Waluñishaña ‘Nyichima Yetu’
KUNDAMENU KWAKWIHI NANZAMBI
Waluñishaña ‘Nyichima Yetu’
Komana Yehova watwakamenaña, tahindi washañaku maana wanyi kumakabi anakumonawu antu hamaseki? Ñakwilu yamuBayibolu yalwihu lwenilu yatukundejaña. Nzambi wakamenaña chikupu yisaka yawantu, nawa wakeñaña nindi tudiluñisheña. Mafuku ejima Nzambi wakwashaña antu niabulaña kumusakilila kuhetela mukuwaha kwindi kwabadika. Shinshikenu mazu akapostolu Pawulu.—Tañenu Yililu 14:16, 17.
Pawulu wahosheli nawantu amumusumba waLisitira abulileña kudifukula kudi Nzambi, nindi: ‘Nyaka yinahiti dehi munyima [Nzambi] wetejeli nyunza yejima nindi yendi tuhu munjila jawu awenawu. Hela chochu, hayilekeli tuhu chakadi kuyishiyila wunsahu windi wakwila chachiwahuku. Wayinkelaña nvula yakufuma kwiwulu, niyilaaka yakudya, nakuyitiyisha kuwaha nayakudya, nikuluña mwaya nyichima yenu mwejima.’ Indi antu amutiyilileña Pawulu atiyilili awa mazu mudihi?
Antu amuLisitira elukili mwatalishiliyi Pawulu. Adimineña nawa ashakamineña mwiluña mwadiña wushi nimenji chikupu. Ilaña Pawulu wayanukishili nindi Nzambi diyi Wayinkeleña nvula niyilaaka yayakudya. Dichi mpinji yejima yañwileñawu yakudya yayivulu nikudiluñisha yakudya yayiwahi, aheteleleña mukuwaha kwaNzambi.
Mazu ayilejeluwu antu amuLisitira kudi Pawulu atudizishaña yuma yayivulu yalema kutalisha hadi Yehova Nzambi.
Yehova watwinka wuswa wakudifuukwila. Ilukenu nenu Yehova wetejeli antu akunyunza yejima nindi “endi tuhu munjila jawu awenawu.” Mukanda wumu wazatishañawu akwakutuntulula Bayibolu wahosha nawu iyi nhoshelu yinateli kulumbuluka nawu “kwenda mwanakeñeluwu” hela “kwila muyanatoñojokuwu awenawu.” Yehova hakanjikijaña muntu wudi wejima kudifukula kudi yenaku. Watwinka wuswa wakudifuukwila, dikwila nawu wuswa wakutondahu yuma yitunateli kwila muwumi wetu.—Kuhituluka 30:19.
Yehova wakeñaña nindi tumwiluki. Pawulu walumbulwili nindi hayilekeli ‘tuhu chakadi kuyishiyila wunsahuku.’ Mukanda wazatishañawu akwakutuntulula Bayibolu watenawu dehi wahosha nawu iwu mukuku anateli kuwutuntulula nawu “Nzambi wadimwekesha kudi antu hatooka chekalayi.” Yileñaleña yaNzambi yamwekeshaña chikupu wunsahu ‘wayuma yindi yakadi kumonewa,’ kubombelahu nikuwaha kwindi, maana, ñovu nikukeña. (Aroma 1:20) Yehova wamwekesha yuma yayivulu yahosha hadi yena muBayibolu. (2 Timotewu 3:16, 17) Yumiyi yamwekeshaña hatooka to-o nawu wakeñaña nindi tumwiluki.
Yehova wakeñaña nindi tuzañalaleña. Pawulu wahosheli nindi, waluñishaña ‘nyichima yetu nikututiyisha kuwaha nayakudya.’ Nimukwanshidi wabula kumwiluka Yehova nateli kudya yakudya yakuluñisha muchima windi nikwikala namuzañalu muchihandilu. Hela chochu, Nzambi wakeñaña nindi twikali namuzañalu walala nawa wahaya nyaka. Tunateli kwikala namuzañalu neyi tudiza chalala chahosha hadi yena nikuchizatisha muwumi wetu.—Masamu 144:15; Matewu 5:3.
Wejima wetu twahetelaña mukuwaha kwaYehova mafuku ejima. Kwila mudiza nsañu yayivulu yinakushimuna chimwatela kumusakilila Nzambi waluñishaña nyichima yenu ‘nikuyitiyisha kuwaha nayakudya’ nehi?
Nsona yimwatela kutaña
[Mazu ekoku adi hefu 13]
Mafuku ejima Nzambi wakwashaña antu niabulaña kumusakilila kuhetela mukuwaha kwindi kwabadika
