Muloñadi Makabi Chinaswejeluwu?

Hakwila twiluki chinaleteshi makabi asweji nichinakukañenyawu antu kumanisha makabi, twatela kwiluka yuma yayeni yinakukojeja makabi. Hela yuma yakojejaña makabi yashiyashana nawa yakala, ilaña Bayibolu yatukwashaña kuyiluka. Muchinu chibaaba, tukushinshika hayuma yitanu yalema yinakuleñela makabi asweji chikupu. Tunakuyilomba netu mutañi nakanañachima chahosha Bayibolu kulonda mwiluki Izu daNzambi chidatukwashaña kwiluka yuma yayeni yaletaña makabi.—2 Timotewu 3:16.

◼ YUMA YAFUMAÑA MUCHIYUULU CHANFULUMENDI YATAMA

Bayibolu yahosha nawu: ‘Neyi muntu watama nakuyuula, antu adishishimonaña.’—Yishimu 29:2.

Kufuma tuhu kumashiita, anyuuli awukatu ayuulileña chatama chakwila akojejeli antu kumona yihuñu yamaneni chikupu. Ilaña, bayi neyi anyuuli ejima ayuulaña chatamaku. Amakwawu afwilaña kukwasha akwawu antu. Ilaña, neyi anekali dehi hetanda, akañanyaña kwila mwafuukwiluwu muloña ayiluwañeshaña kudi antu afwilaña chiyuulu. Mpinji jikwawu, azatishaña ñovu yawu chatama kulonda yuma yiyiwahileña, ilaña antu jawu ayandilañamu. Henry Kissinger wadiña Nsoneki Wetuña da U.S. nindi: “Kufuma tuhu kumashiita anyuuli anakañanyi, yuma yashimwinuwu yazatikili wanyi.”

Bayibolu yashimuna cheñi nawu: ‘Mudi muntu wendaña himwekala yakuyuula nyendu yinduku.’ (Yeremiya 10:23) Antu abula kuwanina hiyakweti maana nikashinshi kakumanisha kukala kukwetuwuku. Neyi antu anakukañanya kuyuula nyendu yawu, anateli kuyuula ñahi antu mwituña? Munamoni chuma chinakuleñela anyuuli akañanyeña kumanisha makabi? Neyi mutalisha chiwahi, nfulumendi hela chiyuulu chatama dichinakukojeja makabi.

◼ KWITIYA KWAKUTWAMBA KWALUWAÑESHAÑA ANTU

Yesu nindi: “Neyi mukukeñañana, dihu hakayilukilawu antu ejima nawu mudi atumbanji twami.”—Yowanu 13:35.

Akulumpi jansakililu jamachechi ejima ahoshaña hakukeña nikunuñañana. Ilaña anakañanyi kukwasha antu jawu ekali nakukeña kukuyileñela afumishi chaambu munyichima yawu. Chatela akwasheña antu kwikala nakukeña, nsakililu yaambulaña antu, yayiluwañeshaña nawa yayizuñañeshaña. Kunsa yamukanda windi waChristianity and the World Religions, Hans Küng wadiza jansakililu wasonekeli nindi: “Yuma yatama nankashi yamwekanaña, mapolitiki awukatu azuñaña ayivulumunaña kudi akwansakililu.”

Cheñi, akulumpi jansakililu jajivulu ahoshaña hatooka nawu antu atela kwila wuvumbi hela chakwila  kanda eñili mumaluwi, adisubula atela kwila wujila nawa nawu wutumwa wawuwahi. Chumichi chinakojeji nyisoñu kutanda, kufumisha mavumu, anyana amuyiputa, kudiseña nikupalañana kwayisaka nawa munakufuma yuma yomisha mbaña.

◼ KUBULA KUWANINA KWAWANTU NIKUFWILA YUMA YATAMA

“Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi.”—Yakoba 1:14, 15.

