Kundamenu Kwakwihi Nanzambi

Yehova ‘Haakamaña Antu Kumesuku’

Komana ayikabishahu dehi muloña wachaambu? Komana ayuminahu dehi chuma chimwalombeli, kukaana kuyikwasha hela kuyikabisha muloña wekowa denu, chisemwa, hela chifulu? Neyi dimu, ilukenu nenu antu amavulu amonahu dehi chumichi. Nsañu yayiwahi iyi: Hela chakwila yuma yamuchidiwu yatiyishaña nsonyi yinatandi heseki, mwiwulu mwosi. Kapostolu Petulu mukwaKristu wahosheli nakukuhwelela nindi: ‘Nzambi haakamaña antu kumesuku.’—Tañenu Yililu 10:34, 35.

Petulu wahosheleli awa mazu mwiluña mwateleleliyi kubula kwikalayi, mwitala dakaJentili wejina daKonelisu. Petulu wadiña kaYudeya, mumafuku indi aYudeya amweneña aJentili nawu hiyantu amajilu nawa hiyadikundileña nawuku. Hanu dinu, Petulu wayililidi kwitala daKonelisu? Muloña Yehova Nzambi diyi wamutemesheli. Petulu amulejeli kudi Nzambi muchimwenu nawu: “Chuma chanatookeshiyi Nzambi, bayi wuchitena neyi chatamaku.” Henohu Petulu wudi muwilaji, Konelisu niyena amulejeli kudi kañelu muchimwenu nawu yamutambiki Petulu. (Yililu 10:1-15) Petulu chelukiliyi nindi Yehova diyi walombweleña yumiyi, wahosheli chakubula kuhita mumbadi.

Petulu wahosheli nindi: ‘Mwalala, namoni komana Nzambi haakamaña antu kumesuku.’ (Yililu 10:34) Izu dachiGriki datuntululawu nawu ‘kwaakama kumesu’ daya mukwila nawu “mukwakutala kumesu.” Muntu wumu wadiza chikupu walumbulwili idi izu nindi: “Datalisha kudi nsompeshi watalaña muntu hamesu nakuketula muloña, bayi neyi wukuhakula muloña kwesekeja nachiwuduku, ilaña kwesekeja nachinakumwekanayi muntu kumesu.” Nzambi hakomokaña muntu wumu kumesu kubadika mukwawu kushindamena hekowa, munza, chifulu chikwetiyi, hela yuma yikwawuku.

Ilaña Yehova watalaña munyichima yetu. (1 Samweli 16:7; Yishimu 21:2) Petulu wahosheli cheñi nindi: ‘Munyunza yejima, muntu wamwakamaña yena, welaña mwaloña, amutiyaña kuwaha kudi Nzambi.’ (Yililu 10:35) Kumwakama Nzambi hikumulemesha, kumukuhwelela nikutondolwela yuma yejima yamuneñeshaña. Kwila mwaloña kwakeñekaña kuzata yuma yamonañayi Nzambi nindi yaloña chakufuma kumuchima. Yehova watiyaña kuwaha namuntu wamwakamaña chakufuma kumuchima nawa chumichi chamusañumunaña kwila yuma yaloña.—Kuhituluka 10:12, 13.

Neyi ayikabishahu dehi muloña wachaambu, munateli kukoleshewa namazu ahosheliyi Petulu hadi Nzambi. Yehova nakukokola antu akunyunza yejima kwikala mukudifukula kwalala. (Yowanu 6:44; Yililu 17:26, 27) Watiyaña nikwakula kulomba kwawakwakudifukula indi hichikweti muloña nekowa, munza hela chifulu chikwetuwuku. (1 Anyanta 8:41-43) Tunateli kukuhwelela chikupu netu neyi Yehova yatala heseki wamonaña munza wumu hohu, muchidi wawantu. Komana munakukeña kudiza yuma yayivulu yahosha hadi iwu Nzambi wabulaña kwaakama antu kumesu?

Nsona yimwatela kutaña

Yowanu 17–Yililu 10

[Mazu ekoku adi hefu 14]

Neyi Yehova yatala heseki wamonaña munza wumu hohu, muchidi wawantu