IMBUJOLENU CHIKUHWELELU CHAWU

Womikili Yihuñu

ELIJA wendeli muChinekineki chaYodana. Wendeli nyilungu yayivulu kufuma kuMpidi yaHorebi nakuya kukabeta kaluwunda. Chashikiliyi muIsarela, wamweni yuma chiyahimpikili. Iseki dabalokeleña nachaaña datachikili kwovwaha. Nvula yamusavu yatachikili kunoka, andimi atachikili kudima. Yumiyi yatela yamuzañalesheli iwu kaprofwetu, ilaña watoñojokeleña nankashi hadi antu. Muloña hiyadifukwileña kudi Nzambuku. Antu atwalekeluhu nakudifukula kudi Bayali, dichi Elija wateleli kuyikwasha. *

Kukamwihi namusumba waAbeli Mehola, Elija wamweni mukanka wawantu anakudima. Añombi makumi ayedi nawana ayikasili mujimpanda ayedi ayedi nawa nyikanka 12 yadiña nakudimina hamu mumusululu heseki dazowa. Elija wakeñeleña iyala wadimishileña mumukanka wakukumishaku. Wadiña diyi Elisha, iyala atondeluwu kudi Yehova kulonda yekali nswana yaElija. Elija watoñojokeleña nindi washalili nkawindi nakumukalakela Nzambi, dihafumini hakukeña kudimona naniwu iyala.—1 Anyanta 18:22; 19:14-19.

Komana Elija washintajalili kwanzañana nyidimu yindi, hela kwakamena nindi ifuku dimu akamusisa kudi mukwawu? Hitukuhosha netu dimwatoñojokeleñayuku, hela chochu watela wakamineña haniyi yuma. Muloña “wadiñi muntu watiyaña mutwatiyañetu.” (Yakoba 5:17) Hela wakameneni hela nehi, Bayibolu yahoshaña nawu: “Elija hakuhita kwadiñiyi hakumunatila ihina dindi hamujimba windi.” (1 Anyanta 19:19) Ihina daElija hadaha dadiña dachitembi chamukoku hela champembi davwalileñayi hewulu kulonda yamwekeshi nindi anamutondi kudi Yehova. Chuma cheliliyi Elija chakunatila ihina hachifwiji chaElisha chadiña namuchatalisha. Elija wovwahilili namuchima wejima lushimbi lwaYehova lwakumutonda Elisha kulonda yekali nswana yindi. Elija wamukuhweleleli Nzambi yindi nawa wamwovwahilili.

Iwu mukwenzi wakeñeleña chikupu nindi yamukwashi iwu kaprofwetu wachikulumpi. Elisha hamuswanini Elija hohenohuku. Ilaña, wamwekesheli kudizoza hakwenda naniwu kaprofwetu wachikulumpi nikumukwasha hadi yaaka 6, chimwahitili mafuku amwilukili nawu diyi ‘wechilileña meji kumakasa aElija.’ (2 Anyanta 3:11) Elija watiyili kuwaha hakwikala nankwashi wadikita. Awa amayala ayedi ekalili amabwambu. Kudikolesha kwadikolesheleñawu kwayikwashili kuumika hela chakwila amweneña yihuñu yaswejeli mwituña. Sweje-e mwanta watama Ahabi diyi waswejeli kuyikabakesha nankashi.

Anenu nawa munakumona yihuñu? Wonsu wetu tunakuyimona mudinu ituña datama. Munateli kuumika neyi mwikala nebwambu wamukeña Nzambi nankashi. Munateli kudizilaku yuma yayivulu kuchikuhwelelu chaElija neyi munakumona yihuñu.

‘NYAMUKAKU WUYI NAKUMUBULAKANA AHABI’

Elija niElisha azatili nañovu hakukwasha antu kulonda adifukuleña kudi Nzambi. Atela adizishileña  atuprofwetu amakwawu adipompesheleña mutumazanvu nakudiza. Mukuhita kwampinji, Elija amwinkeli mudimu wukwawu kudi Yehova nindi: “Nyamukaku wuyi nakumubulakana mwanta wawaIsarela Ahabi.” (1 Anyanta 21:18) Chumanyi cheliliyi Ahabi hakwila ayi nakumuwana?

