KUHANJEKA NAMWINIITALA

Muloñadi Nzambi Chetejelayi Makabi?

Iyi mpanji yinalondeluhu diyavula kuhanjekawu aYinsahu jaYehova nawantuñi nawu. Tufwikijenu Chinsahu wejina daMayiji nayi kwitala damumbanda wejina daSofiya.

INDI NZAMBI WATIYAÑA ÑAHI CHITWAKABAKANAÑA?

Mayiji: Mudi ñahi aSofiya. Natiyi kuwaha chinnayiwani hetala.

Sofiya: Chinawahi chimunenzi.

Mayiji: Ifuku dinenjili, twahanjekeli hamutu wahosheleña nawu indi Nzambi watiyaña ñahi chitwakabakanaña? * Mwahosheli nenu munatoñojoki haniyi nsañu hadi tukweji twatuvulu, sweje-e kufuma hampinji yadikatishiluwu amama yenu muwubanji wahamukwakwa. Ntahi amama yenu adi ñahi?

Sofiya: Anakwila tuhu lelu dawalwa kumadiki dashikwa. Ilaña dalelu anatiyiku CHIWAHI.

Mayiji: Chachiwahi. Namoni yuma yinakuyikalila nankashi hakwila mutwalekuhu kwikala namuzañalu.

Sofiya: Dimu. Mpinji yikwawu najinokaña nami kwiji akakola indi kwiji.

Mayiji: Chatama mwani. Ifuku dinenjili nayihwili lwihu lwahosheleña nawu, muloñadi Nzambi chetejelayi makabi kutwalekahu neyi chakwila wukweti ñovu yakuyifumishahu.

Sofiya: Eña, inakwanuka.

Mayiji: Henohu kanda tuwani ñakwilu yamuBayibolu, tusambilenu kuhituluka muyikuma yitwahanjekeluhu.

Sofiya: CHACHIWAHI.

Mayiji: Neyi twanuka chitwahanjekeli, twadizili netu nimuntu washinshika wadiñaku kunyima niyena wehwileña muloña waweni Nzambi chetejelayi makabi. Ilaña Nzambi hamuzuwilili hela kumuleja nindi yekali nachikuhweleluku.

Sofiya: Dikatachi kutiyahu iyi nsañu.

Mayiji: Twadizili cheñi netu Yehova Nzambi waneñaña neyi yamona tunakukabakana. Chakutalilahu, Bayibolu yahoshaña nawu antu jindi chiyakabiluwu, “dimu mwakabiliyi yena nawa.” * Komana hitwazañalalaña hakwiluka netu Nzambi watiyaña kutama neyi tunaholokeli mumakabi?

Sofiya: Eña twazañalalaña.

Mayiji: Nkumininaku, twahanjekeli netu kutoñojoka hañovu jikwetiyi Nleñi yetu kwamwekeshaña nawu nateli kufumishahu makabi kala mpinji.

Sofiya: Diyi nsañu yinabula kwiluka chiwahi. Muloñadi Nzambi chetejelayi makabi henohu wukweti ñovu yakuyifumishahu?

HINYI WAHOSHELI MWALALA?

Mayiji: Hakwila tuwani ñakwilu yalwihu lwenu, tusambilenu kuhanjeka hamukanda wamuBayibolu waKutachika. Ntahi mwayiluka nsañu yaAdama, Evu nimukabu wayikaanishiluwu kudya?

Sofiya: Eña, nadizili iyi nsañu kuSande siku. Nzambi wayilejeli nindi bayi akadya kuniwu  mutonduku, ilaña wena adiili kumutondu wayikaanishiluwu.

Mayiji: Dimu. Tutalenu hachuma chaleñeleleli Adama naEvu avulumuni. Iyi nsañu yamwekeshaña muloña waweni wutwakabakenaña. Munateli kutaña mukanda waKutachika kapetulu 3, vasi 1 nakushika ku 5?

Sofiya: MWANI. “Hakwila kapela diyi wadiñi wasweja kubabala hadi anyama amumpata ejima eliliyi Yehova. Yena hakumwihula mumbanda, nindi, Chalala Nzambi nahoshi nindi, Nyitondu yejima yamwitempa bayi mwakayidyaku, tahindi? Mumbanda hakumwila kapela, nindi, Nyikabu yanyitondu yamwitempa tukutwesha kudya tuhu, hakwinza nyikabu yamutondu wekala mukachi ketempa, Nzambi nahoshi nindi, Bayi mwakayidyaku, hela kukwataku nehi, mwakenda kafwa. Kapela hakumwila mumbanda, nindi, Chalala, himwakafwaku; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.”

Mayiji: Kusakililaku. Tuhanjekenu chanti hanawa mavasi. Chatachi, talenu kapela wahosheli namumbanda, Evu. Bayibolu yahoshaña cheñi nawu Satana Diyabolu diyi wahosheli namumbanda kuhitila mudi kapela. * Satana wamwihwili Evu halushimbi lwamulejeluwu kudi Nzambi kutalisha hamutondu. Muneluki chuma chahosheliyi Nzambi nindi chakayimwekena neyi adya kumutondu?

Sofiya: Wahosheli nindi akafwa.

Mayiji: Dimu. Satana cheñi wamutwikili Nzambi muloña weneni. Talenu chahosheliyi: “Chalala, himwakafwaku.” Satana wamwilili Nzambi nindi hisakutwamba.

Sofiya: Kanda nitiyeñahu dehi nsañu yamuchidiwuku.

Mayiji: Satana chamwililiyi Nzambi nindi hisakutwamba, waleteli nsañu yakala nawa hakwila nawu iku kukala akwimanishi hateleleli kuhita mpinji. Munamoni chuma chaletesheli?

