hakukwihula nindi, “Komana eyi wudi Chinsahu chaYehova?” Wukuhosha neyidi?—

 Henohu kanda wumoni chuma chamuchidiwu, watela kudiloñesha kulonda waakuli chiwahi. Petulu wadiloñesheli wanyi. Chamweniyi kukala watwambili. Ilaña waneñeli hachuma cheliliyi, nawa Nzambi wamwanakeneni.

Ananiya wadiña kambanji mukwawu waYesu wakusambila niyena watwambili. Ilaña Nzambi hamwanakeneni chili iñodindi Safwiraku. Safwira watiyañeni nanfumwindi nawu atwambi. Tutalenu Nzambi chabuliliyi kuyanakena Ananiya naSafwira.

Chimwahitili mafuku ikumi kufuma hampinji yashiliyi Yesu apostolu indi nakufunta kudi Nzambi mwiwulu, atumbanji akushika ku 3,000 apapatisheweli muYerusalema. Amavulu afumini kumatuña akwakulehi nakwanakana Chawija chaPentekosta nawa chekaliluwu atumbanji twaYesu, akeñeleña kushakama mafuku antesha kulonda adiziluhu yuma yayivulu hayuma yayiha yakuhweleleluwu. Dichi atumbanji twaYesu amakwawu azatishileña mali awu hakuyakamena.

Ananiya niñodindi alandishili iheta dawu kulonda awanumu mali akukwasha nachu antu amaha apapatisheweli. Ananiya chatwaliliyi mali kudi apostolu, wahosheli nindi diwu mali ejima. Bayi neyi diwu mali ejimaku. Waswekeli mali amakwawu. Nzambi wamulejeli Petulu iyi nsañu, dichi Petulu wamwilili Ananiya nindi: “Hiwunatwambi kudi antuku, wunatwambi kudi Nzambi.” Hohenohu Ananiya yadimbuka niheseki, yofwa nikufwa. Chimwahitili maora asatu, iñodindi niyena wenjili. Welukili wanyi chuma chamumwekeneneni nfumwindi, niyena watwambili nawa wadimbukili nakufwa.

Twadizilañaku chuma chalema nankashi: Kushimuna walala kwalema. Eñañi, wejima wetu twatela kudizila kuniyi nsañu. Ilaña wejima wetu twakoñaña yiluwa, sweje-e neyi tudi atwansi. Komana hiwazañalalañaku hakwiluka neyi Yehova wakukeña nawa nateli kukwanakena neyi chamwanakenenuwu Petulu?— Ilaña ilukenu nenu twatela kushimuna mwalala. Nawa neyi chakwila tukoña chiluwa cheneni chakutwamba, twatela kulomba nikumulembelela Nzambi kulonda yatwanakeni. Hadaha dicheliliyi Petulu nawa amwanakeneni. Neyi tuzata nañovu kulonda tubuli kutwamba, Nzambi wukutwanakena.

Tañenu muBayibolu yenu

Matewu 26:69-75

Yililu 2:38-42; 4:32-37; 5:1-11

[Tumazu twaheshina]