IMBUJOLENU CHIKUHWELELU CHAWU | RAHABA

‘Amuteneni Kuloña naNyidimu’

KWADIÑA kumacha, Rahaba wemeni hanjanina kulonda yamoni yuma yamwekeneña hanji mumusumba waYeriku. Nindi yatali, hakumona amashidika awaIsarela anakukeña kushinda anakuchiki musumba. Chinatachikuwu kunyeñumuka musumba cheñi, lunkuñu hilukufukumuka nawa mumusumba mudi ipumba nimpuña jinakuvuma.

Chineli Rahaba washakamineña muYeriku, welukili chiwahi mwahita nyikwakwa, matala, yisankanu nimasitolu. Antu amuniwu musumba wayilukili nankashi. Watela wayimweneña antu amuYeriku chafwileñawu mutentu hakumona aIsarela anakunyeñumuka musumba hefuku hefuku. Hela chakwila mpuña yavumishileñawu munyikwakwa nimulubanza yaleteleña ipumba nawa antu atiyileña woma, Rahaba hatiyileña womaku.

Hefuku damuchitanu nachiyedi, amashidika atachikili kunyeñumuka musumba waYeriku ntetemena nankashi. Hakachi kawamashidika amweniyi, Rahaba wamweni atupristu embileña mpuña asendeli chimbañu chajila chamwekesheleña nawu Yehova Nzambi yawu wadiña nawu. Fwikijenu Rahaba nakwati mwonji wuchinana wunakuyekela hanjanina yadiña kumbañu jakola jamusumba waYeriku. Iwu mwonji wamwanukishileña Rahaba nindi yena nichisaka chindi akapuluka hampinji yakujilumuka kwamusumba. Komana Rahaba wadiña nfukeji? Inehi, Yehova dichamumweneñayi wanyi, ilaña wamumweneña neyi himumbanda wadiña nachikuhwelelu chakola. Tusambilenu kuhanjika hachihandilu chaRahaba kulonda twiluki yuma yitukudizilaku.

RAHABA WADIÑA CHIVUMBI

Rahaba wadiña chivumbi. Chumichi chaletesha antu ahoshaña hansañu jamuBayibolu kukaana nawu Rahaba hadiña chivumbuku, ilaña wadiña hohu netala mwakushikena antu. Ilaña Bayibolu yahosha hatooka nawu Rahaba wadiña chivumbi. (Yoshuwa 2:1; Aheberu 11:31; Yakoba 2:25) Antu amuKenani atoñojokeleña nawu wunyakalwalu hiwatamaku. Hela chakwila antu muKenani atoñojokeleña nawu wunyakalwalu hiwatamaku, Rahaba wakabakeneña nachinleji chindi. (Aroma 2:14, 15) Rahaba welukili nindi yuma yakoñeleñayi yadiña yatama. Hadaha watoñojokeleña nindi kwosi mudimu wukwawu watela kuzatayi wakuhembelamu chisaka chindi neyi chochatoñojokañawu ayivumbi amavulu.

Chakadi nikujina, Rahaba watela wakeñeleña kuleka wunyakalwalu. Mumusumba mwashakamineñayi mwaswejeli madombu, wupwapoki, antu adikamineña nawantaña jawu nianyama. (Alevi 18:3, 6, 21-24) Nsakililu diyaletesheli yuma yamuchidiwu yisweji nankashi. Hamatembeli dihelilileñawu wuvumbi nawa dihahanineñawu antu nyilambu yawu yakocha kudi ankishi adi neyi Bayali niMoleki.

Yehova wamweneña yuma yejima yamwekeneña muKenani. Hamuloña wayuma yakoñeleñawu antu amuKenani, Yehova wahosheli nindi: “Ituña dineli dehi damajilu dichi chinukushikijilamu kuluwa kwadu, dichi ituña hidikusanza antu  adu ashakamamu.” (Alevi 18:25.) Watalishili mudi hakuhosha nindi “kuluwa kwadu”? Watalishili mukwila nindi wakayibabesha muloña wayishikili aIsarela nindi: “Yehova Nzambi yeyi wakayitemuna kuwakayeyi anti anti.” (Kuhituluka 7:22) Henohu kanda yahoshi mwenimu, Yehova ‘Nzambi wabulaña kutwamba’ wakanini nindi wakahana idi ituña kudi anyana kaAbarahama.—Titusa 1:2; Kutachika 12:7.