Hamuloña wanshidi yitwaswana, wonsu wetu twavulumunaña nikuluwañesha nawa twatela kuleka yuma yatama kulonda tubuleña ‘kukoña mwakeña mujimba.’ (Aefwesesa 2:3) Chatukalilaña kutondolwela kufwila kwatama neyi tunawani chuma chikutuleñela kwila yuma yatama. Neyi twikala nantuuya yakwila yuma yatama, mukufuma jomisha mbaña.

Nsoneki P. D. Mehta wasonekeli nindi: “Makabi amavulu itunakumona atwishikenaña muloña walwisu lutukweti, kusweja kufwila kuhema nikudiñija muyuma yatama nikwikala nantuuya niyuma yitwakeñeshaña.” Kukakela nikuteñuka nayuma yidi neyi, kusheta, yitumbu yashetana, yisela yalwisu, wuvumbi niyuma yikwawu, kunajiyishi “antu alema muchituñilu” nakushiya yisaka yawu, amabwambu niantu amakwawu nakukabakana. Hamuloña wakubula kuwanina kwawantu, twatela kwiteja chahosha Bayibolu nawu: “Tuneluki netu kuleña kwejima kwaabaña nakufunyisha hamu, nikulelu.”—Aroma 8:22.

◼ ÑOVU YAWASPIRITU ATAMA

Bayibolu yahoshaña nawu Satana diyi “nzambi yampata yamakonu” nawa wazatilaña hamu nawaspiritu atama añovu atenañawu nawu andemoni.—2 Akorinda 4:4; Chimwekeshu 12:9.

Kufwana Satana, andemoni anakuyuula chikupu nikudimba antu. Kapostolu Pawulu wetejeli hakuhosha nindi: “Hitwalwishaña nawantu akweti nyijimba namashuku, twalwishaña namawanta, nawakwañovu, nawakwakuyula mwidima wamakonu, nawaspiritu atama amumawulu.”—Aefwesesa 6:12.

Hela chakwila andemoni atiyaña kuwaha kuyandisha antu, ilaña dichuma chacheni chafwilañawu wanyi. Afwilaña kuhuñumuna antu kulonda amufutaleli Nzambi Wabadika, Yehova. (Masamu 83:18) Andemoni adimbaña antu nikuyiyuula nayuma yidi neyi kuhoña natutumbwa, kupesha, kupanda nikuhoña. Dihafuma Yehova hakutusoñamisha kuwubanji wamuchidiwu nikutuleja nindi nateli kutukiña neyi tudikaña naSatana niandemoni.—Yakoba 4:7.

◼ TUNAKUSHAKAMA ‘MUMAFUKU AKUKUMININA’

Yaaka makombakaji ayedi yinahituhu, Bayibolu yashimwineñahu dehi nawu: “Ilukaku chumichi, kumafuku akukuminina kwakenza nyaka yakala.”

Yatwalekahu kushimuna yuma yinakuleñela nyaka kwikala yakala, nawu: “Antu akekala akwakudikeña, akwakufwila mali, akwakudisamba, akwakudinka wanta, . . . abulaña kukeñañana mwasemwakenawu, oma muchima, akakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji, akwakuchinchika, akwakuditohesha, antu akeñaña yakuditiyisha aweni kuwaha, kukeña Nzambi nehi.” Hamuloña wakwila tunakushakama ‘mumafuku akukuminina,’ dichinakuletesha tumoneña makabi ejima makonu.—2 Timotewu 3:1-4.

Neyi tushinshika hayuma yitunahanjekuhu, tuneluki chikupu muloña waweni wunakukañenyawu antu kumanisha makabi, hela chakwila adi namuchima wakwila mwenimu, netu? Hanu dinu, kudihi kutunateli kuwana wukwashu? Twatela kushindamena hadi Nleñi yetu, wunatukani nindi ‘wakakisañana nyidimu yaDiyabolu’ niyawantu jindi. (1 Yowanu 3:8) Chibaaba chinalondeluhu chikuhosha hayuma yakelayi Nzambi kulonda yakafumishuhu yuma yejima yakojejaña makabi.