Kufwa Hidikukuma kwaWantuku
MUTU WUDI HEFU DATACHI | KOMANA KUFWA DIKUKUMA KWAWANTU?
Kufwa Hidikukuma kwaWantuku
Betani wadiña mukala wanyanya hekala jikilomita 3 kufuma kuYerusalema. (Yowanu 11:18) Chikwashalili nyilungu yantesha hakwila Yesu yafwi mwamwekeni kukala. Lazaru, ibwambu daYesu wakeñeliyi wakatili nankashi nawa wafwili.
Yesu chatiyiliyi iyi nsañu, wayilejeli atumbanji twindi nindi Lazaru nakami mutulu nawa nukuya nakumuhindwisha. (Yowanu 11:11) Ilaña atumbanji twaYesu hiyelukili mwatalishiliyuku, dichi Yesu wayilumbulwilili nindi: “Lazaru wafwa dehi.”—Yowanu 11:14.
Chamujikiluwu Lazaru mwahitili mafuku awana, Yesu wenjili kuBetani nakumukundeja Mata, muhela Lazaru. Mata nindi, “Neyi eyi wadiñi kunu, mutenowu mana kwami hanafuku.” (Yowanu 11:17, 21) Yesu wakwili nindi, “Yami kusañuka; Yami kuhanda. Muntu wankuhwelelami, hela wukufwa wakahanda.”—Yowanu 11:25.
Hakwila yamwekeshi nindi mazu ahosheliyi alala, Yesu wayili kwijamu nawa wabidikili nindi: “Eyi Lazaru, idikakumu!” (Yowanu 11:43) Antu adiñaku ahayamini chikupu hakumona Lazaru nasañuki.
Henohu kanda yamusañuli Lazaru, Yesu wasañwili cheñi antu ayedi. Mpinji yimu Yesu wasañwili kansi wamumbanda mwana kaJayirusa. Henohu kanda yamusañuli iwu kansi wamumbanda, Yesu wahosheli cheñi nindi wudi mutulu.—Luka 8:52.
Chafwiluwu awantu ayedi, aLazaru nimwana kaJayirusa, Yesu wahosheli nindi “anakami mutulu” mumajamu. Wazatishili chakutalilahu chachiwahi. Muloñadi? Muntu wudi mutulu helukaña yuma yinakumwekanaku nawa hikunooka kwakubula kutiya kukata hela kukabakana. (Mukwakutaŋisha 9:5; talenu chikasha chinakuhosha nawu, “Kufwa Kudi Neyi Tulu Twakuketula Mutu.”) Atumbanji twaYesu akusambila elukili mwekalilawu afu. Mukanda waEncyclopedia of Religion and Ethics wahosha nawu, “Atumbanji twaYesu amweneña kufwa neyi tulu, niijamu neyi iluña dakunookela . . . antu afwili nachikuhwelelu.” *
Twatiyaña kuwaha hakwiluka netu afu akama mumajamu nawa hiyanakukabakanaku. Tweluka chamwekanaña neyi tunafwi nawa hitwatela kutiya womaku.
‘NEYI MUNTU NAFWI, WAKAHANDA CHEÑI?’
Hela chakwila twatiyaña kuwaha kukama tulu nawufuku, hinyi wakeñaña kukama haya nyaka? Tuneluki ñahi netu afu adi mumajamu akasañuka neyi chasañukiluwu aLazaru nimwana kaJayirusa?
Nkakulula Yoba wehwili lwihu lwamuchidiwu chelukiliyi nindi keña yofwi. Wehwili nindi, ‘Neyi muntu nafwi, wakahanda cheñi?’—Yoba 14:14.
Chahosheleñayi hadi Nzambi Wabadika, Yoba wadakwili yomweni nindi: “Wadi kutambika, ami nadi kwitiya; wunafwili mudimu wakumakaseyi.” (Yoba 14:15) Yoba welukili chikupu nindi Yehova wafwilaña kusañula antu Jindi ashinshika. Komana Yoba watoñojokeleña hachuma chikabula kumwekana? Inehi.
