Indi Chaambu Chikamana Mpinjinyi?

NLOMBOLI watalileña hawuswa wawantu wakuAmerica wejina daMartin Luther King, Jr. wahosheli awa mazu muchihosha chindi chaya mpuhu yaaka 50 yinahituhu haAugust 28, 1963, nindi, “Nikweti chimwenu.” King walumbulwili chimwenu chindi hela chuma chachiñejeleñayi kuzatisha mazu ekoku nindi ifuku dimu antu akadiluñisha chihandilu chakadi chaambu chekowa. Hela chakwila yuma yafwilileñayi wayihosheli kwizanvu dawantu amuUnited States, mazu ahosheliyi ayilemesha chikupu kudi antu mumatuña amavulu.

HaNovember 20, 1963, henohu munahiti dehi tukweji tusatu kufuma hampinji yahosheliyi King, matuña akubadika ha 100 atachikili kulondela mwahosheluwu akamutayi waUnited Nations Declaration on the Elimination of All Forms of Racial Discrimination. Hayaaka yikwawu yalondeleluhu atachikili cheñi kulondela yuma yikwawu yahosheluwu mukaayi kejima. Chili azata nañovu hakwila mwenimu tunateli kwihula netu, Chumanyi chafumamu?

HaMarch 21, 2012, Secretary-General wamutayi waU.N. Ban Ki-moon wahosheli nindi: “Kudi yitiyañenu yayivulu niyozelu kushilahu niyuma yalema yahanjekañawu mukaayi kejima kulonda akañeshi chaambu chekowa, kuhela antu akumatuña acheñi niyuma yikwawu yakundama kuchaambu. Hela chochu, antu amavulu mukaayi kejima anatwalekuhu kuyanda hamuloña wachaambu chekowa.”

Chili mumatuña munazatuwu nañovu kulonda akañeshi chaambu chekowa niyuma yikwawu yakundamaku, tunateli kwihula netu: Komana iyi yuma yazatawu yafumishahu chaambu chekala munyichima yawantu tahindi adizisha hohu antu kulonda abuleña kumwekesha chaambu? Amakwawu akuhwelela nawu iyi yuma yazatawu yayikwashaña hohu kukañesha chaambu, ilaña hiyinateli kumanisha yaaku yakukabisha antuku. Muloñanyi? Muloña muntu neyi nakukabisha mukwawu anateli kumumona nawa akumubabesha kudi akwanshimbi, ilaña chaambu chakundama kuyitoñojoka yamukachi kamuchima hiyatela kuyilukaku.

Dichi neyi antu anakukeña kufumishahu chaambu bayi akañesha hohu yuma yaleñelaña kukabishanaku, ilaña atela kuhimpa cheñi yitoñojoka yamuntu nichamonañayi antu acheñi. Komana chumichi chinateli kuzatika? Neyi chinateli kuzatika, chikuzatika munjilanyi? Tushinshikenu yuma yamwekeni yinateli kutukwasha kwiluka netu chalala antu anateli kuhimpa nawa tukushinshika cheñi chuma chinateli kuyikwasha antu kuhimpa.

BAYIBOLU YAYIKWASHILI KUBULA KWIKALA NACHAAMBU

Linda: Navwalikilili kuSouth Africa. Namweneña antu eyila akuSouth Africa nami amukunkulwayi, ataña wanyi, ayipwapwoki nawa nami hiyañamba jawanyitooka hohu. Nadiña nachaambu nawa nelukili wanyi. Hela chochu, natachikili kuhimpa iyi yililu hampinji yinatachikili kudiza Bayibolu. Nadizili nami ‘Nzambi haakamaña antu kumesuku’ nawa yuma yekala mumuchima diyalema kubadika ikowa hela idimi damuntu. (Yililu 10:34, 35; Yishimu 17:3) Nsona yaAfwilipi 2:3 yankwashili kwiluka nami neyi nimonaña muntu wejima nami wambadika, hinukwikala nachaambuku. Kuzatisha yishina yamuBayibolu yamuchidiwu kwankwasha kusha maana hadi amakwawu hichikweti muloña wekowa dawuku. Ichi hinidi nachaambuku.

 Michael: Nakulilili mwiluña mwavulili anyitooka akuAustralia, nawa nadiña nachaambu nawantu akuAsia, sweje-e dinu aChinese. Neyi inakwendesha motoka chinamona muntu wunakumwekana neyi wakuAsia, nashinkwileña njanena yamotoka nakuhosha mazu akasawuntu adi neyi “Yaku kwituña denu kaAsia.” Chinatachikili kudiza Bayibolu, nelukili Nzambi chamonañayi antu. Wayikeña hichikweti muloña nakwafumawu hela chamwekanañawuku. Kukeña kweniku kwanshikili hamuchima nawa nalekeli kuhela antu akuAsia. Chanhayamishaña nankashi kuhimpa muniyi njila. Ichi natiyaña kuwaha chikupu kudikunda nawantu akumatuña ejima nawa ayitachi yejima. Chumichi chankwasha nankashi muchihandilu nawa nekala namuzañalu.

