KUHANJEKA NAMWINIITALA

Komana Nzambi Watwakamenaña Neyi Tunamoni Makabi?

Iyi mpanji yinalondeluhu diyi yavula kuhanjekawu aYinsahu jaYehova nawantuñi nawu. Fwikijenu neyi Chinsahu wejina daMayiji nayi kwitala damumbanda wejina daSofiya.

WETEJELELIDI CHUMICHI KUMWEKANA?

Sofiya: Shikenu mwani.

Mayiji: Mwani vude mwani. Ankoleshi mwani.

Sofiya: Kolenu mwani.

Mayiji: Tunakoli mwani. Ijina dami yami Mayiji.

Sofiya: Iyami Sofiya.

Mayiji: Natiyi kuwaha kuyiwana hamukala.

Sofiya: Chinawahi chimunenzi.

Mayiji: Dalelu inakuhana iyi tilakiti kudi antu ejima mudinu iluña. Yinakwila nawu Komana Munakukeña Kwiluka Ñakwilu Yanawa Malwihu? Tilakiti yenu iyi.

Sofiya: Yinakuhosha hansañu yawakwakwitiya tahindi?

Mayiji: Eña. Talenu awa malwihu atanu nalumu adi hefu datachi. Lwihwinyi lumukukeña hadi—

Sofiya: Wundenu ntahi. Mukumanisha hohu mpinji yenu hakuhosha nanami.

Mayiji: Munahoshelidi ochu?

Sofiya: Kuhosha hohu chalala, neluka wanyi neyi namukuhwelela Nzambi.

Mayiji: Chinawahi chimunashimuni walala. Mukuñiteja niyihuluku, Mwatoñojokaña muniyi njila mpinji yejima?

Sofiya: Inehi, nayileña kuchechi. Ilaña nalekeli dehi yaaka oyu.

Mayiji: Chachiwahi. Kafwampi hinnenzi nami niyikakeji kwiteja yuma yinakuhwelelaku. Hela chochu, inakukeña kwiluka. Kuduhu chuma chayileñeleli kukuhwelela nenu Nzambi kwosi?

Sofiya: Eña. Hanahiti dehi yaaka 17 kufuma hampinji yadiñawu amama mumaposu ahamukwakwa.

Mayiji: Chatama. Adikatishili?

Sofiya: Eña, nawa kufuma tuhu hayina mpinji endaña wanyi.

Mayiji: Chatama nankashi. Chumichi chayineñeshaña hama.

Sofiya: Eñañi. Dichanleñelaña kwihula nami, Neyi Nzambi wekala kwoku, wetejelelidi chumichi kumwekana? Muloñadi Nzambi chetejelayi nindi tukabakaneña muniyi njila?

KOMANA CHATAMA KWIHULA NZAMBI CHETEJELAYI MAKABI?

Mayiji: Malwihu imunehuli amawahi nawa munakutoñojoka hohu chiwahi. Neyi tunakukabakana, chatama wanyi kwihula muloña wutwakabakenaña. Kafwampi amayala niambanda ashinshika asonekawu muBayibolu niwena ehwileña malwihu wowamu.

Sofiya: Mwamweni?

Mayiji: Eña. Mukuñiteja niyileji chakutalilahu chamuBayibolu?

Sofiya: Kukala kwosi.

Mayiji: Talenu chamwihwiluwu Nzambi kudi kaprofwetu washinshika Habakuki neyi chasonekawu hamukanda waHabakuki kapetulu 1, mavasi 2 ni 3 nindi: “Eyi Yehova, nukudila dile-e kushika kumwakanyi chakadi eyi kutiya? Nabidiki kudeyi jamadombu, eyi kwamwina nehi. Wanmwekeshelañadi kuluwa?” Komana awa malwihu anadifwani namalwihu imwehulaña?

Sofiya: Anadifwani.

Mayiji: Nzambi hamuzuwilili Habakuki hakwihula awa malwihuku nawa hamulejeli Habakuki nindi wateleleli kwikala nachikuhwelelu chakolaku.

Sofiya: Hinsañu yayiwahi.

YEHOVA WAHELA MAKABI

Mayiji: Bayibolu yatañishaña nawu Nzambi wamonaña chitwakabakanaña nawa watwakamenaña.

Sofiya: Munatalishi mudihi?

Mayiji: Taniyileji chakutalilahu chasonekawu hamukanda waKwidika 3:7. Mukukeña kutaña iyi vasi?