Mwanta wekalili mukwakusekesha nawa diwaswejeli kutama hadi anyanta amuIsarela. Wasumbwili Yezebeli nawa waleñelelili antu amavulu mwituña adifukuleña kudi Bayali, nimwanta yomweni watachikili kudifukula kudi Bayali. (1 Anyanta 16:31-33) Mutushidikilu twaBayali mwadiña yaaku yalusemu, wunyakalwalu nikulambula anyana. Cheñi, Ahabi wafumini tuhu hakufumpa lushimbi lwaYehova lwakujaha Mwanta watama wakuSiriya Benihadadi. Ahabi wakaanini kumujaha muloña wakeñeleña kwikala namali. (1 Anyanta, kapetulu 20) Haniyi mpinji, Ahabi niYezebeli aswejeli lwisu, kufwila maheta nimadombu.

Ahabi wadiña nachipañu muSamariya nawa chadiña chipañu cheneni nankashi. Wadiña cheñi nachipañu muYezereyeli, hadiña makilomita 37. Kwakwihi nanichi chipañu chamuchiyedi kwadiña itempa danyivinyu. Ahabi wakeñeleña kutambula idi itempa dadiña deyala wejina daNaboti. Ahabi wamutambikili Naboti kulonda yamwinki mali hela kumwinka itempa danyivinyu dacheñi. Naboti wahosheli nindi: “Chinjila kumesu aYehova ami kukwinka wuswana wawankakulula jami.” (1 Anyanta 21:3) Komana Naboti wadiña wachinchika? Hakameneni wumi winduku? Amavulu dichahoshañawu. Wovwahilileña Lushimbi lwaYehova, lwahishili aIsarela kulandisha mpata yawuswana yachisaka. (Alevi 25:23-28) Naboti wakaanini kufumpa Lushimbi lwaNzambi. Wadiñi iyala wahamuka nawa wachikuhwelelu, muloña welukili chikupu nindi kukaana munahoshiyi Ahabi hikusha wumi hakatoña.

Ilaña Ahabi wadiwili Lushimbi lwaYehova. Wayili kwitala dindi “namuchima walema” muloña amukaninini kumwinka itempa. Twatañaña nawu: “Hakukama hakadidi kindi, hakufutalelaku, nikudya yakudya kwonti kwindi.” (1 Anyanta 21:4) Yezebeli chamweniyi nfumwindi naminuni nyivumbu neyi kana kanyanya kanahili, wakwatili kafunta swayi kulonda yamwinki chuma chakeñeleñayi nikujilumuna chisaka chaloña.

Mukuhayama neyi mutaña nsañu yahosha hakafunta katama kakasiliyi Yezebeli. Mwadi Yezebeli welukili nindi Lushimbi lwaNzambi lwakwila nawu hakwila muntu amufwishi namuloña hatela kwikala ayinsahu ayedi akwiteja nawu iyi nsañu yalala. (Kuhituluka 19:15) Dichi wasonekeli mukanda mwijina daAhabi nakuleja akulumpi amuYezereyeli kulonda akeñi antu ayedi akumutwambila Naboti nawu watukeni, nawa watela kufwa. Kafunta kindi kazatikili. Antu ayedi “amukunkulwayi” amutwambilili Naboti nawa amwasili malola nichafwiliyi. Anyana kaNaboti awamayala ayijahili niwena. * (1 Anyanta 21:5-14; Alevi 24:16; 2 Anyanta 9:26) Ahabi wakañenyi kuzatisha ñovu  jindi neyi mutu wetala hakumwiteja ñodindi kwila yuma yejima yakeñeleñayi nikujaha antu akadi muloña.