Yesu chasañwiliyi antu wamwekesheli hatooka nindi Nzambi wamwinka ñovu yakufumishahu kufwa. Bayibolu yahoshaña nawu Yesu wukweti “nsapi jakufwa.” (Chimwekeshu 1:18) Dichi Yesu wakakiyilula mpwembu jakumajamu neyi chochalejeliyi antu kufumishaku ilola danjikiluwu kwijamu daLazaru.
Bayibolu yahosha nankashi hachikaninu chakusañuka. Kañelu wamukanini kaprofwetu Danyeli nindi: “Wakanooka, wakemana mwiseka deyi kwakakumina mafuku.” (Danyeli 12:13) Yesu walejeli aSadusi, anlomboli awaYudeya akaanineña chikaninu chakusañuka nindi, ‘Mwaluwa; kuluwa kwenu kunafumi hakubula kwiluka nyikanda yajila, hela ñovu yaNzambi.’ (Matewu 22:23, 29) Kapostolu Pawulu wahosheli nindi: “Namukuhwelelaña Nzambi . . . nami kwamba kekala kusañuka kwawaloña nikwawabula kuloña.”—Yililu 24:15.
MPINJINYI YAKASAÑUKAWU AFU?
Mpinjinyi yakasañukawu antu aloña niabula kuloña? Kañelu wamulejeli Danyeli waloña nindi wakasañuka “kwakakumina mafuku.” Mata niyena wakuhweleleli nindi mana kwindi Lazaru “wamba kasañuka, hamba kasañukawu afu hefuku dakukuminina.”—Yowanu 11:24.
Bayibolu yesekejaña indi ‘ifuku dakukuminina’ nachiyuulu chaWanta waKristu. Pawulu wasonekeli nindi: “Chiña [Kristu] akayula yule-e, nichamba kadatayi ayilumbu jindi ejima. Chilumbu chakukuminina akanoñeshayi, yowu kufwa.” (1 Akorinda 15:25, 26) Dichi twalombelaña netu Wanta waNzambi winzi nimuchima waNzambi awili hamaseki. *
Yoba welukili nindi Nzambi wakeñaña kusañula afu. Chidikashika dina ifuku, kufwa akakwifumishahu. Kwosi muntu wakehula cheñi nindi, ‘Kufwa Dikukuma kwaWantu?’
[Tumazu twaheshina]
^ Izu daLunda ‘damajamu’ dafuma kwiizu dachiGiriki dalumbuluka nawu ‘malalu’ izu dazatishileñawu akwaKristu akusambila kutalisha kumaluña kwajikileñawu antu.
^ Neyi munakukeña kudiza nsañu yayivulu yahosha haWanta waNzambi, talenu kapetulu 8 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova.
[Chikasha chidi hefu 6]
Kufwa Kudi Neyi Tulu Twakuketula Mutu
“Antoneshi mesu ami nakenda kakama tulu twakufwa.”—Masamu 13:3.
‘Ibwambu detu Lazaru nakami dehi mutulu, ami hinukuya nakamuhindwishi.’ Kuhiñahu atumbanji hiyakumwila nawu, ‘Eyi Mwanta, neyi nakami mutulu wukuhinduka. Komana Yesu wateneneña nindi nafwi.’—Yowanu 11:11-13.
“Davidi, chamanishiliyi kukalakela akwawu ahanyaka yindi mwaya mpuña yaNzambi, wayili mutulu [twakufwa].”—Yililu 13:36.
“Kristu amusañula dehi mudi afu, nekali dehi nyikabu yatachi yawenawa anakami tulu.”—1 Akorinda 15:20.
“Hitunakeñenu kuyamba nsañu yawakwetu anakami dehi tuluku, kulonda mubuli kutiya wushona, neyi chatiyañawu antu acheñi anabuli hakuchiñejela.”—1 Atesalonika 4:13.
[Chikasha chidi hefu 7]
Afu Akasañuka
‘Afu eyi akahanda; yibimbi yawu yakasañuka. Tonenu mwimbi tumina.’—Isaya 26:19.
“Amavulu akama mulunkuñu lwamaseki akatona.”—Danyeli 12:2.
‘Mpinji yinakwinza yakela antu ejima adi mumajamu achanukishu akatiya izu dindi nawa akedikamu.’—Yowanu 5:28, 29.
[Mwevulu wudi hefu 6]
“Eyi Lazaru, idikakumu!”