Yehova wahosheli cheñi nindi wakajiyisha nyuza yikwawu. (Kuhituluka 7:1, 2) Chineli Yehova ‘hiNsompeshi waloña weseki dejima,’ welukili yuma yadiña munyima yawu nichiyakeñeli nankashi kwila yuma yatama. (Kutachika 18:25; 1 Kushindulula 28:9) Indi Rahaba watiyileña ñahi kushakama mumusumba wakeñeleñawu kujilumuna? Watela waneñeli chelili amuleji nsañu yawaIsarela. Welukili nindi Nzambi walombweleña antu jindi, akabishileñawu muwunkoli, nawa ashindili njita yawaEjipitu aswejeli ñovu hayina mpinji. Ilaña ichi aIsarela anakukeña kulukuka musumba waYeriku! Nawa antu amuniwu musumba ashili hohu muchima hakwila nshidi. Dichahoshelaña Bayibolu hadi antu amuKenani ashakamineña naRahaba nawu ‘antu ajikwa.’—Aheberu 11:31.

Rahaba wadiña wambukaku. Hadi yaaka yayivulu, watela watoñojokeleña hansañu yawaIsarela nihadi Nzambi yawu Yehova. Nzambi yawaIsarela wambukili chikupu nawanzambi awaKenani! Wadiña Nzambi walwilileña antu jindi bayi kuyikabishaku nawa walemesheli yililu yayiwahi yawakwakudifukula indi. Nzambi walemesheleña ambanda, nawa hakeñeleña nindi ayilandeña kudi antu anakukeña kwila nawu wuvumbi, kuyilandisha hela kuyizatisha mukudifukula kwakutwambaku. Rahaba chelukiliyi nindi aIsarela adiña kwishinadi daYodana nawa anakukeña kulukuka, watela wakameneni nankashi muloña welukili wanyi yuma yikumwekana antu jindi. Ilaña Yehova wamweni yuma yadiña mumuchima waRahaba nawa welukili nindi himuntu wamuwahi.

Makonu, kudi antu amavulu adi neyi Rahaba. Asusutaña muloña eluka wanyi mwakwilila hakwila nawu aleki yuma yatama kulonda atachiki kuyilemesha. Nsañu yaRahaba yatwanukishaña nawu wonsu wetu twalema kumesu aNzambi. Hela twadimonaña netu tudi amukunkulwayi, Nzambi “hekala kwakulehi nanetu ejimaku.” (Yililu 17:27) Wudi kwakwihi nawa nakukeña antu ejima amukuhwelelaña yayinki kuchiñeja. Komana Rahaba wadiña nachikuhwelelu?

WATAMBWILILI AKWAKWENDESHA ITUÑA

Ifuku dimu, henohu aIsarela kanda akuchiki musumba waYeriku, amayala ayedi ayili kudi Rahaba. Awa amayala atoñojokeleña nawu kwosi wukuyimona, ilaña antu amavulu adiña asoñama kulonda amoni ayilumbu anakufuma kudi aIsarela. Rahaba welukili swayi kwafuminuwu awa amayala. Rahaba wahayamini wanyi hakumona awa amayala anenzi hetala dindi, ilaña awa amayala akeñeleña hakukama bayi neyi nsañu yawunyakalwaluku.

Awa akwakwendesha ituña afumini muchilombu chawaIsarela. Yoshuwa wadiña mukulumpi wamashidika diyi wayitemesheli kuya nakutala  hakolela nihazeyela musumba waYeriku. Iwu diwadiña musumba watachi muKenani wakeñeleña kushindawu aIsarela nawa diwadiña wakola nankashi. Yoshuwa wakeñeleña kwiluka neyi antu amuniwu musumba akola. Akwakwendesha ituña atondeluhu kuya hetala daRahaba. Antu amuniwu musumba ashileñaku maana wanyi neyi enyi aya hetala dachivumbi. Awa amayala elukili nawu hadaha akutiyahu nsañu yikuyikwasha hampinji yikuhanjekañawu nindi.

