YUMA YALETAÑA MUZAÑALU MUCHISAKA

Chakushakama Chiwahi Neyi Mwiñila Cheñi Mumaluwi

HERMAN: * “Iñodami watachi wafwili nachikatu chakansa hanyima yakushakama nindi mumaluwi yaaka 34. Chinasumbwili cheñi, iñodami Linda wamweneña nindi namwesekejeleña mpinji yejima nañodami watachi. Chuma chaswejeli kutama, amabwambu jami amakulu avulileña kuhosha hayililu yayiwahi yadiña nañodami watachi, nawa chumichi chamuneñesheleña Linda.”

LINDA: “Chitwadisumbwili naHerman natoñojokeleña nami nfumwami niantu amakwawu hiyakunlemeshaña neyi chamulemesheleñawu iñodindi watachuku. Antu amukeñeli chikupu, ahosheleña yuma yayiwahi hadi yena nawa amulemesheli. Mpinji yikwawu najinokaña neyi chakwila nikadikunda nanfumwami neyi chamukundiliyi iñodindi watachi.”

Linda wamuseñeli nfumwindi watachi. Linda niHerman atiyaña kuwaha chadisumbulawu. Ilaña neyi chinashimunuwu, antu cheñilawu mumaluwi cheñi anateli kumona kukala kwabulileñawu kumona mumaluwi atachi. *

Neyi mwasumbula hela mwasumbuka cheñi, mwatiyaña ñahi mumaluwi enu? Mumbanda wejina daTamara, wasumbukili cheñi chimwahitili yaaka yisatu kufuma hadiseñeluwu wahosheli nindi: “Neyi wunasumbuki katachi, wukutiyaña kuwaha neyi maluwi enu akatwalekañahu hohu. Ilaña neyi wuneñili cheñi mumaluwi, hiwukutiyaña muniyi njilaku muloña wuneluki neyi maluwi atachi amanini.”

Hela chochu, antu amavulu ekalaña namuzañalu chikupu neyi aneñili cheñi mumaluwi. Ashakamaña chiwahi  mumaluwi awu, anenu nawa munateli kushakama chiwahi. Munjilanyi? Shinshikenu kukala kusatu kwavula kumonawu antu niyishina yamuBayibolu chiyinateli kuyikwasha ninenu. *

KUKALA 1: CHINAKUYIKALILA KULALAMENA MWINI KWENU WAMUKULU.

Ellen washakamaña kuSouth Africa wahosheli nindi, “Chankalilaña kulalamena nfumwami watachi, sweje-e neyi tunayi nakunookela kumaluña kutwayileña nankulu nami. Mpinji yikwawu namwesekejaña nfumwami wakatataka nankulu nami.” Munjila yikwawu, neyi mwini kwenu wasumbukiluhu hela wasumbwiluhu, munateli kutiya kutama neyi yavulaña kuhosha hadi mwini kwindi wakusambila.

NJILA YIMWATELA KUZATISHA: Ilukenu nenu chikutwesheka wanyi neyi mukuhwelela nenu enu hela mwini kwenu wukushikena dakuvulamena mwini kwindi wakusambila, sweje-e neyi ashakamini yaaka yayivulu. Kafwampi antu amakwawu etejaña nawu aluwukilaña nakutena mwini kwawu wakatataka ijina dankulu nawu. Munateli kwila ñahi nakukala kwamuchidiwu hela kwadifwanaku? Bayibolu yatufumbaña nawu, “fwilenu kudiluka.”—1 Petulu 3:8, New Century Version.

