Bayi Muzeya Hanyima Yakudiseñaku
Bayi Muzeya Hanyima Yakudiseñaku
“Naneñeli nankashi. Chihandillu chami chadiña hohu chiwahi, kukasumuka, yuma yinahimpiki dehi.”—MARK, * iyala wunashakami chaaka chimu kufuma hiyadiseñeluwu.
“Nfumwami welili wuvumbi namumbanda wadiña nayaaka neyi yamwanetu wamumbanda. Chitwadiseñeli, napulukili kumahosha, ilaña nasawukili nawa nadimweneña neyi nidi wamukunkulwayi.”—EMMELINE, mumbanda wunashakami yaaka 17 kufuma hiyadiseñeluwu.
Antu amakwawu adiseñaña akuhwelelaña nawu chihandilu chawu chakawaha, amakwawu akeñaña kushakama mumaluwi ilaña hiyanateli kwila mwinikwawu nawu yatwalekuhu kushakama mumaluwuku. Ilaña antu adiseñaña chihandilu chayikalilaña nankashi. Neyi munafumi tuhu hakudiseña, chumichi chikuyineñesha nankashi muchihandilu chenu. Hela chochu, chikuwaha neyi mukushinshika hayikuma yamuBayibolu yinateli kuyikwasha kuumika naniku kukala.
KUKALA 1: KUNEÑA.
Chineñi chikusweja neyi mudi nakukala kwamali, munakuhemba anyana hela munakutiya wuudi, nawa hichamanaña swayuku. Wushi wawu Judith Wallerstein wadizili chatoñojokañawu antu nindi neyi munahiti yaaka kufuma hakudiseña, antu amakwawu atwalekañahu kuneña nawa atoñojokaña nawu “nikufwa tuhu kwakuwahi.”
YUMA YIMWATELA KWILA
▪ Mwatela kuneña hachuma chinayimwekeni. Hadaha munakumwanuka mwinikwenu imwakeña. Hela chakwila nshakaminu yenu yadiña yatama, munateli kuneña muloña himukweti muzañalu wumwakeñeleña kuwana mumaluwuku. (Yishimu 5:18) Dichi bayi mutiya nsonyi ‘hampinji yimunakudilaku.’—Mukwakutaŋisha 3:1, 4.
▪ Bayi mudambulañaku. Hela chakwila munateli kwikala nkawenu nakudila, kusweja kwikala nkawenu kwatama. (Yishimu 18:1) Hoshenuña mazu akukolesha akwenu, ilaña neyi mukuhoshaña chatama hadi nkulu nenu hela chakwila oyu nsañu yalala, akwenu akuyitemokaña. Neyi kudi chuma cheneni chimunakukeña kwila hanyima yakudiseña, lombenu wukwashu kudi muntu imwakuhwelela.
▪ Dakamenenu kumujimba. Chineñi chenzaña hamuloña wakudiseña chaletaña yikatu kumujimba yidi neyi kutemuka mashi hela mutu. Dyenuña chiwahi, ovwahishenuña mujimba nikukama mpinji yeneni.—Efwesesa 5:29.
▪ Natenu yuma yayineñeshaña kutalisha hadi nkulu nenu hela yuma yimunakubula kukeña, ilaña hembenu yipapilu hadi nsañu yalema. Neyi yuma yidi neyi nyevulu yimwakwatili hakudisumbula yinakuyikatisha kumuchima, yiloñenu muchikasha kulonda muhembeli anyanenu.
▪ Zatenu nañovu kulonda mubuleña kutoñojoka yuma yatama. Olga, waseñeli nfumwindi welili wuvumbi wahosheli nindi: “Nadihwileña nami, ‘Yumanyi yadiñayi nayu yinabulili ami?’” Chimwahitili mpinji Olga welukili nindi kutoñojokaña mpinji yejima hayuma yatama kunateli kuleñela ‘muchima kukata.’—Yishimu 18:14.
Antu amavulu eluka nawu kusoneka yuma yinakutoñojokawu kwayikwashaña kwiluka nikutondolwela yitoñojoka yatama. Neyi dichimwelaña, esekenu kutoñojoka munjila yacheñi kulonda mubuleña kudinka muloña. (Aefwesesa 4:23) Shinshikenu yakutalilahu yiyedi:
Chimukubula kutoñojoka: Yami naleñeli mwini kwami yeli wuvumbi.
Chimwatela kutoñojoka: Hela chakwila naluwañesheleña, mwini kwami hateleli kwila wuvumbiku.
Chimukubula kutoñojoka: Namanishileña hohu mpinji kushakama neyala watama.
Chimwatela kutoñojoka: Nukwikala namuzañalu neyi nikutoñojokaña hayuma yakumbidi bayi yakunyimaku.
▪ Diwulenu nhoshelu yatama yawantu. Amabwambu imwalemesha niantaña anateli kuhosha mazu akuyineñesha hela abula kushikilamu kutalisha hayuma yinayimwekeni nawu: ‘Wakuteleleli wanyi,’ hela nawu ‘Nzambi wahela kudiseña.’ * Bayibolu yatukoleshaña nawu: “Bayi wushaña kumuchima mazu ejima ahoshañawu antuku.” (Mukwakutaŋisha 7:21) Martina, mumbanda wunashakami yaaka yiyedi kufuma hiyadiseñeluwu wahosheli nindi: “Chatela nitoñojokeña hamazu akunneñesha, nesekaña kumona yuma neyi chayimonañayi Nzambi. Yitoñojoka yindi yabadika yitoñojoka yetu.”—Isaya 55:8, 9.
