BAYIBOLU YAHIMPAÑA YIHANDILU YAWANTU

“Antu amavulu anheleli”

Washimwini Waldo Moya

CHAAKA CHAKUVWALIKA: 1978

ITUÑA KWAFUMAYI: CHILE

KUHANDA KWINDI: WADIÑA MUKWAMADOMBU NANKASHI

CHIHANDILU CHAMI CHAKUNYIMA: Nakulilili muSantiago, musumba weneni muChile, mwiluña mwazatishileñawu antu yitumbu yashetana, wukombi niwubanji nankashi. Chinashikijili yaaka yitanu, atata ayijahili. Kufumahu, amama atachikili kushakama neyala walukambu. Atuhumpwileña nankashi. Nikulelu nichidi kwanuka yuma yejima yatama yatwilileñawu.

Chinakulileña anami nawa nekalili mukwamadombu nankashi. Nadiña nakutiyilila kutumina twaheavy-metal, nasheteleña nankashi, mpinji jikwawu nanwineña yitumbu yashetana. Nazuñileña nawantu munyikwakwa alandishileña yitumbu yashetana, nawa esekeli mapampa kakavulu nawu anjahi. Ifuku dimu, chilumbu wumu wafweteli iyala waya mpuhu nindi yanjahi, ilaña natemukili nawa nashalili hohu nachilonda. Hampinji yikwawu, izanvu dawakwakulandisha yitumbu yashetana ankwatili nakuñinyika pisto kumutu nawa akeñeleña kunkudika.

Mu 1996, nadimweni namumbanda wejina daCarolina, mu 1998, twadisumbwili. Chitwavweli wedi wetu weyala, natachikili kwakama nami hamuloña wakusweja ikolotu damadombu, nukabishaña chisaka chami neyi chanhembeleñawu atata asumbwili amama. Dichi nayili kuchipatela nakulomba wukwashu. Anyinkeli yitumbu nawa anlejeli mwakwilila, ilaña hiyakwashiluku. Natwalekeluhu nakulendumoka nihakachuma kanyanya, mwaka nabutuka dehi. Hakwila nami nileki kukabisha chisaka chami, nafuukwiluhu kudijaha. Ilaña nafwili wanyi.

Hadi yaaka yayivulu nakaanineña nami hikwekala Nzambiku, ilaña haniyi mpinji nakeñeleña kumwiluka. Natachikili kuya muevangelical hakapinji kanti. Haniyi mpinji, ñodami wadizileña Bayibolu nawaYinsahu jaYehova. Nayiheleli aYinsahu nawa nayihosheleña chatama. Ilaña wena akwileña hohu mumesu awunda, chumichi chahayamishileña.

Ifuku dimu, Carolina wañilili nindi nitañi Masamu 83:18 muBayibolu yami. Iyi vasi yashimuna hatooka ijina daNzambi nawu diyi Yehova. Nahayamini hakumona muchechi munayileña ahosheleña hohu hadi nzambi, bayi hadi Yehovaku.  Kukutachika kwachaaka cha 2000, anami natachikili kudiza Bayibolu nawaYinsahu.

BAYIBOLU CHIYAHIMPILI CHIHANDILU CHAMI: Chinadizileña, natiyili kuwaha chinelukili nami Yehova hiNzambi wawushona nawa wanakenaña. Chakutalilahu, haKwidika 34:6, 7, Bayibolu yamulumbulula Yehova nawu “[hi]Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.”

Hela chochu, chankalilileña kuzatisha yuma yinadizileña. Nelukili chikupu nami ndombu yidi mumuchima wami hinakatwesha kuyimanishaku. Neyi nakañanyi kuzatisha yuma yinadizileña, Carolina wakwashileña. Wanlejeleña nindi Yehova nakumona chinnakuzata nañovu. Ñodami wakwashili nankashi chakwila natwalekeluhu kumuzañalesha Yehova hela chakwila nelukili nami nukutwesha wanyi.

Ifuku dimu, Alejandro wandizishileña Bayibolu, wañilili nindi nitañi Aŋalija 5:22, 23. Awa mavasi ahoshaña nawu nyikabu yaspiritu yowu “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.” Alejandro wanlumbulwilili nindi hakwila nikali nayililu yamuchidiwu chiña nishindamena haspiritu yajila yaNzambi bayi hañovu yamuku. Awa mazu ahimpili yitoñojoka yami chikupu.

Nkumininaku, nayili kukupompa kweneni kwawaYinsahu jaYehova. Yuma yinamweni yakwila yuma mwatelela, wunyonji nikudikunda yanleñeleli niluki nami iyi diyi nsakililu yalala. (Yowanu 13:34, 35) Napapatisheweli muFebruary 2001.

CHINAHETELUMU: Yehova nambalumuni kufuma mumadombu nakwikala muntu wawunda. Natiyaña neyi wanyamwini mumalowa munatampamini. Antu amavulu anheleli, ilaña hinayinkaña nyiloñaku. Ichi ami niñodami nianyanetu ayedi awamayala tunakumukalakela Yehova mukuwunda.

Antaña jami niadiña amabwambu jami anakuhayama nankashi hakumona yililu yami chiyinahimpiki. Chinafumimu, amavulu hakachi kawu anamwekeshi mpwila yakudiza chalala chamuBayibolu. Nakwashi cheñi antu amakwawu kumwiluka Yehova. Inakutiya muzañalu hakumona chalala chamuBayibolu chichinakuyikwasha kuhimpa yihandilu yawu!

[Mazu ekoku adi hefu 13]

Chinadizileña, natiyili kuwaha chinelukili nami Yehova hiNzambi wawushona nawa wanakenaña

[Mwevulu wudi hefu 13]

Nadizishaña antu yuma yinadizaña

[Mwevulu wudi hefu 13]

Tunakumukalakela Yehova mukuwunda hamu nachisaka