BAYIBOLU YAHIMPAÑA YIHANDILU YAWANTU

“Natachikili kutoñojoka nankashi hayuma yikamwekana muchihandilu chami”

Washimwini Allan Hancock

CHAAKA CHAKUVWALIKA: 1941

ITUÑA KWAFUMAYI: AUSTRALIA

KUHANDA KWINDI: MUKWAKUNWA MAKANYA NIKUSHETA WALWA

CHIHANDILU CHAMI CHAKUNYIMA:Nakulilili muWarialda, mbaka yanyanya yekala muNew South Wales. MuWarialda mwekala andimi ashiyashana ahembaña nyikoku, añombi nawa adimaña mbutu yansachi niwakaaka. Mumbaka mwekala wunyoji nawa himwavula wubanjuku.

Chineli yami mukulumpi hadi anyana ikumi, chinashikijili yaaka 13, natachikili kuzata kulonda nikwasheña chisaka. Nazatileña mumafwamu muloña hinatañili shikola yashikilamu yakumujimbaku. Chinashikijili yaaka 15, nekalili kabiña nawa nadizishileña tuwalu twamumasaña kulonda twinjilili antu.

Mumafwamu munazatilileña mwadiña yuma yayiwahi niyatama. Hela chochu, nakeñeli mudimu wunazatileña hamu tuhu niiluña. Nampinji yawufuku nashakamineña kukesi nakutala kakweji nitutumbwa iku inakwepula mavumba amawahi amumasaña. Inakwanuka mpinji yinatoñojokeleña nami kudi Muntu waleñeli iyi yuma yayiwahi yejima. Ilaña nadikundileña nawantu elileña yuma yatama mumafwamu. Natiyileña antu anakutukana mpinji yejima nawa makanya adiña hohu akunona. Natachikili kunwa makanya nikutukana.

Chinashikijili yaaka 18 yakuvwalika, nayili kuSydney. Nakeñeleña kwiñila mudimu wawushidika ilaña ankaninini muloña hinatañili shikola yashikilamu yakumujimbaku. Nawanini mudimu nawa nashakamini muSydney chaaka chimu. Diyi mpinji yinadimweni nawaYinsahu jaYehova katachi. Chantambikiluwu kukupompa kwawu nayili, nawa nashikeneni dakwiluka nami nsañu yatañishañawu yalala.

Hela chochu, chihahitili mpinji nafukwiluhu kufuta cheñi mumasaña. Nayili kumbaka yaGoondiwindi, Queensland. Nawanini mudimu nawa nasumbwili, chawushona natachikili kunwa walwa.

 Twavwalili anyana ayedi. Chinavweli anyana, natachikili kutoñojoka nankashi hayuma yikamwekana muchihandilu chami. Nanukili yuma yinatiyili hakupompa kwawaYinsahu muSydney nawa nafuukwiluhu kuzatila hayuma yenayina.

Nawanini Kaposhi Kakutalila kakakulu kadiña nakeyala yamutayi wawaYinsahu jaYehova wakuAustralia. Natemesheleluku mukanda nami ankwashi. Añakwili kuhitila mukutemesha Chinsahu wukweti kukeña niluwi kwinza nakunhempula. Watachikili kundizisha Bayibolu.

BAYIBOLU CHIYAHIMPILI CHIHANDILU CHAMI: Chinadizileña Bayibolu nelukili nami nateleleli kuhimpa yuma yayivulu muchihandilu chami. Vasi yimu yamuBayibolu yanshikili chikupu hamuchima hi 2 Akorinda 7:1. Iyi vasi yatukoleshaña nawu ‘tuditookeshenu kutama kwejima kwamujimba.’

Nafuukwiluhu kuleka kunwa makanya nikusweja kunwa walwa. Chankalilili kuleka yumiyi muloña nateñukili hadi yaaka yayivulu. Ilaña nafuukwiluhu chikupu kumuzañalesha Nzambi muchihandilu chami. Chuma chankwashili chikupu hikuzatisha chishina chasonekawu haAroma 12:2 hahosha nawu: “Bayi mulondeja mwelañawu antu amakonuku; ilaña yitoñojoka yenu yibalumuki kwikala yayiha.” Nelukili nami neyi inakukeña kuhimpa yililu yami natela kuhimpa yitoñojoka yami kulonda nimoneña yaaku yami neyi chayimweneñayi Nzambi nindi yatama. Nzambi wankwashili nawa nalekeli kunwa makanya nikusweja kunwa walwa.

Hela chochu, kutukana dichuma chankalilili nankashi kuleka. Nelukili kufumba kwamuBayibolu kwasonekawu haAefwesesa 4:29 kwahosha nawu: “Kuhosha mazu atama chinjila.” Kafwampi hahitili mpinji hakwila nawu nileki kutukana. Kutoñojoka chikupu hamazu ekala haIsaya 40:26 kwankwashili hama. Iyi vasi yahosha hatutumbwa twamwiwulu nawu: “Fumbulenu mesu enu kwiwulu mumoni waleñeli yumiyi, wedishaña yileñaleña yawu chakuchinda. Wayitenaña yejima hejina hejina; chaswejayi kunyiña nichatakalalayi nañovu hikwakabula nichimuku.” Natoñojokeleña nami neyi Nzambi wukweti ñovu yakuleña yuma yejima, yinatiyileña kuwaha kutala, chakadi nikujina nateli kunyinka ñovu yakuhimpa yililu yami kulonda nimuzañalesheña. Natachikili kuleka kutukana chovu-chovu muloña wakusweja kulomba nikuzata nañovu.

CHINAHETELUMU: Chineli nadiña kabiña, hinadiña nakukooleka kweneni kwakuhanjeka nawantuku, muloña hamafwamu hinazatilileña hadiña antu antesha. Hela chochu, yuma yinadizili hakupompa kwawaYinsahu jaYehova yankwashili kwiluka chakuhosha nawantu. Yuma yinadiza yankwasha cheñi kulejaku antu amakwawu nsañu yayiwahi yaWanta waNzambi.—Matewu 6:9, 10; 24:14.

Nadiluñishi kukalakala neyi eluda muchipompelu hayaaka yayivulu. Namonaña nami hikukooleka kwakweni hakuzata hakumina ñovu yami kulonda nikwashuku akwetu akwakwitiya. Hela chochu, natiyaña kuwaha chikupu hakumukalakela Yehova hamu namwini kwami inakeña nianyanetu.

Namusakililaña Yehova chantañishañayi, ami muntu wabula kutaña shikola yashikilamu yakumujimba. (Isaya 54:13) Neteja chikupu mazu asonekawu haYishimu 10:22 akwila nawu: “Nkisu yaYehova yaheteshaña muntu.” Ami nichisaka chami twakeñaña kudiza yuma yayivulu hadi Yehova nikutwalekahu kumukalakela haya nyaka.

[Mazu ekoku adi hefu 9]

“Nelukili nami neyi inakukeña kuhimpa yililu yami natela kuhimpi yitoñojoka yami”