MALWIHU AMUBAYIBOLU ANAYAKULI

Komana Nzambi watiyaña kulomba kwejima?

Nzambi watiyaña kulomba kwawantu akunyunza yejima. (Masamu 145:18, 19) Izu dindi, Bayibolu yatukoleshaña kumuleja yuma yejima yitwakamenaña. (Afwilipi 4:6, 7) Ilaña kulomba kukwawu kwamuneñeshaña Nzambi. Chakutalilahu, kulomba kwakuhembela kumutu kwakufuntila-funtilahu kwamuneñeshaña Nzambi.—Tañenu Matewu 6:7.

Yehova wahela cheñi kulomba kwawantu abulaña kulemesha nshimbi jindi mumushikila. (Yishimu 28:9) Chakutalilahu, kushankulu Nzambi wakaanini kutiyilila kulomba kwawaIsarela adiña nakujahana. Eñañi, twatela kwila yuma yakeñañayi hakwila Nzambi yatiyi kulomba kwetu.—Tañenu Isaya 1:15.

Chumanyi chitwatela kwila hakwila Nzambi yatiyi kulomba kwetu?

Neyi tudana chikuhwelelu hitunateli kulomba kudi Nzambuku. (Yakoba 1:5, 6) Twatela kukuhwelela chikupu netu wekala kwoku nawa watwakamenaña. Tunateli kukolesha chikuhwelelu chetu kuhitila mukudiza Bayibolu muloña chikuhwelelu chalala chashindamena hawunsahu niyikaninu yekala Mwizu daNzambi.—Tañenu Aheberu 11:1, 6.

Twatela kulomba chakufuma hamuchima nawa nakudizoza. NiMwana kaNzambi Yesu wadiña wadizoza hampinji yalombeleñayi. (Luka 22:41, 42) Dichi chatela tumuleji Nzambi chuma chatela kwilayi, twatela kutiyishisha yuma yakeñañayi kuhitila mukutaña Bayibolu. Neyi twila mwenimu tunateli kulomba kwesekeja namwaya muchima waNzambi.—Tañenu 1 Yowanu 5:14.

Neyi munakukeña nsañu yikwawu, talenu kapetulu 17 kaniwu mukanda, Chumanyi Chacheni Chatañishaña Bayibolu?, wasonekawu kudi aYinsahu jaYehova

Loñololenu ha www.pr418.com

[Mwevulu wudi hefu 16]

Muloñadi kulomba kukwawu chikwamuneñeshelaña Nzambi?