BAYIBOLU YAHIMPAÑA YIHANDILU YAWANTU

“Nakeñeleña kwikala kapristu”

Washimwini Roberto Pacheco

CHAAKA CHAKUVWALIKA: 1957

ITUÑA KWAFUMAYI: MEXICO

KUHANDA KWINDI: WADIZILEÑA WUPRISTU; MUKWAMADOMBU

CHIHANDILU CHAMI CHAKUNYIMA: Navwalikilili mumbaka yanyanya yamuTexcoco. Hayina mpinji, nyikwakwa yayivulu yadiña yatama nawa yakadi taala. Twavulileña kumona antu amunyikala yamukamwihi aleteleña yuma yakulandisha hayimbulu yawu. Twadiña atuzweñi muchisaka chetu nawa twadiña anyana atanu nawana, yami nadiña wamuchitanu nayedi. Atata aloñesheleña guaraches (nkwabilu) hakuwana mali akukwashilamu chisaka. Ilaña afwili henohu nidi nayaaka yitanu nayiyedi. Kufuma hayina mpinji, amama ayandileña hakwila nawu awani yakudya yachisaka.

Nkaaka weyala wembileña chisanji chatenañawu nawu violin nawa diyi walombweleña izanvu dakuluka yitembi hakwimba tumina twawakwakwitiya. Antaña jami amavulu embileña chisanji. Mama wembileña mukwaya nawa mandumi wadiña mukwakwimba nawa wembileña chisanji chapiyano. Twadiña aKatolika adihana chikupu nawa nadiña nakumukwashaku kapristu hampinji yakupompa nawa nakeñeleña kwikala kamishonali wawaKatolika. Natiyileña kuwaha kutala nyivwimbimbi yakalati. Chinasweja kutala nyivwimbimbi yeniyi, naswejeleña kukeña madombu.

Natachikili kudiza hashikola yakudiza wupristu muPuebla. Chikonkwanyi chami chadiña chakwikala kapristu wawaKatolika. Muchaaka chakukumishaku kudiza, yuma yinamweneña muChaachi yaKatolika yanneñesheleña. Sisita wamuKatolika watachikili kunkenkamina. Nashindili iku kweseka, ilaña chumichi chanleñeleli kukeña kusumbula. Kubombelahu, namweni neyi atupristu amavulu elileña  yuma yawunfwikiji muchihandilu chawu. Nkumininaku, hinakeñeleña cheñi kwikala kapristuku.

Nafuukwiluhu kudiza tumina haNational Conservatory of Music mumusumba waMexico. Chinamanishili kudiza, nasumbwili nawa twavweli anyana awana. Nembileña tumina hampinji yaKupompa muChaachi yaKatolika kulonda niwaneñamu mali akukwasha chisaka.

Kufuma tuhu hitwadisumbwili, hitwatiyashanineña mumaluwi etuku. Twazuñileña nañodami muloña twadiña nakuditiyila mukawu. Hakusambila twabobweleña hohu, kutwala muna twatachikili kuzuña. Nkumininaku, chimwahitili yaaka 13 kufuma hitwadisumbwili, twafuukwiluhu kwambuka nikudiseña.

BAYIBOLU CHIYAHIMPILI CHIHANDILU CHAMI: Nadimweni nawaYinsahu jaYehova katachi henohu kanda nambuki nañodami. A Yinsahu ayedi enjili kwitala nawa anlejeli nawu nihanjeki nawu nsañu yamuBayibolu. Natoñojokeleña nami nelukili nsañu yayivulu yamukwitiya, dichi nafwilileña nami niyikonkololi nami atwambaña. Nayihwili malwihu akala inamweneña nami hiyakweti ñakwiluku. Ilaña nahayamini hakumona neyi añakwileña chachiwahi kuzatisha Bayibolu. Namweni nami hinelukili nsañu yayivulu yamuBayiboluku. Hela chochu, iñodami wayiheleli chikupu aYinsahu nawa ami nadiña nampinji wanyi, dichi alekeli kutwendela.

Chimwahitili yaaka yitanu, henohu inakushakama namumbanda mukwawu wejina daElvira, nadimweni cheñi nawaYinsahu jaYehova. Elvira hadiña nakuyikañesha aYinsahuku, dichi chumichi chanleñeleleli kudiza Bayibolu mpinji yejima. Hela chochu, mwahitili yaaka yayivulu hakwila nawu nihimpi chihandilu chami.

Nelukili nami neyi inakukeña kudifukula kudi Yehova namuchima wami wejima, nateleleli kuhimpa chikupu. Chatachi, nateleleli kuleka mudimu wakwimba haKupompa muChaachi yaKatolika, nawa chumichi chayili mukwila nawu nikeñi mudimu wukwawu. (Chimwekeshu 18:4) Nateleleli cheñi kusonekesha maluwi ami naElvira.

Hela chochu, chankalilili nankashi kuhimpa yililu yami yakuzuwa swayi. Mavasi ayedi amuBayibolu ankwashili nankashi: Masamu 11:5, ahosha nawu Yehova wahela madombu, nawa mukanda wa 1 Petulu 3:7, wandizishili nawu neyi inakukeña nami Yehova yatiyeña kulomba kwami, natela kumulemesha ñodami. Chinatoñojokeleña chikupu hanawa mavasi nikulomba kudi Yehova kulonda yankwashi, natachikili kuwundisha ndulu chovu-chovu.

CHINAHETELUMU: Chayinu mpinji nidi namuzañalu muchisaka. Inakuzata nañovu kulonda nitiyañaneña nawanyanami inavweli namumbanda watachi nikukwasha chisaka chami chinidi nachu kwitala kulonda twikali nachikuhwelelu chakola.

Chinadiña kansi, nakeñeleña kwikala kapristu nikukwasha antu. Ichi neluka nami nidi namuzañalu muchihandilu. Nakwashaña chisaka chami munsañu yamali kuhitila mukutañisha antu tumina. Namuhamekaña Yehova hakwikala wadiwunjika nanami, hakunyika kukooleka kwakuhimpa nakwikala muntu wamuwahi.

[Mazu ekoku adi hefu 8]

Hakwikala mukwakumukwasha kapristu hakupompa, nakeñeleña kwikala kamishonali wawaKatolika, ilaña natiyileña kuwaha kutala nyivwimbimbi yakalati nawa nekalili mukwamadombu

[Mazu ekoku adi hefu 9]

Bayibolu yandizishili nawu neyi inakukeña nami Yehova yatiyeña kulomba kwami, natela kumulemesha ñodami