Bayibolu yahoshaña nawu Rahaba ‘watambwilili antemesha chiwahi.’ (Yakoba 2:25) Wayiñijili mwitala dindi hela chakwila wayilukili niyuma yendeleluwu nawa wayitejeli nindi ashakami. Hadaha wakeñeleña kumwiluka Nzambi yawu Yehova.

Hohenohu, kwenjili antemesha afumini kudi mwanta wamuYeriku. Antu atiyili mbonji nawu kwitala Rahaba kunashikeni akwakwendesha ituña amuIsarela. Rahaba wadi kwiladi? Hadaha watachikili kutoñojoka nindi neyi yayikiña awa amayala wukudiñija mukukala hamu nichisaka chindi. Watoñojokeli nindi antu amuYeriku akuyijaha neyi chakwila wukuhemba awa ayilumbu. Dichi Rahaba washikeneni dakuyiluka awa amayala. Chineli Rahaba welukili nindi Yehova wabadika Nzambi kwadifukwileñayi, watela wafuukwiluhu kumukalakela Yehova.

Rahaba watoñojokeli swayi nawa wawanini njila mwakumanishila iku kukala. Wayilejeli awa amayala nindi aswami munsachi yafwalakisi yanyikiliyi hewulu detala dindi. Watachikili kuhosha nawantemesha jamwanta nindi: ‘Awa amayala mwalala enza kudami, ami kwami hineluka kwafumawuku. Hana helawu hiyakukeña kupata kuchisu chamukala, kuneli dehi bwi-i, awa amayala edika nikwidika. Kunayu awa amayala ami nelukuku wanyi. Yilondelenu lufuchi, mukuyikwata.’ (Yoshuwa 2:4, 5) Fwikijenu chatiyiliyi Rahaba hampinji yahosheleñayi nawantemesha jamwanta. Komana wajinokeleña nindi awa amayala akumwiluka nawu nakuzala mumuchima?

Kafuta kindi kazatikili! Awa antu jamwanta ayili lufuchi kumwaba waYodana. (Yoshuwa 2:7) Chayiluwu muchima waRahaba washakamini mwivumu. Kuzatisha kafunta kapela, wayidimbili awa ambanji ateleleli kubula kwiluka wunsahu walala nawa wapulwishili antu jaYehova abulili muloña.

Rahaba wayili lufuchi hewulu detala nakuyileja awa akwakwendesha ituña muneliyi. Wayilejeli nsañu yalema nindi: Antu jetu anafwi mutentu nawa anakuyichina. Akwakwendesha ituña atela azañaleli nankashi hakutiya iyi nsañu. Antu amuKenani atama atachikili kumutiya woma Yehova Nzambi yawaIsarela. Rahaba washimwini cheñi  nsañu yikwawu yalema nankashi kudi etu. Nindi: “Yehova Nzambi yenu yena diyi Nzambi wamwiwulu niwahanu heseki.” (Yoshuwa 2:11) Yuma yatiyiliyi hadi Yehova yamukwashi kwiluka yuma yejimiyi: Wateleli kumukuhwelela Nzambi yawaIsarela. Wamukuhweleleli Yehova.

Rahaba welukili chikupu nindi Yehova wukukwasha antu jindi kushinda. Dichi walembeli nindi amutiyili luwi, nindi yena niantaña jindi ayipulwishi. Akwakwendesha ituña etejeli, amwilili Rahaba nawu yahembi kajindilu nikukudika mwonji wuchinana hanjanina yambañu yamusumba kulonda amashidika akabuli kumujaha niantaña jindi.—Yoshuwa 2:12-14, 18.

Kudi chuma chalema chitwatela kudizila kudi Rahaba kutalisha hachikuhwelelu. Neyi chashimuna Bayibolu, “kukuhwelela kwafumaña hakutiya.” (Aroma 10:17) Watiyili nindi Yehova Nzambi wukweti ñovu nawa wukweti wuñanji, dihafumini hakumukuhwelela chikupu. Makonu, tweluka yuma yayivulu hadi Yehova. Komana tunakufwila kumwiluka nikumukuhwelela kushindamena hayuma yitwadizaña Mwizu dindi, Bayibolu?

