MUTU WUDI HEFU DATACHI | KOMANA NZAMBI WALEMA MUCHIHANDILU CHETU?

Muloñadi Nzambi Chalemenayi Muchihandilu Chetu?

Ankuluñaña eluka yitoñojoka yawantu atulejaña nawu hakwila antu ekali namuzañalu atela kwiluka yuma yakuspiritu. Antu akeñaña kwila chuma chinakufwilawu hela kuzatila muntu hela kwila yuma yatela kuyizañalesha. Hakwila adizañaleshi, amakwawu azatishaña mpinji yawu kutala yileñaleña, kuleñaleña yuma, kudiza chakuvumisha tumina nikwimba, nikudiza hanyitondu nianyama. Hela chakwila elaña yuma yamuchidiwu, hiyawanaña muzañalu wawenuku.

Chineli antu ekala nampwila yakudiza chalala, hichayihayamishaña antu atañaña Bayiboluku. Tupetulu twatachi mumukanda waKutachika twashimunaña nawu chelili Nzambi naleñi dehi antu ayedi atachi, wahanjekeleña nawu mpinji yejima kulonda ekali nawubwambu wawuwahi nayena. (Kutachika 3:8-10) Nzambi haleñeli antu nindi adishakamineña nkawawuku, ilaña akweti mpwila yakuhanjeka naNleñi yawu. Kakavulu Bayibolu yahoshaña haniyi mpwila.

Chakutalilahu, Yesu wahosheli nindi: ‘Antu akweti mpwila yakuspiritu anakooleki.’ (Matewu 5:3) Awa mazu anakumwekesha nawu hakwila twikali namuzañalu waweni twatela kumanisha mpwila yetu yakuspiritu. Tunateli kuyimanisha ñahi? Yesu wakwili nindi: “Muntu hakuhanda namankendi hohuku, chiña namazu ejima akufuma mukanwa kaNzambi.” (Matewu 4:4) Indi yuma yafumaña mukanwa kaNzambi hela netu yitoñojoka hela nshimbi jaNzambi jekala muBayibolu jatukwashaña ñahi kwikala namuzañalu muchihandilu chetu? Tuhanjekenu hanjila jalema jisatu.

Twakeñaña Yatulomboleña Chiwahi

Makonu mukaayi mudi ankuluñaña amavulu akeñaña kufumba antu munsañu jawubwambu, kukeña, nsañu jayisaka, chakumanisha yikonkojola, chakwikala namuzañalu nichakushakama chiwahi. Hanu dinu hinyi wunateli kuyifumba chiwahi antu kutalisha haniyi nsañu wamubadika Nleñi, Yehova Nzambi?

 Chakutalilahu: Neyi munalandi chuma chachiha, chidi neyi kamera hela kompyuta, muchikasha ashañamu kamukanda kasonekawu kudi atuñili ochu chuma, kakuyikwasha kulonda mwiluki chakuzatisha chuma chimunalandi. Bayibolu yidi neyi aka kamukanda. Himukanda watwinkawu kudi Nzambi Nleñi, washimunaña chatela kuhandawu antu. Iwu mukanda washimunaña yuma yitwatela kwila nichitunateli kuhetelamu.

Neyi mukanda chiwalumbululaña chiwahi chakuzatisha chuma, Bayibolu niyena yatusoñamishaña kulonda twiluki yuma yinateli kuluwañesha wumi wetu. Kufumba ninjila janyiketu jatulejañawu antu jamwekanaña neyi jajiwahi nawa jinateli kutukwasha, ilaña neyi tulondela mwatufumbañayi Nleñi yetu tukuhetelamu nankashi nawa tukwikala namuzañalu.

Hela chakwila Yehova Nzambi watwinkaña nshimbi nikutuleja mwakwilila, hatukanjikijaña nindi tujilondeleñaku. Chineli hiMukwakuhana wamuwahi, watulembelelaña nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi. Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.” (Isaya 48:17, 18) Neyi tutiyililaña mwatulejañayi Nzambi, tukwikala nachihandilu chachiwahi. Hakwila twikala nachihandilu chamuzañalu, twatela kumulemeshaña Nzambi.

Twakeñaña Kwiluka Chitwakabakenaña

Amakwawu amulemeshaña wanyi Nzambi muloña kudi yuma yomisha mbaña yayimwekenaña yambuka nantañishilu yahoshaña nawu Nzambi hikukeña. Chakutalilahu, ehulaña nawu: ‘Muloñadi antu amawahi chakabakenañawu?’ ‘Muloñadi anyana akadi muloña chavwalikilañawu nawufwayi?’ ‘Muloñadi chihandilu chichinakalili?’ Awa malwihu alema chikupu, neyi tuwana ñakwilu yanawa malwihu chihandilu chetu chikuwaha nankashi. Chatela tumutwikeña Nzambi muloña hamakabi itunakumona, tushinshikenu Izu daNzambi Bayibolu chidahosha haniyi nsañu.

Mukapetulu kamuchisatu kamukanda waKutachika, mwekala nsañu yahosha hadi Satana, wadibalumwini mukapela, wahuñumwini antu akusambila ayedi kumotoka nshimbi jaYehova Nzambi jayikanishiluwu kudya kumutondu wakwiluka nachu yayiwahi niyatama. Satana wamwilili Evu nindi: “Chalala, himwakafwaku; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.”—Kutachika 2:16, 17; 3:4, 5.

