YUMA YALETAÑA MUZAÑALU MUCHISAKA

Hanjekenuña naMwanenu Chakadi Kuditaadikisha

“Mwanami wamumbanda hadiñayi nayaaka 14, watachikili kuleta winyi. Chinamwila nami, ‘Twaya wudi yakudya,’ yena nindi, ‘Nukudya neyi nakeñi.’ Chinamwihula neyi nakumishi dehi kukosa yeña, yena nindi, ‘Lekenu kunkabisha!’ Kakavulu twabombweleña.”—MAKI, JAPAN. *

Neyi yenu mwavwala iwu mwana, mwatela kudiwunjika nankashi muloña kukala kwamuchidiwu kunateli kuyimwesha kalula. Maria, wukweti mwana wudi nayaaka 14 washakamaña kuBrazil nindi: “Neyi mwanami wamumbanda yatachika nkusupisha, mashi ami abwakataña. Neyi tunahili twabobolaña.” Carmela, wakuItaly niyena dikukala kwamonañayi. Wahosheli nindi: “Mpinji yejima twabobolaña nankashi namwanami weyala, hakwila tuleki kubobola chiña yadishinkila mukapeka kindi.”

Muloñadi anyana chekalilañawu nantaadi yamuchidiwu? Ayidizishaña kudi akwawu? Hekwawu. Bayibolu yahoshaña nawu antu itwadikundaña nawu anateli kutukwasha hela kutuluwañesha. (Yishimu 13:20; 1 Akorinda 15:33) Yisela yayivulu yakeñawu atwansi makonu mwekala yililu yakudikaña nikubula kavumbi.

Ilaña kudi yuma yikwawu yimwatela kutoñojokahu nawa yakala wanyi neyi mwiluka chiyinateli kukwasha anyanenu. Talenu yakutalilahu.

MWANENU DIHANATACHIKIYI KUTOÑOJOKA CHIWAHI

Kapostolu Pawulu wasonekeli nindi: “Chinadiñi kansi nahoshelaña yawansi, natiyilaña mwawansi, natoñojokelaña yawansi; ilaña hanu hinakuli dehi, naleki dehi yuma yawansi.” (1 Akorinda  13:11) Neyi chashimwiniyi Pawulu, kutoñojoka kwawanyana niakulumpi kwambuka. Kwambuka ñahi?

Anyana elaña yuma chakadi kutoñojokahu chiwahi. Ilaña akulumpi atoñojokaña chikupu hachuma chinabuli kwilukawu kulonda eluki mwakwilila. Chakutalilahu, akulumpi atalaña hachuma chinaleteshi ochu chuma chimwekani nawa atoñojokaña chikutiyawu akwawu neyi afuukulahu chatama. Enjilila kutoñojoka muniyi njila. Ilaña anyana hiyatoñojokaña muniyi njilaku.

Bayibolu yakoleshaña atwansi nawu ekali ‘nayitoñojoka yakashinshi.’ (Yishimu 1:4) Bayibolu yakoleshaña akwaKristu ejima kuzatisha ‘yitoñojoka’ yawu. (Aroma 12:1, 2; Aheberu 5:14) Mpinji yikwawu, mwanenu wukutachika kuyitaadikisha nihakachuma kanyanya muloña wayitoñojoka yindi yawansi. Hela wukuyileja chuma chinakukeña kwilayi ilaña chaluwa. (Yishimu 14:12) Neyi mwanenu nenzi, munateli kuhanjeka nindi ñahi chakadi kuditaadikisha?

ESEKENU KUZATISHA IYI NJILA: Mwatela kwiluka nenu mwanenu dihanatachikiyi kutoñojoka chiwahi, hadaha nakuhoshamu hohu wukwilamu wanyi. Mwesekenu, sambilenu kumuhameka hayuma yinafuukuliyi. (“Wunatoñojoki chiwahi hela chakwila neteji wanyi muwunafuukuli.”) Mukwashenu kutoñojoka hayuma yinafuukuliyi. (“Wunatoñojoki neyi yuma yiwunahoshi yinateli kuzatika muyuma yejima?”) Mukudihayamina hakumona chikuhimpayi mwanenu yitoñojoka yindi.