MPWEMBU YAKOLA YAHUMUKILI

Awa akwakwendesha ituña elili mwayilejeluwu kudi Rahaba, azenzumukilili hambañu namwonji wakudikiluwu kunjanina nawa atemukililili kumpidi. Kukabeta kaluwunda kaYeriku kwadiña mayeñu kwayili nakuswamawu akwakwendesha ituña sampu nichalekeluwu ambanji kuyikeña nawa afuntili kuchilombu chawaIsarela nakushimuna mujimbu wawuwahi wayilejeliyi Rahaba.

Nkumininaku, antu amuYeriku afwili mutentu chatiyiluwu nawu Yehova wakoñeli chihayamisha hakumisha Kaloña kaYodana kulonda aIsarela azambuki hamaseki awuma. (Yoshuwa 3:14-17) Nawa iyi nsañu yamukwashili Rahaba kumukuhwelela Yehova chikupu.

Kufumahu, aIsarela atachikili kunyeñumuka musumba waYeriku hadi mafuku 6, kamu hefuku. Hefuku damuchitanu nachiyedi, kudi chuma chamwekeni. Neyi chitwashimuna hakutachika kwachinu chibaaba, aIsarela atachikili kunyeñumuka nantetemena, chelili amashidika ananyeñumuki dehi musumba, atwalekeluhu nakunyeñumuka musumba waYeriku. (Yoshuwa 6:15) Adi kwiladi Isarela?

Nkumininaku, chelili ananyeñumuki dehi mapampa 7 hefuku damuchitanu nachiyedi, amashidika emeni. Alekeli kuvumisha mpuña. Mumwena nikulu-u. Antu amuniwu musumba atela afwili nankashi mutentu. Chelili Yoshuwa yayinki chinjikijilu, amashidika awaIsarela abidikili katachi nañovu. Komana atulama adiña hewulu dambañu yaYeriku atoñojokeli nawu kanda amoneñahu dehi kulukuka kwamuchidiwu kwakubidika hohu? Neyi dichatoñojokeluwu, dikwila nawu atoñojokeluhu hohu chanti. Mbañu yeneni yatachikili kudidima. Yelili nyaji, yishiwuka nikushiwuka! Chelili lunkuñu lunamani dehi, kwashalili chibalu hohu chimu chambañu chabulili kuhumuka. Itala daRahaba dahumukili wanyi muloña wachikuhwelelu chindi. Fwikijenu chazañaleliyi chelili Yehova namupulwishi. * Antaña jindi niwena apulukili!—Yoshuwa 6:10, 16, 20, 21.

Antu jaYehova niwena amulemesheli Rahaba muloña wachikuhwelelu chindi. Chamwenuwu itala dimu hohu dichidi demana, elukili nawu Yehova wadiña naniwu mumbanda. Yena niantaña jindi apulukili kujilumuka kwamusumba watama. Chamanini njita, Rahaba amwitejeli kushakama kwakwihi nachilombu chawaIsarela. Mukuhita kwampinji, Rahaba wekalili kaYudeya. Wasumbukili naSalimoni. Mwana wavweluwu, Bowazi, wadiña nachikuhwelelu hama. Bowazi wasumbwili Luti kaMowabi. * (Luti 4:13, 22) Mwanta Davidi niyomweni Mesiya, Yesu Kristu, afumini muchisaka chaRahaba, chisaka chachikuhwelelu.—Yoshuwa 6:22-25; Matewu 1:5, 6, 16.

Mpanji yaRahaba yinakutuleja nawu wonsu wetu twalema kudi Yehova. Watumonaña wonsu wetu, watalaña munyichima yetu nawa watiyaña kuwaha neyi yamona nindi tukweti chikuhwelelu neyi chadiña naRahaba. Chikuhwelelu chidi chamukwashili. Neyi chahoshaña Bayibolu, ‘amuteneni kuloña nanyidimu.’ (Yakoba 2:25) Dichi twatela kwimbujola chikuhwelelu chindi!

[Tumazu twaheshina]

[Mwevulu wudi hefu 13]

Rahaba wamukuhweleli Nzambi yaIsarela

[Mwevulu wudi hefu 14]

Rahaba waswekeli antu jaYehova munsachi yafwalakisi, nawa washili wumi windi hakatoña