Awa mazu amwekesha nawu, Satana hahosheli hohu nindi Nzambi hintwambuku ilaña wahosheli cheñi nindi Nzambi wayuulaña antu chatama. Diyabolu wahosheli nindi neyi chakwila antu amutiyilila, akwikala nachihandilu chachiwahi. Indi iku kukala adi kukumanisha ñahi? Yehova wafuukwiluhu kuyinka mpinji kulonda ejima wawu amoni neyi nyiloña yamutwikiluwu  yalala hela yakutwamba. Nzambi wamwinkeli Satana niantu adiña kukabadi kindi mpinji kulonda amwekeshi neyi chakwila antu anateli kushakama chiwahi chakadi Nzambi.

Munamoni nenu mwahosheliyi Satana mwalala? Antu anateli kushakama chiwahi nikudiyuula chakadi Nzambi? Yihuñu, wuñanji waheña, yikatu nikufwa, wubanji, kuluwalala, njita niwubanji wukwawu wunahondeshi antu hayaaka yayivulu hiwunsahu wunakumwekesha nawu antu anakañanyi kudiyuula muloña amufutalela Nzambi. Chatela tumutwikeña Nzambi muloña netu diyi wunakukabisha antu, Bayibolu yashimunaña chuma chacheni chaletaña makabi nawu: ‘Muntu wayuulaña mukwawu muntu kulonda yamukatishi.’—Mukwakutañisha 8:9.

Kwesekeja nansañu yitunahanjekuhu, twatela kulomba kudi Nzambi kulonda yatuleji ñakwilu yamalwihu ehulañawu antu nichakamana makabi, hidimuku? Nzambi wakeladi?

Twakeñaña Nzambi Yatukwashi

Antu atachikili dehi kukeña kusubuka kuyikatu, kushinakaja nikufwa. Anombi mpinji yeneni niñovu nimali kulonda afumishuhu iku kukala, ilaña anakañanyi. Amakwawu atachikili kukeñakeña menji amagiki, kaseloki kafuntishaña antu kuwansi, hela yitumbu yatenañawu nawu Shangri-la, niyuma yikwawu. Yuma yejimiyi hiyazatikiluku.

Nzambi nakukeña antu ashakameña chiwahi nawa namuzañalu. Diyadiña nkeñelu yindi yatachi yakuleña antu nawa hayivulamenaku. (Kutachika 1:27, 28; Isaya 45:18) Yehova Nzambi watukana chikupu nindi mwejima mwakeñañayi kwila wakelamu. (Isaya 55:10, 11) Bayibolu yatulejaña chakanayi Nzambi nindi wakafuntisha Paradisa yajimbesheluwu antu atachi. Mumukanda wakukumisha wamuBayibolu twawanañamu awa mazu akwila nawu: “[Yehova Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 21:4) Indi Nzambi wakafumishahu ñahi yuma yejimiyi nawa tukahetelamu ñahi?

Mwana kaNzambi, Yesu Kristu, wadizishili atumbanji nindi alombeña kulonda nkeñelu yaNzambi ayili. Iku kulomba antu amavulu akwiluka nawa akwitenaña nawu Kulomba kwaMwanta. Awa diwu mazu ekala muniku kulomba: “Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9, 10) Wanta waNzambi diyi njila yakazatishayi Yehova Nzambi hakufumishahu yuma yejima yatama yafumaña muchiyuulu chawantu nikuleta ituña dadiha daloña dakaniniyi. * (Danyeli 2:44; 2 Petulu 3:13) Yumanyi  yitwatela kwila neyi tunakukeña kuhetela munichi chikaninu?

Yesu Kristu wateneni chuma chitwatela kwila nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Nzambi nateli kutukwasha kulonda tukadiluñishi wumi wahaya nyaka mwituña dadiha. Yumiyi yinateli kutuleñela twiteji netu, Nzambi walema muchihandilu chetu.

Ayinu himpinji Yakutoñojoka hadi Nzambi

Yaaka 2000 yinahituhu, kapostolu Pawulu walejeleña antu amuAtena adiña enzunuka yitoñojoka kutalisha hadi Nzambi hampinji yadiñayi haAreopagus, hela Mars Hill, muAtena nindi: “Yena diyi wenkaña antu wumi nimuuya niyuma yejima. Muloña mudi yena dimu mutwahandilaña, dimu mutwendelaña, dimu mutwekalilaña. Mwomwaneluwu akwakusoneka enwenu aweni amakwawu nawu, Twafuma kudi yena.”—Yililu 17:25, 28.

Nikulelu yuma yayilejeluwu antu amuAtena kudi Pawulu yichidi kumwekana. Nleñi yetu watwinkaña muuya wutonaña, yakudya nimenji itwanwaña. Hitukutwesha kuhanda chakadi yuma yayiwahi yatwinkañayi Yehovaku. Muloñadi Nzambi chayinkeleñayi antu ejima yumiyi hela amuhamekaña hela nehi? Pawulu nindi kulonda ‘amukeñakeñi Nzambi, hamwaha akamupapata, akamuwana, kutoña yena hekala kwakulehi nanetu ejimaku.’—Yililu 17:27.

Munakukeña kumwiluka Nzambi chiwahi nikwiluka nkeñelu yindi nimwatulejañayi chakushakama chiwahi chayinu mpinji nihaya nyaka? Neyi dichimunakukeña, hoshenu namuntu wayinkeli yinu magazini hela temeshelenu ansoneki ayinu magazini. Akutiya kuwaha kuyikwasha.

[Tumazu twaheshina]

[Mwevulu wudi hefu 7]

Nzambi nakukeña antu kwikala namuzañalu chayinu mpinji nihaya nyaka

[Mwevulu wudi hefu 4]

Kufwana kamukanda kahoshaña chitwatela kuzatisha chuma, Bayibolu yatulombolaña kuwumi

[Mazu ekoku adi hefu 5]

“Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi. Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.”—Isaya 48:17, 18

[Mwevulu wudi hefu 6]

MuBayibolu, mwekala nsañu yatulombolaña nawa yatukwashaña