Babalenu: Neyi munakuhanjeka namwanenu, bayi mutoñojoka nenu yuma yimunakuhosha diyalalaku. Hela chakwila mwanenu nakukaana mumunakuhosha, hadaha wukusendahu yikuma. Bayi muhayama hakumona mwanenu mukuhita kwamafuku yenza nakuhosha nindi nsañu yimwahosheli yena diyi wahosheli.

“Mpinji yikwawu naditaadikishaña namwanami weyala hatuyuma twamukunkulwayi hohu, chidi neyi kubula kukisañana yuma nikumuseha muhelindi. Kakavulu wenzaña nakuñihula hayuma yatoñojokañayi nindi waluwañesha, wukutiya nindi, ‘Dichi chadiña’ hela ‘Dichimunakutoñojoka.’ Neyi nahosheleña muniyi njila, kachi hitwaditaadikishaña nankashuku.”—Kenji, Japan.

MWANENU NAFUUKULI YUMA YINAKUKEÑA KWILAYI

Mudi namudimu weneni wakukulisha mwanenu chiwahi muloña neyi nafumi hetala yakatweshi kudihemba chiwahi. (Kutachika 2:24) Hakwila yakashakami chiwahi mwatela kumuleja yuma yatela kumukwasha kulonda yakekali muntu walumbuluka. Mwana wunafuukuli dehi chakekalayi kumbidi welaña hohu yuma chakadi kutoñojoka hayuma yakafumamu. Watela kudihula cheñi nindi: ‘Natela kwikala muntu wamuchidinyi? Yililwinyi yinikweti? Indi muntu wukweti yililu yamuchidiwu nateli kwila ñahi nakukala kwamuchidiwu?’—2 Petulu 3:11.

Bayibolu yatulejaña hadi Yosefu, mukwenzi wadiña nayililu yayiwahi. Chakutalilahu, chelili ñoda Potifwari yamwili nindi yeli nindi wuvumbi, Yosefu wakwili nindi: “Nukutwesha ñahi kukoña chumichi chasweja kutama nakumuvulumuna Nzambi?” (Kutachika 39:9) Hela chakwila hayina mpinji aIsarela adiña kanda ayinki lushimbi lwakaanishili kwila wuvumbi, Yosefu welukili nindi Nzambi wahela wuvumbi. Mazu akwila nawu “nukutwesha ñahi” anakumwekesha nawu wamweneña yuma neyi chayimonañayi Nzambi.—Aefwesesa 5:1.

Mwanenu niyena dihanakutachikayi kwikala nayililu yayiwahi. Nakwila chiwahi muloña chumichi chikamukwasha kushinda ikakeja dawakwawu nikubula kuyilondela. (Yishimu 1:10-15) Cheñi nawa neyi yatachika kutoñojoka muniyi njila chikumuleñela yatachiki kutaadika yuma yimunakuhosha. Neyi chuma chamuchidiwu chinamwekani, mukwiladi?

ESEKENU KUZATISHA IYI NJILA: Chatela muditaadikisheña, hoshenu mazu anahoshiyi. (“Nlumbulwili chiwahi. Wunakuhosha neyi . . .”) Mwihulenu cheñi malwihu. (“Muloñadi chiwunahosheli ochu?” hela “Chumanyi chinaleteshi wufuukuli mwenimu?”) Mulejenu mwanenu yekali wakasunuka. Mwilenu yalumbululi munafuukuliyi. Neyi chuma chinafuukuliyi munachikeñi wanyi ilaña yena nachikeñi nawa hanafumpi lushimbuku, mwatela kulondela munafuukuliyi hela chakwila himuneteji munafuukuliyuku.

