MUTU WUDI HEFU DATACHI | KOMANA KUFWA DIKUKUMA KWAWANTU?

Mmuna yaKufwa

Kufwa hinsañu yaneñeshaña antu. Antu amavulu hiyakeñaña kukwitenaku. Ilaña wonsu wetu kwatushikenaña. Lumuna lwakufwa lwawambuka nawa lwayeña.

Hitunateli kudiloñesha hakwila tuumiki neyi tujimbesha anvwali, mwini kwetu hela mwanaku. Wubanji wunateli kumwekana chakukashimwisha nawa hampinji yayilehi. Hichidi namuloña nanjila yinafwilimu muntuku, kufwa kwayeña nawa mwafumaña jomisha mbaña.

Antonio, wajimbesheli atata yindi mumaposu ahamukwakwa wahosheli nindi: “Chindi neyi muntu nakiyi kwitala deyi nawa nasendi nsapi. Hiwukutwesha kufunta kwitalaku, hela tuhu hakapinji kantesha. Wukushala tuhu nakwanuka. Hiwukumona mwakwililaku. Hela chakwila wukweseka neyi wudiwuliku hamuloña wakwila chinakutamini, kwosi chuma chiwukwila.”

Dorothy wadiña nayaaka 47 wamweni kukala kwokumu, wafwishili nfumwindi nawa wakeñeleña kuwana ñakwilu. Hela chakwila watañishileña anyana kuSande siku nindi muntu neyi nafwi watwalekañahu kuhanda, welukili wanyi chuma chamwekanaña neyi muntu nafwi. Wamwihwili ntañishi wamuchechi yaAngilican nindi, “Chumanyi chatumwekenaña neyi tunafwi? Wakwili nindi, “Kwosi muntu weluka. Tutalileña hohu.”

Komana twatela ‘kutalilaña hohu’? Kudihu njila yikutukwasha kwiluka neyi kufwa dikukuma kwawantu?