Makabi Keña Amani!

Fwikijenu munakushakama mwituña munabuli makabi, ituña dakadi wubanji, njita, yikatu niwubanji wadimwekenaña waweni. Fwikijenu mudi mwituña dakwila neyi munahinduki kwosi kwakama hansañu yachaambu, kwosi wakuyikabisha hela kuhutwa. Komana yuma yejimiyi yinakutiyakana neyi hichilota hohu? Mwamweni, kwosi muntu hela nfulumendi yawantu yinateli kuleta yuma yamuchidiwuku. Ilaña Nzambi natukani nindi wakafumishahu yuma yejima yakojejaña makabi kushilahu niyuma yitwahanjekahu muchibaaba chinafumuhu. Talenu yikaninu yinashimunuwu Mwizu daNzambi, Bayibolu:

◼ CHIYUULU CHANFULUMENDI YAYIWAHI

‘Hamafuku amba kekala anyantowu Nzambi wamwiwulu wamba kaloñesha wanta wakabula kukisañanawu. Wantowu hiyamba kawushila antu acheñuku. Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaka.’—Danyeli 2:44.

Wanta waNzambi hinfulumendi yamwiwulu. Nyuuli watondawu waniwu Wanta, Yesu kristu, wukafumishahu chiyuulu chawantu kulonda nkeñelu yaNzambi akayileña mwiwulu nihamaseki. (Matthew 6:9, 10) Iyi nfulumendi hiyakayisinsa kudi nfulumendi jawantuku muloña ‘hiwanta wahaya nyaka, waMwanta wetu yowu Chamwinu Yesu Kristu.’ Kukekala kuwunda kwahaya nyaka.—2 Petulu 1:11.

◼ HIKWAKEKALA NSAKILILU YAKUTWAMBAKU

“Hichakuhayamaku, muloña hela yomweni Satana wadifwikijaña neyi kañelu kachejeji. Dichi neyi añamba jindi akudifwikija neyi akalakalaña nyidimu yaloña, hichuma chakalaku. Kukumisha kwawu kwakekala mwomwaya nyidimu yawu.”—2 Akorinda 11:14, 15.

Nsakililu yakutwamba akayisawula muloña himudimu waDiyabolu nawa akayifumisha heseki. Chaambu nikupwekesha mashi kwekala munsakililu yejima yakutwamba kwakamana. Antu amukeña “Nzambi wamumi walala” akadifukulaña kudi yena ‘nakukuhwelela kumu’ ‘nimuspiritu nimuchalala.’ Chumichi chikaleta kuwunda nikunuñañana!—1 Atesalonika 1:9; Aefwesesa 4:5; Yowanu 4:23.

◼ ANTU AKEKALA AWANINA

“Nzambi yomweni wakekala nawu . . . Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:3, 4.

Yehova Nzambi wakakoña yumiyi kuhitila mudi Mwanindi, Yesu, waheni wumi windi kukola antu ejima. (Yowanu 3:16) Muchiyuulu chaYesu, antu akekala awanina. Hiyakakabakanaña cheñiku muloña “Nzambi yomweni wakekala nawu” nawa wakayikombola “madilu ejima kumesu awu.” Yiluwa  nimakabi keña amani; “Akwakuloña akaswana ituña, akashakamamu haya nyaka.”—Masamu 37:29.

◼ HIKWAKEKALA ASPIRITU ATAMAKU

“[Yesu Kristu] hakukwata owu chazañombi, yowu kapela mukulu, diyi Diyabolu, diyi Satana; hakumukasa ekali wakukasa ho-o ikombakaji danyaka. Hakumuumbila mwikela, hakumupatilamu, hakushilaku nichilamiki, kulonda abuli kudimba cheñi nyuza.”—Chimwekeshu 20:2, 3.

Yuma yatama yejima yakojejañayi Satana yikamana neyi Satana niandemoni jindi anayikasi dehi nikuyumbila “mwikela” mwakabulañawu kwila chuma chidi chejima. Hiyakekala cheñi nañovu yakuyuula antu chatamaku. Tukadiluñisha chikupu kushakama mwituña mukabula yuma yatama yakojejaña Satana niaspiritu atama!

◼ ‘MAFUKU AKUKUMININA’ AKAMANA

‘Mafuku akukuminina’ akamana ‘nalukadi lwasweja’ neyi chashimwiniyi Yesu. Wahosheli nindi: “Henohu hamba kekala lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku.”—Matewu 24:21.

Ilu lukadi lwakasweja muloña kukamwekana yuma yabulahu dehi kumwekana. Nawa lwakamana ‘hanjita yefuku odu deneni daNzambi Watwesha yejima,’ yatenañawu nawu “Amagedoni.”—Chimwekeshu 16:14, 16.

Antu mukaayi kejima akeña kuloña atalilaña chikupu mpinji yakajilumuka dinu ituña datama. Talenu hankisu jantesha jakatambwilawu muWanta waNzambi.

NZAMBI WAKAKOÑA YUMA YAYIVULU

“Izaza deneni” akadipulwisha nakwiñila mwituña dadiha dakuwunda: Izu daNzambi dahosha nawu “izaza deneni” dawantu dakadi kutwesha kuchinda ‘dakapuluka kuyihuñu yamaneni’ nawa akadiñija mwituña daloña dadiha. (Chimwekeshu 7:9, 10, 14; 2 Petulu 3:13) Akamuhameka Yesu Kristu, “Mwana kamukoku waNzambi, mukwakufumisha nshidi yawantu ampata yamunu mwishina,” hakuyipulwisha.—Yowanu 1:29.

Shikola yaNzambi yikaleñela antu kwikala nankisu jajivulu: Mwituña dadiha, “iseki dejima dakawanina kumwiluka Yehova.” (Isaya 11:9) Iyi shikola yaNzambi yikadizisha antu chakushakama mukuwunda nawantu ejima kwesekeja neluña chidakekala. Nzambi wakana nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.”—Isaya 48:17.

Antaña jetu itwakeña akayisañula: Hampinji yadiñayi Yesu hamaseki, wamusañwili ibwambu dindi Lazaru. (Yowanu 11:1, 5, 38-44) Yesu wamwekesheli yuma yakakoñayi yayivulu muWanta waNzambi.—Yowanu 5:28, 29.

Kuwunda nikuloña kukatwalekahu haya nyaka: Muchiyuulu chaKristu himwakekala kuluwalalaku. Tuneluki ñahi? Muloña Yesu wukweti ñovu yakwiluka yuma yidi munyichima yawantu nawa wukazatisha iyi ñovu hakusompesha antu aloña niatama. Antu akaanaña kuhimpa yililu yawu yatama hiyakayiteja kushakama mwituña daNzambi dadihaku.—Masamu 37:9, 10; Isaya 11:3, 4; 65:20; Matewu 9:4.

Tunadizi hohu yuma yantesha hawuprofwetu waBayibolu wahosha hayuma yayiwahi yitukadiluñisha kumbidi. Wanta waNzambi chiwukatachika kuyuula iseki dejima, ‘kuwunda’ kukatwalekahu haya nyaka. (Masamu 37:11, 29) Yuma yejima yakojejaña kukata nimakabi yinakuyandisha antu akayifumishahu. Tunateli kukuhwelela yumiyi muloña Nzambi nakani nindi: “Tiya, hinukubalumuna yuma yejima yiikali yayiha. . . . muloña mazu awa atela kwitiya, alala.”—Chimwekeshu 21:5.