MUTU WUDI HEFU DATACHI | KOMANA NZAMBI WALEMA MUCHIHANDILU CHETU?

Muloñadi Chitwehwilaña?

“Komana mwatoñojokaña nenu Nzambi walema wanyi muchihandilu chenu? Dichatoñojokañawu antu amavulu.” Awa mazu ayisonekeli hayipamba yamaneni yafweteleluwu kudi antu abula kumukuhwelela Nzambi. Mumatuña amavulu, antu amavulu atoñojokaña nawu Nzambi walema wanyi muchihandilu chawu.

Cheñi nawa, antu amavulu ahoshaña nawu amukuhwelela Nzambi eleña yuma neyi kwiji Nzambi kwosi. Salvatore Fisichella, mukulumpi wawashikofu amuKatolika, wahosheli kutalisha hadi antu amukatolika nindi: “Neyi tudishinshika etu aweni kwosi muntu wukutwiluka nindi tudi akwaKristuku muloña nshakaminu yetu yidi neyi yawantu abula kwitiya.”

Amakwawu hiyasha maana kudi Nzambuku. Atoñojokaña nawu wekala kwakulehi nawa hanateli kuyikwasha muchihandilu chawuku. Antu amuchidiwu amukeñaña hohu Nzambi neyi adi mukukala hela kudi chuma chinakukeñawu, neyi kwiji Nzambi hiñamba yawu watela kutambikawu kala mpinji.

Antu amakwawu atoñojokaña nawu yuma yatañishaña akwansakililu yamukunkulwayi nawa elaña wanyi mwayilejañawu mumachechi awu. Chakutalilahu, mapesenti 76 awaKatolika akuGermany ahoshaña nawu eyala namumbanda anakushakama hamu henohu kanda adisumbuli anakuluwañesha wanyi, yitoñojoka yeniyi yambuka chikupu nayuma yatañishañawu muchechi yawu nimuBayibolu. (1 Akorinda 6:18; Aheberu 13:4) Bayi neyi aKatolika hohu diwu amonaña nawu anakukañanya kulondela yuma yayidizishañawuku. Akulumpi jamachechi amavulu adishonaña nawu antu jawu adi tuhu neyi “antu abula kumukuhwelela Nzambi.”

Iyi yakutalilahu diyaleteshaña hitukudihula netu: Komana Nzambi walema chikupu muchihandilu chetu? Iku kukala kwatachikili dehi. Atachikili kukwishimuna mumukanda watachi wamuBayibolu. Hakwila tuwani ñakwilu yanilu lwihu, tusambilenu kuhanjeka hayuma yashimunawu mumukanda wamuBayibolu waKutachika.