Sandra: Amama afuma kumbaka yaUmunede muDelta State, Nigeria. Hela chochu, chisaka chawatata chafuma mumbaka yaEdo nawa ahoshaña idimi daEsan. Hamuloña wanichi chaambu, antaña jawatata adiña nakuyikabisha chikupu amama kushika nifuku dafwiluwu. Dichi nadishiñili nami hinakadikunda namuntu wejima wahoshaña idimi daEsanuku nawa nami nakasumbuka wanyi namuntu wafuma kuState yaEdo. Ilaña chinatachikili kudiza Bayibolu, natachikili kumona yuma munjila yambukaku. Chineli Bayibolu yahosha nawu Nzambi haakamaña antu kumesuku nawa muntu wejima wamwakamaña Nzambi amutiyaña kuwaha, nateli kuhela ñahi antu muloña wamuchidi wawu hela idimi dawu? Nahimpili yitoñojoka yami nawa natachikili kutiyañana nawantaña jawatata. Kuzatisha yishina yamuBayibolu kwankwasha hama nawa hinakamenañaku. Kwankwasha cheñi kudikunda nawantu acheñi hichikweti muloña nachitachi chawu, ikowa, idimi hela munza wawuku. Nawa iyala inasumbuka nindi wafuma muState yaEdon nawa wahoshaña idimi daEsan.

Muloñadi Bayibolu chiyakwasha awa antu niantu amakwawu amavulu kubula kuhela akwawu hela kwikala nachaambu? Muloña Bayibolu Hizu daNzambi. Yikweti ñovu yakuhimpa yitoñojoka yamuntu  nichamonañayi akwawu. Kubombelahu, Bayibolu yashimuna yuma yikwawu yakeñekaña hakumanisha chaambu chejima.

WANTA WANZAMBI WAKAMANISHA CHAAMBU CHEJIMA

Hela chakwila kudiza Bayibolu kunateli kukwasha antu kushinda hela kumanisha yaaku yatama, kudi yuma yiyedi yalema yatela kufumahu henohu kanda afumishuhu chaambu. Chatachi, twekala nanshidi nawa twawanina wanyi. Bayibolu yahosha hatooka to-o nawu: ‘Kwosi muntu wabulaña kuvulumuna.’ (1 Anyanta 8:46) Chili tukuzata nañovu chamuchidinyi, twalwishaña nakukala neyi kwamweniyi kapostolu Pawulu wasonekeli nindi: “Neyi nakeñi kwila chachiwahi, komana kutama kudi kwoku.” (Aroma 7:21) Dichi mumpinji mumpinji muchima wetu wabula kuwanina ‘watoñojokaña yuma yatama,’ yinateli kutuleñela kwikala nachaambu.—Maku 7:21.

Chamuchiyedi, Satana Diyabolu watuluwañeshaña. Bayibolu yamulumbulula nawu ‘himbanji’ nawa yahosha cheñi nawu “wadimbaña antu ampata yamunu mwishina ejima.” (Yowanu 8:44; Chimwekeshu 12:9) Ichi dichakojeja chaambu kusweja nawa dimuloña wakañenyañawu antu kumanisha chaambu, kukabishana, kujaha antu amuchidi wacheñi, niyuma yikwawu yidi neyi chaambu chekowa, nikwitiya.

Dichi, henohu kanda afumishuhu chaambu, atela kufumishahu nshidi, kubula kuwanina niSatana Diyabolu waluwañeshaña antu. Bayibolu yashimuna nawu Wanta waNzambi wakafumishahu yuma yejimiyi.

Yesu Kristu wayidizishili atumbanji twindi kulomba kudi Nzambi nanawa mazu nindi: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:10) Wanta waNzambi diwamba kamanisha chaambu chejima, kushilahu niyuma yejima yatama.

Neyi Wanta waNzambi wunenzi dehi nakuyuula hamaseki, Satana ‘akamukasa’ hela kumukañesha kulonda yakabuli ‘kudimba cheñi nyunza.’ (Chimwekeshu 20:2, 3) Hayina mpinji kwakekala ‘iseki dadiha,’ hela muchidi wawantu ‘wakashakama mukuloña.’ *—2 Petulu 3:13.

Antu akashakamaña mwituña dadiha akekala awanina, akadi nshidi. (Aroma 8:21) Hakwikala antu akayuulañawu kudi Wanta waNzambi ‘hiyakadikatishaña hela kudijilumunaku.’ Muloñadi? “Muloña iseki dejima dakawanina kumwiluka Yehova.” (Isaya 11:9) Hayina mpinji, antu ejima akadiza njila jaYehova Nzambi nikwimbujola yililu yindi yakukeña. Dikwila nawu chaambu chejima chakamana, “muloña kudi Nzambi hikwekala kwakama antu kumesuku.”—Aroma 2:11.

[Tumazu twaheshina]

[Mwevulu wudi hefu 5]

Martin Luther King, Jr., nakuhosha hawuswa wawantu

[Mazu aKusakilila]

© Bob Adelman/Corbis

[Nyevulu yidi hefu 6]

“Ichi hinidi nachaambuku.”—Linda

[Nyevulu yidi hefu 6]

“Nelukili Nzambi chamonañayi antu.”—Michael

[Nyevulu yidi hefu 7]

“Nahimpili yitoñojoka yami nawa natachikili kutiyañana nawantaña jawatata.”—Sandra