Sofiya: Chachiwahi. Yinakuhosha nawu: “Yehova  wahosheli nindi, chalala namoni antu ami adi muEjipitu chakumonawu ihuñu, natiyi chakudilawu nawakwakuyikalakesha; ami neluki chakabañawu.”

Mayiji: Kusakililaku. Kwesekeja naniyi nsona, komana Nzambi wamonaña antu jindi neyi anakukabakana?

Sofiya: Eña, wayimonaña.

Mayiji: Bayi neyi wakuminaña dakumona hohu yuma yamwekanañaku. Talenu cheñi kumakumishilu aniyi vasi. Nzambi nindi: ‘Ami neluki chakabañawu.’ Komana awa mazu anateli kuyihosha kudi Nzambi wabulaña kushaku maana chitwakabakanaña?

Sofiya: Inehi.

Mayiji: Kafwampi Nzambi hamonaña hohu kukala kwetuku, ilaña watiyaña kutama neyi tunakukabakana.

Sofiya: Dimu.

Mayiji: Chineli tuneluki dehi iyi nsañu, tutañi cheñi nsañu yikwawu yinakuhosha hadi antu jaNzambi adiña nakukabakana. Ayisoneka hamukanda waIsaya 63:9. Chibalu chatachi chaniyi vasi chinakwila nawu: ‘Mwejima mwakabiluwu wena dimu mwakabiliyi yena nawa.’ Komana mukuhosha nenu Nzambi watiyileña kutama chakabileñawu antu jindi?

Sofiya: Eña, watiyileña kutama.

Mayiji: Kuhosha hohu chalala aSofiya, Nzambi watwakamenaña chikupu nawa watiyaña kutama hakumona chitwakabakanaña. Neyi tunakukabakana niyena wakabakanaña.

MULOÑADI CHAHEMBELELAYI MPINJI YAYILEHI?

Mayiji: Henohu kanda niyi, kudi nsañu yinnakukeña kuyileja.

Sofiya: Chachiwahi.

Mayiji: Shinshikenu chuma chatañishaña Bayibolu kutalisha hañovu yaNzambi. Inakutoñojoka havasi yaYeremiya 10:12. Munateli kutaña?

Sofiya: Kukala kwosi. Yinakuhosha nawu: ‘Yena waleñeli maseki nañovu jindi, nakoleshi mpata yamunu mwishina namaana indi, natanjiki mawulu nakashinshi kindi.’

Mayiji: Kusakililaku. Tushinshikenu haniyi vasi hakapinji kantesha. Komana Nzambi wateleleli kwikala nañovu nankashi hakwila yaleñi iwulu niiseki niyuma yejima yekalahu?

Sofiya: Eñañi.

Mayiji: Hanu dinu, neyi Nzambi wukweti ñovu yakuleña yuma yejima yitwamonaña, komana hitunateli kukuhwelela netu wukweti ñovu yakuyuula yileñaleña yinduku?

Sofiya: Eña.

Mayiji: Toñojokenu cheñi hadi amama yenu. Muloñadi chimwatiyilaña kutama hakumona chinakukabakanawu?

Sofiya: Muloña nayikeña. Hiyamama.

Mayiji: Neyi mwadiña nañovu yakuyuuka dalelu, mwadi kuyuuka?

Sofiya: Hinadi kukwata nikumatahuku.

Mayiji: Toñojokenu munatalishi chumichi. Bayibolu yatañishaña nawu Nzambi wamonaña chitwakabakanaña, watutiyilaña luwi, nawa wukweti ñovu hama. Hanu dinu toñojokenu chumichi, Nzambi wadiwunjika chikupu hakwila yabuli kuzatilahu chakatataka hakumanisha kukala kwetu.

Sofiya: Kanda nitoñojokeñahu dehi muniyi njila.

Mayiji: Komana kudi yuma yayiwahi yamuleñelaña kubula kumanisha kukala kutwamonaña? *

Sofiya: Aa-a, namoni dimu.

Mayiji: Natiyi nshiña yenu yinakuvuma, namoni nakenza mpinji yikwawu kulonda twakahanjeki haniyi nsañu cheñi.

Sofiya: Kusakililaku. Nakatiya kuwaha kuhanjeka haniyi nsañu. *

[Tumazu twaheshina]

Komana kuduhu nsañu yamuBayibolu yimwajinokaña? Komana mwakeñaña kwiluka yuma yakuhwelelawu aYinsahu jaYehova? Neyi mwakeñaña kwiluka, bayi mukashintajala kumwihula Chinsahu waYehovaku. Wakatiya kuwaha kuhanjeka nenu oyu nsañu.