KUNDAMENU KWAKWIHI NANZAMBI

‘Yehova Wayanakeneni naMuchima Wumu’

“Muntu wabulaña kwanakena akwawu wabuvulaña chaawu hatela kuzambukilayi yomweni.” Awa mazu ayihosheli kudi Edward Herbert wadizili nsañu yanyaka wakuBritain wadiñaku muyaaka nkulakaji ya 17. Awa mazu anakumwekesha nawu twatela kwanakena akwetu, muloña anetu tunateli kulomba akwetu netu atwanakeni. (Matewu 7:12) Ilaña kudi chuma chalema chatuleñelaña twanakeneña akwetu. Talenu mazu akapostolu Pawulu adi haAkolose 3:13.—Tañenu.

Chineli wonsu wetu hitwawaninaku, mpinji yikwawu twahilishaña hela kuvulumuna akwetu niwena dichatwilañawu. (Aroma 3:23) Tunateli kuleta ñahi kuwunda nawakwetu abula kuwanina? Pawulu wonenenuwu kudi Nzambi watulejaña nindi tudiwuleña yiluwa nikudanakena. Iku kufumba kwazatikaña nikulelu neyi chikwazatikileña hampinji yakusonekeluwu kwakwihi namakombakaji ayedi ayaaka yinahituhu. Tushinshikenu hamazu ahosheliyi Pawulu.

‘Dovwahilenuña muntu namukwawu.’ Mazu akwila nawu ‘dovwahilenuña’ muchiGiriki atalisha kukudiwula. Mukanda wumu wahosha nawu akwaKristu amwekeshaña ichi chililu kuhitila “mukudiwula yiluwa yawantu hela yaaku yatama yayineñeshaña.” Mazu akwila nawu “muntu namukwawu” anakutuleja nawu twatela kudiwula yiluwa yawakwetu. Dikwila nawu, neyi tukwanukaña netu tukweti yaaku yinateli kutuntwisha akwetu, hitukutwalekahu kuhila nayuma yitwahela mudi akwetu yitwambuluku. Hanu tunateli kwila ñahi neyi akwetu anatuvulumuni?

‘Danakenenuña muntu namukwawu namuchima wumu.’ Kwesekeja nachahosheliyi nkuluñaña wumu, izu dachiGiriki ‘dakudanakena namuchima wumu’ ‘bayi neyi hikwanakena hohuku . . . ilaña kunabombelumu wushona wutwamwekeshaña hakwanakena akwetu.’ Mukanda wukwawu wahosha nawu idi izu datalisha cheñi “hakwila chuma chachiwahi, wuselewa hela wuloku.” Tukumwekesha wushona neyi tumwekesha muchima wakwanakena akwetu hela chakwila ‘akweti nyiloña nanetu.’ Muloñadi chitwatela kwikalila namuchima wakwanakena akwetu? Muloña anetu nawa akatwanakena kudi muntu wunatuvulumuni wutunanakeni.

‘Chochayanakenenuwu enu kudi Yehova, ninenu nawa ilenu chochimu.’ Iwu dimuloña waweni wutwatelela kwanakena akwetu namuchima wumu: muloña Yehova watwanakenaña namuchima wumu. (Mika 7:18) Toñojokenu haluwi lweneni lwamwekeshelañayi Yehova akwanshidi abalumukaña mumuchima. Yehova hadi neyi etuku, muloña yena havulumunañaku. Ilaña wayanakenaña chikupu akwanshidi abalumukaña mumuchima hela chakwila weluka nindi awa akwanshidi hiyakamwanakenaku. Mwamweni, Yehova diyi chakutalilahu chachiwahi chakwanakena akwanshidi abalumukaña!

Luwi lwaYehova lwatukundamishaña kudi yena nawa lwatuleñelaña tumwimbujoleña. (Aefwesesa 4:32–5:1) Dichi twatela kudihula netu, ‘Chineli Yehova wañanakenaña, muloñadi chinukubulila kwanakena mukwetu mukwanshidi wanvulumuna wunabalumuki chikupu mumuchima?’—Luka 17:3, 4.

Nsona yimwatela kutaña

Aŋalija 1-6; Aefwesesa 1-6; Afwilipi 1-4; Akolose 1-4; 1 Atesalonika 1-5; 2 Atesalonika 1-3; 1 Timotewu 1-6-2 Timotewu 1-4

[Mazu ekoku adi hefu 11]

Yehova diyi chakutalilahu chachiwahi chakwanakena akwanshidi abalumukaña!