Sofiya: Aa-a. Neluki wanyi.

Mayiji: Chachiwahi, namoni nilumbululi ichi chikuma muniyi njila. Twili netu ifuku dimu ninza kudenu, hinukuyileja nami nekala nañovu nankashi kuyibadika. Munateli kwiluka ñahi nenu inakutwamba?

Sofiya: Twatela kwilahu chuma chimu kulonda tumoni wudi nañovu.

Mayiji: Munahoshi mwalala. Hadaha tunateli kukeña chikuñu chalema nankashi kulonda tumoni wukutwesha kuchinyamuna. Chakadi nikujina, tukwiluka wukweti ñovu.

Sofiya: Dimu.

Mayiji: Chumanyi chimwatela kwila neyi nihosha nami nashinshika kuyibadika chatela nihoshi nami nikweti ñovu? Chumichi chikukala, netu?

Sofiya: Eña.

Mayiji: Tunateli kwiluka wanyi neyi muntu washinshika kuhitila mukumuleja netu yanyamuni chikuñu chalema.

Sofiya: Dimu.

Mayiji: Dichi, hakwila twiluki muntu washinshika hakachi ketu hatela kuhita mpinji yeneni kulonda antu amoni wumu yodihi washinshika chikupu.

Sofiya: Munahoshi mwalala.

Mayiji: Tutalenu cheñi nsañu yidi mumukanda waKutachika. Komana Satana wahosheli nindi wukweti ñovu kubadika Nzambi?

Sofiya: Inehi.

Mayiji: Kachi Nzambi wamwekesheli hatooka nindi wukweti ñovu. Ilaña Satana wahosheli nindi washinshika chikupu kubadika Nzambi. Munjila yikwawu Satana wamulejeli Evu nindi, ‘Nzambi nakuyidimba, Ilaña ami inakuhosha mwalala.’

Sofiya: Iyi nsañu yinawahi nankashi.

Mayiji: Nzambi wukweti maana, welukili nindi hakwila yamanishi iku kukala hatela kuhita mpinji. Nkumininaku, antu akwiluka wahosheleña mwalala niwatwambileña.

MULOÑA WENENI

Sofiya: Chafwiliyi Evu, komana chumichi hichamwekesheli nawu Nzambi wahosheleña mwalalaku?

 Mayiji: Eña. Ilaña kudi nsañu yikwawu yabombelelumu mukukala kwaleteliyi Satana. Talenu cheñi havasi 5. Munamoni chuma chikwawu Satana chamulejeliyi Evu?

Sofiya: Wahosheli nindi neyi yadya mukabu, mesu indi akutona.

Mayiji: Dimu, nawa wahosheli nindi wukwikala ‘neyi chadiyi Nzambi, wakeluka niyayiwahi niyatama.’ Dichi Satana wahosheleña nindi Nzambi wayiswekeleña antu yuma yayiwahi.

Sofiya: Ichi dinu neluki.

Mayiji: Iku nikwena kwadiña hikukala kweneni.

Sofiya: Munatalishi mudihi?

Mayiji: Mazu ahosheliyi Satana atalisha mukwila nawu Evu niantu ejima anateli kushakama chachiwahi chakubula kuyiyuula kudi Nzambi. Yehova welukili nindi hakwila yamanishi iku kukala watela kumwinka Satana mpinji kulonda yamoni neyi mwahosheleñayi mwalala. Dichi Nzambi wamwiteja Satana kuyuula kanu kaayi hakapinji kantesha. Dichinaleñeli tumoneña makabi amavulu muloña Satana diyi wunakuyuula kanu kaayi bayi Nzambuku. * Ilaña kudi nsañu yayiwahi.

Sofiya: Hinsañwinyi?

Mayiji: Bayibolu yatulejaña nsañu yalala yayiwahi yiyedi kutalisha hadi Nzambi. Chatachi, Yehova watwakamenaña neyi tunakukabakana. Chakutalilahu, toñojokenu mazu aMwanta Davidi asonekawu haMasamu 31:7. Davidi wamweni makabi amavulu muchihandilu chindi chejima, ilaña talenu chahosheliyi halombeleñayi kudi Nzambi. Munateli kutaña iyi vasi?

Sofiya: Eña. Yinakuhosha nawu: “Nukutiya kuwaha, Nukuzañalala naluwi lweyi; muloña wamweni yihuñu yami; welukili munamwenaña kukala.”

Mayiji: Hela chakwila Davidi wakabakeneña, wazañaleli chelukiliyi nindi Yehova wamweneña yuma yejima yahitileñamu. Komana mwazañalalaña hakwiluka nenu Yehova weluka yuma yejima, chitwakabakanaña nikuneña hela antu amakwawu hiyatela kwilukaku?

Sofiya: Eña nazañalalaña.

Mayiji: Chamuchiyedi, Nzambi haketeja makabi itunakumona kutwalekahu haya nyakaku. Bayibolu yatañishaña nawu Nzambi keña yafumishuhu chiyuulu chatama chaSatana. Nawa wakafumisha yuma yejima yatama yinakumwekana, kushilahu nimakabi imunakumona nawamama yenu. Namoni nakenza iwu mulungu wunakwinza kulonda twakahanjeki muloña wutwatela kukuhwelela netu Nzambi keña yafumishihu makabi ejima. *

Sofiya: Nakatiya kuwaha kuhanjeka haniyi nsañu.

Komana kuduhu nsañu yamuBayibolu yimwajinokaña? Komana mwakeñaña kwiluka yuma yakuhwelelawu aYinsahu jaYehova? Neyi mwakeñaña kwiluka, bayi mushintajala kwihula Chinsahu chaYehovaku. Wakatiya kuwaha kuhanjeka nenu oyu nsañu.

[Tumazu twaheshina]