▪ Lombenu kudi Nzambi. Wayikoleshaña akwakudifukula indi ‘kumutwika kwakama kwawu kwejima,’ sweje-e neyi adi mukukala kweneni.—1 Petulu 5:7.
ESEKENU KUZATISHA IYI NJILA: Sonekenu mavasi amuBayibolu anateli kuyikwasha nawa yishenu hatooka kulonda muyimoneña. Kubombela hanyikanda yinatenuwu, antu aseñawu ahetelañamu mumavasi adi neyi: Masamu 27:10; 34:18; Isaya 41:10 niAroma 8:38, 39.
KUKALA 2: WULUNDA WENU NANKULUNENU.
Juliana, washakamini mumaluwi hadi yaaka 11 nindi: “Namulembeleli nfumwami nami yashakami hetala. Chafuminiyi hetala, wanneñesheli nawa namutiyilileña kajila kindi mukawu. Antu amavulu adiseñaña ahelaña ankulunawu hadi yaaka yayivulu. Dichi atachikaña kuhanjeka nawu sweje–e neyi adi nanyana.
YUMA YIMWATELA KWILA
▪ Mulemeshenuña nkulunenu. Hoshenuña hohu yuma yimunakukeña nawa bayi muvulisha jakuhoshaku. Iyi njila yinakwashi antu amavulu muloña yaletaña kuwunda.—Aroma 12:18.
▪ Bayi muhoshaña mazu akasawutuku. Sweje-e neyi nkulunenu nayihoshi chatama, kufumba kwakuwahi kwamuBayibolu kukuyikwasha kwakwila nawu: “Waanzaña mazu indi wukweti kwiluka.” (Yishimu 17:27) Neyi himukutwesha kuhanjeka nankulunenu munjila yayiwahuku, mwatela kuhosha nenu: “Nukutoñojokahu chiwahi hayuma yiwunahoshi nawa tukuhosha mpinji yacheñi.”
▪ Ambulenu yuma yenu nayankulunenu kushilahu niyipapilu yanshimbi, nsañu jamali niyipapilu yakuchipatela.
ESEKENU KUZATISHA IYI NJILA: Mpinji yikwawu yimwakahoshaña nankulunenu, talenu neyi wumu hakachi kenu nakumwekesha chinjikijilu chebamba hela nakudikaña nayuma. Neyi chinatwesheki, lekenu kuhanjeka hanoyu nsañu hela tiyañanenu kuhanjekela ha e-melu.—Yishimu 17:14.
KUKALA 3: KWASHENU ANYANENU AHIMPI CHIHANDILU CHAWU.
Maria wanukaña chadiña chihandilu hanyima yakudiseña nindi: “Mwanami wamumbanda wakansi wadilileña dejima nawa watachikili cheñi kuzoweshela hakadidi. Hela chakwila mwanami wamumbanda wamukulumpi wadinkeleñaku, ilaña namweneña nami niyena wudi nachineñi.” Nawa mukutachika kutoñojoka nenu himukweti mpinji niñovu yakukwasha anyanenu hampinji yamuchidiwuku.
YUMA YIMWATELA KWILA
▪ Lejenuña anyanenu ayilejeña chinakutiyawu, hela chakwila nsañu yikuhoshawu ‘yamukunkulwayi.’—Yoba 6:2, 3.
▪ Ilukenu nenu mudi anvwali. Hela chakwila munakukeña muntu wakuyikwasha muyitoñojoka nawa mwanenu namwekani neyi nateli kuyikwasha, bayi mumwila nenu yayikwasheña kumanisha kukala kwawakulumpuku. (1 Akorinda 13:11) Bayi mutachika kuleja mwanenu nsañu yakujinda hela kumwilisha yekali ntemesha wukuyitwalilaña nsañu kudi nkulunenu hela kuyiletelaku.
▪ Twalekenuhu kudizisha mwanenu chiwahi. Chikuyikwasha neyi mukutwalekahu kushakama mwitala dimu nikwila yuma yimwelaña dikalu, sweje-e dinu hawulunda wenu naNzambi, kutaña Bayibolu nikudifukula kwachisaka.—Kuhituluka 6:6-9.
ESEKENU KUZATISHA IYI NJILA: Wunu mulungu, yilejenu anyanenu nenu mwayikeña nawa nenu hidiwu aletesheli mudiseñi namwinikwenuku. Akulenu malwihu akuyihulahu chakadi kutwika nkulunenu muloña.
Dichi bayi muzeya hanyima yakudiseñaku. Melissa, wunashakami mumaluwi hadi yaaka 16 nindi, “Chanseñeluwu, natoñojokeleña nami ichi dichinakeñeleña wanyi nami chihandilu chami chikali.” Chayinu mpinji, wudi namuzañalu hela chakwila wudi mukukala. Wahosheli nindi, “Chinalekeli kutoñojoka hayuma yamwekeni kunyima, nazañaleli.”
[Tumazu twaheshina]
^ Majina amakwawu muchinu chibaaba anayihimpi.
^ Nzambi wahela antu adiseñaña hanyiloña yabula kushikilamu. Ilaña neyi wumu hakachi kawu yela wuvumbi, Nzambi wetejaña muntu wunabuli muloña kumuseña hela nehi. (Malaki 2:16; Matewu 19:9) Talenu chibaaba chinakuhosha nawu “The Bible’s Viewpoint—What Kind of Divorcing Does God Hate?” muAwake! yaFebruary 8, 1994, yasonekawu kudi aYinsahu jaYehova.
DIHULENU NENU . . .
▪ Komana nadilaña chitwadiseñeli?
▪ Nateli kuleña ñahi kumuhilila nkulu nami?
[Mwevulu wudi hefu 9]
Etejenu Izu daNzambi diyikwashi mumpinji yamakabi