Bayi mutiya mukawu nakumulekesha mwini kwenu nenu yabuleña kuhoshahu hadi mwini kwindi wakusambilaku. Neyi mwini kwenu nakufwila kuhosha chahandileñayi nankulu nindi, tiyililenu nakanañachima. Nawa bayi munyakala kuhosha nenu nakuyesekeja nankulu ninduku. Hanahiti dehi yaaka ikumi kufuma hasumbwili cheñi Ian, welili nindi, “Iñodami Kaitlyn hamweneña nindi hichishimashimaku neyi inakuhosha hadi iñodami wafwa dehi. Ilaña wamweneña neyi hinjila yakuñilukilamu.” Hadaha mpanji yamuchidiwu yinateli kuyikwasha kwikala nawulunda wawuwahi namwini kwenu wamuha.

Shenu maana hayililu yayiwahi yamwini kwenu wamuha. Eña, mwini kwenu hanateli kwikala nayililu yikwawu yadiña nankulu nenuku. Ilaña mwini kwenu wamuha hadaha wudi nayililu yayiwahi muyuma yikwawu. Dichi koleshenu wulunda wenu kuhitila mukushinshika nikuhameka yuma yimwakeña hadi mwini kwenu, ‘bayi mwesekeja namuntu wacheñuku.’ (Aŋalija 6:4) Iyala wejina daEdmond wasumbwili kapampa kayedi wahosheli nindi, “Wulunda wumukweti nawantu ayedi hiwunateli kwesekanaku, nimwini kwenu watachi hanateli kwesekana namwini kwenu wakatatakaku.”

Munateli kwiladi hakwila yuma yimwadiluñishileña namwini kwenu watachi yibuli kukañesha chihandilu chenu namwini kwenu wakatataka? Jared wahosheli nindi, “Namulejeli mwini kwami nami twadiluñishileña nankashi namwini kwami watachi. Nateli kwanuka yuma yayiwahi yitwadiluñishileña namwini kwami watachi mumpinji mumpinji. Hela chochu nakukeña nankashi. Nawa namulejaña mwini kwami wakatataka nami nadiluñishaña chitwashakamaña chiwahi mumaluwi.”

ESEKENU KUZATISHA IYI NJILA: Mwihulenu mwini kwenu neyi watiyaña kutama chimwatachika kuhosha hansañu yamaluwi enu atachi. Ilukenu mpinji yimwatela kubula kuhosha hansañu yamaluwi enu atachi.

KUKALA 2: MUNAKUKAÑANYA KUHANJEKA NAWAMABWAMBU JENU AMAKULU ABULA KUMWILUKA MWINI KWENU WAMUHA.

Hanahiti dehi yaaka yitanu nachimu kufuma hasumbwiliyi cheñi Javier, wahosheli nindi, “Chimwahitili tuhu mpinji kufuma hitwadisumbwili, ñodami wamweneña nindi amabwambu jami antesha adiña nakumweseka.” Iyala wejina daLeo wamweni kukala kwambukaku. Washimwini nindi, “Antu amakwawu amulejeleña ñodami hamesu ami nawu amukeñeli chikupu nfumwindi watachi.”

NJILA YIMWATELA KUZATISHA: Esekenu kutiya neyi chatiyañawu akwenu. Ian washimunawu hakusambila wahosheli nindi, “Namoni hadi antu ayedi adisumbula neyi hafwa wumu hela adiseña, amabwambu amakulu hiyatiyañanaña chiwahi namuntu wunasumbuli hela wunasumbuki ninduku.” Dichi ‘ikalenu amwovu adizoza nankashi kumesu awantu ejima.’ (Titusa 3:2) Yinkenu amabwambu jenu nichisaka chenu mpinji kulonda adinjilili namwini kwenu wamuha. Chineli munasumbuli hela munasumbuki namuntu wacheñi, mukwikala nawamabwambu acheñi. Javier atenawu dehi hakusambila wahosheli nindi chimwahitili mpinji, yena niñodindi atachikili cheñi kudikunda nawamabwambu amakulu. Wahosheli cheñi nindi, “Twakwatili cheñi amabwambu amaha nañodami nawa chumichi chatukwashili.”