 Kwikala nayililu yayiwahi nikufuukula diyuma yinateli kumukwasha nankashi. Bayibolu yalejaña akwaKristu nawu bayi ekala neyi anyana “akubankañila niniku niniku, nakulelujoka nampepela jakuleja kwawantu jejima.” (Aefwesesa 4:14) Dichi itejenu nawa mukoleshenu mwanenu kwikala nayililu yayiwahi nikufuukula chiwahi.

“Neyi mmwekesha kudi anyanami nami inakutiyilila munakuhoshawu, niwena alondelaña mwinahoshi hela chakwila wena anatoñojoki mwacheñi. Hinayikakejaña nami atoñojokeña neyi chinnakutoñojokaku, ilaña nakeñaña adifuukwileña aweni.”—Ivana, Czech Republic.

IMIKENU MUSHINDU NAWA IKALENU AMWOVU

Kufwana nyana yanyanya, atwansi amakwawu ekala nachaaku chakuhanjeka hansañu yoyimu kulonda anvwali jawu eteji munafuukuluwu. Neyi diyuma yamwekanaña mwitala denu, babalenu. Hela chakwila mukuleta kuwunda hakapinji neyi mwiteja munafuukuluwu, mwanenu wukwiluka nindi hakwila yeli chuma chinakeñiyi chiña yaleta ntaadi. Mwatela kwiladi? Londelenu kufumba kwaYesu kwakwila nawu: “Kuminenu dakwila nenu, Eña, eña; Nehi, nehi.” (Matewu 5:37) Anyana akuleka kuleta ntaadi neyi eluka nawu munemiki mushindu.

Ilaña mwatela kwikala amwovu. Mulejenu mwanenu yalumbululi chinatoñojokeliyi nindi mwatela kuhimpa mpinji yimwamuleja kushika hetala. Neyi muhimpa hichinayi mukwila nawu mwazeyaku ilaña munakulondela kufumba kwamuBayibolu kwahoshaña nawu: “Mwekeshenu kwovwaha kwenu.”—Afwilipi 4:5.

ESEKENU KUZATISHA IYI NJILA: Hanjekenu nachisaka chejima hansañu yakuhimpa mpinji yakushika hetala nihanshimbi jikwawu jahetala. Tiyililenu munakuhoshawu nikutoñojoka hayikuma yejima henohu kanda mukasi lushimbi. Roberto tata yawantu wakuBrazil nindi: “Anyana atela kumona nawu anvwali jawu akwiteja chuma chinakukeñawu neyi hiyanafumpi nshimbi jamuBayiboluku.”

Kwosi nvwali wawanina. Bayibolu yahoshaña nawu: “Wejima wetu twaluwaña muyuma yayivulu.” (Yakoba 3:2) Neyi yenu munaleteshi ntaadi, nyakalenu kulomba kwanakena kudi anyanenu. Neyi mwiteja yiluwa yenu mukumwekesha nenu mwadizoza nawa anyanenu akuyimbujolaña.

“Hanyima yakuditaadikisha, nawa neyi muchima wunawundi dehi, nalombaña kwanakena kudi mwanami muloña wakulendumoka kwami. Niyena wawundishaña muchima nawa chamukwashaña kutiyilila neyi inakuhosha.”—Kenji, Japan.

[Tumazu twaheshina]

DIHULENU NENU . . .

▪ Yumanyi yinelaña yaleteshaña niditaadikisheña namwanami?

▪ Indi nsañu yidi muchinu chibaaba nukuyizatisha ñahi kulonda nitiyeña munakuhoshayi mwanami?

▪ Natela kwiladi kulonda nihanjekeña namwanami chakadi kuditaadikisha nindi?

[Mwevulu wudi hefu 10]

Anvwali amaana akwashaña anyanawu kwikala akasunuka hakuhosha munafuukuluwu