MUTU WUDI HEFU DATACHI: MULOÑADI MAKABI CHIYANASWEJELUWU? AKAMANA MPINJINYI?

Antu Amavulu Akadi Muloña Anakufwa!

HaFebruary 7, 2013, basi yakampani kaZambia Postal Service yatwalileña antu kuMusumba waLusaka, yadihumini nachimbaya-mbaya nimotoka yanyanya kuChibombo. Antu akubadika ha 50 afwili. Nawa antu amakwawu 6 adikatishili nankashi afwilili munjila henohu kanda ashiki kuchipatela.

Charlotte, Daniel, Olivia, Josephine . . . Awa diwu majina awanyana adiña hakachi kawanyana 20 adiña nayaaka 6 hela 7 adiña hakachi kawantu 26 alozeluwu hashikola mumbaka yaConnecticut, U.S.A., ha December 14, 2012. Hakujika, Kajiña Mpata Obama wateneni majina awanyana nawa walejeli antu enjili kuchipenji nindi: “Kukala kwamuchidiwu kwatela kumana.”

Bano wudi nayaaka 18 wafumini muIraq nakubuukila kuNorway mu 1996 hamu nachisaka chindi. Amabwambu jindi amutumbili ijina dikwawu nawu Kutoñeka. Chawushona, haJuly 22, 2011, Bano wadiña hakachi kawantu 77 ajahiluwu kudi mbanji wadeteli hebwambu nindi: “Inakulomba kwanakena . . . hamuloña wakubula kujaha antu amavulu.”

Nsañu jamuchidiwu jinakuneñesha antu jinakumwekana chikupu mukaayi kejima. Toñojokenu chaneñañawu antu neyi kunamwekani maposu, nsañu jakuluwalala, njita, wubanji, wubanji wadimwekenaña nikuyihuñu yikwawu. Antu amavulu afwaña hela kukabakana chakadi muloña.

Antu amakwawu amutwinkaña Nzambi muloña nawu Nleñi yetu hakamenaña antuku. Amakwawu ahoshaña nawu Nzambi wamonaña chitwakabakanaña ilaña wadiwulaña. Amakwawu niwena nawu kukala kwamuchidiwu akutoñweli dehi. Nikulelu antu achidi kwaaba. Kudihi kutwatela kuwana ñakwilu yayiwahi nankashi? Muyibaaba yinalondeluhu, tukutala chahosha Izu daNzambi, Bayibolu, kulonda twiluki yuma yakojejaña makabi nichamba kamanawu.