 Toñojokenu chikutiyayi mwini kwenu hampinji yimunakuhanjeka nawamabwambu jenu amakulu. Chakutalilahu, hampinji yimunakuhanjeka neyi akwenu atena mwini kwenu watachi, munateli kuzatisha kashinshi nakuleta mpanji yacheñi kulonda mwini kwenu wamuha yabuli kutoñojoka nindi himwamusha maanaku. Chishimu chamuBayibolu chahosha nawu, “Kwekala muntu wahoshaña mazu akutuboka neyi wudi nakukutapola mpoku yakabali; ilaña madimi awakwamaana akoleshaña antu.”—Yishimu 12:18.

ESEKENU KUZATISHA IYI NJILA: Neyi munakuya kuchidika, ilukilenu chadimu yuma yikumwekana yimukubula kukeña enu hela mwini kwenu. Hanjekenu chadimu chimwatela kwakula malwihu hela nsañu yikuhoshawu amabwambu jenu kutalisha hadi mwini kwenu watachi.

KUKALA 3: CHAYIKALILAÑA KUMUKUHWELELA MWINI KWENU WAMUHA MULOÑA MWINI KWENU WATACHI HADIÑA WASHINSHIKAKU.

Andrew atemukiluwu kudi ñodindi watachi wahosheli nindi, “Natiyileña woma nami akantemuka cheñi.” Nkumininaku wasumbwili ñodindi wejina daRiley. Andrew wabombeleluhu nindi, “Kakavulu najinokeleña neyi nateli kwikala iyala wamuwahi neyi chadiña nfumwa Riley watachi. Nakameneneña nami keña yafuukuluhu kuntemuka nakusumbuka neyala wacheñi.”

NJILA YIMWATELA KUZATISHA: Mulejenu mwini kwenu yuma yimwakamenaña chakubula kuhita mumbadi. Bayibolu yahosha nawu, “Habula mpuña yuma yiwafuukwili kwila hiyamwekanañaku.” (Yishimu 15:22) Kuhanjeka chakubula kuhita mumbadi kwayikwashili aAndrew naRiley kudikuhwelela. Andrew wahosheli nindi, “Namulejeli Riley nami hinamba kakuseña kulonda nimanishi kukalaku, nawa Riley wanlejeli chuma chochimu. Ichi namukuhwelela chikupu.”

Neyi mwini kwenu wamuha amutemukili kudi nkulu nindi, zatenu nañovu kulonda yayikuhweleli. Chakutalilahu, Michel wadiseñeli nañodindi watachi nawa Sabine niyena wadiseñeli nanfumwindi watachi, chadisumbwiluwu aditejeli nawu akudilejaña neyi ahanjeka nawankulu nawu. Sabine wahosheli nindi, “Chumichi chatwikwashili chikupu.”—Aefwesesa 4:25.

ESEKENU KUZATISHA IYI NJILA: Ilukenu hakukumina neyi munakuhanjeka namuntu weyala hela wamumbanda wabula kwikala mwini kwenu mesu namesu, hanshiña hela haIntaneti.

Antu amavulu eñila mumaluwi cheñi ashakamaña chiwahi, anenu nawa munateli kushakama chiwahi. Kafwampi chayinu mpinji munadiluki enu aweni chikupu kubadika mpinji yimwasumbwili hela yimwasumbukili katachi. Andrew atenawu dehi wahosheli nindi, “Nadiluñishaña nankashi nañodami Riley. Chineli tunashakami dehi mumaluwi hadi yaaka 13, twadikunda chikupu nawa hitwakeñaña kwambukaku.”

[Tumazu twaheshina]

DIHULENU NENU . . .

▪ Indi mwini kwami wukweti yililwinyi yabadika kuwaha yinalemesha?

▪ Neyi hitukuhosha hansañu yamwini kwami watachi, nateli kuhosha ñahi iyi mpanji munjila yikumwekesha nami namulemesha mwini kwami wamuha?

[Mwevulu wudi hefu 12]

Ilenu yuma yayiha yakwanukilahu yinateli kuyileñela mudikeñi