Toñojokenu chatiyiliyi Elija chamulejeluwu kudi Yehova yuma yakoñeliyi mwanta nimwadi. Twaneñaña nankashi neyi tumona antu atama anakukabisha antu akadi muloña. (Masamu 73:3-5, 12, 13) Makonu, tunakumona yuma yomisha mbaña, mpinji yikwawu niantu ahoshaña nawu amwimenañaku Nzambi diwu anakuyila. Hela chochu, iyi nsañu yinateli kutukundeja. Bayibolu yatulejaña nawu Yehova wamonaña yuma yejima. Kwosi yuma yaswamaku. (Aheberu 4:13) Neyi namoni yuma yatama welañadi?

“EYI CHILUMBU CHAMI, WUNAWANI DEHI”

Yehova wamutemesheli Elija kudi Ahabi. Nzambi wamulejeli hatooka nindi: “Owu wudi mwitempa daNaboti.” (1 Anyanta 21:18) Yezebeli chamulejeliyi Ahabi nindi itempa danyivinyu dinekali dehi dindi, wanyamukili hohenohu nakuya nakuzañalala muloña wetempa datambwiliyi. Hatoñojokeluhu nijakwila nindi Yehova wamumweneñaku. Watela wahosheleña jajivulu hampinji yendeleñayi mwitempa danyivinyu, watoñojokeleña nindi idi itempa wukadiwahisha chikupu. Hohenohu Elija yoditula nikuditula. Ihama daAhabi dihimpika nikuhimpika, hamuloña wakusweja kuhila nindulu wahosheli nindi: “Eyi chilumbu chami, wunawani dehi.”—1 Anyanta 21:20.

Mazu ahosheliyi Ahabi amwekesheli nawu waluwañesheli muyedi. Chatachi, chelili yamuleji Elija nindi, “Wunawani dehi,” Ahabi wadimwekesheli nindi hadiña nakutoñojoka hadi Yehovaku. Yehova wadiña ‘wamuwana’ dehi. Wamumweni Ahabi chazatishileña wuswa windi chatama nichaluñileñayi nayuma yafumini mukafuta katama kaYezebeli. Nzambi wamweni mumuchima waAhabi nawu mwenzeli ntuuya yamaheta chakwila hadiña naluwi hela wuñanjuku. Chamuchiyedi, chelili yamuleji Elija nindi, “Eyi chilumbu chami,” Ahabi wamwekesheli nindi wamuheleli Elija ibwambu daYehova Nzambi wadi kumukwasha kuleka yuma yatama.

Tunateli kudizilaku yuma yalema kuwusupi waAhabi. Twatela kwanuka netu Yehova Nzambi wamonaña yuma yejima. Chineli hiTata yetu wukweti kukeña, welukaña neyi tunapwempuki munjila yaloña nawa wafwilaña kumona nindi tunahimpi. Hakwila yatukwashi, wazatishaña amabwambu  jindi, antu ashinshika ashimwinaña izu daNzambi kudi akwawu antu neyi chelileñayi Elija. Tukuluwañesha neyi tukumonaña amabwambu jaNzambi netu hiyayilumbu jetu.—Masamu 141:5.

Fwikijenu Elija nakumwakula Ahabi nindi: “Eña nakuwani.” Wamuwanini Ahabi muloña welukili nindi hiikombi, mukwakujahana nawa mukwakudikaña naYehova Nzambi. Elija wamwekesheli kuhamuka hakuhosha naniwu muntu watama. Elija wamulejeli Ahabi chuma chafuukwiliyi Nzambi. Yehova welukili yuma yejima yamwekeneña, antu atachikili kwila yuma yatama muloña wakutama kwachisaka chaAhabi. Elija wamulejeli Ahabi nindi Nzambi nahani lushimbi ‘lwakukomba chikupu,’ kujiyisha chisaka chejima. Yezebeli niyena akamujaha.—1 Anyanta 21:20-26.

Elija welukili nindi antu elaña yuma yatama akayibabesha. Ilaña antu amavulu makonu atoñojokaña nawu antu elaña yuma yatama akayibabesha wanyi. Iyi nsañu yamuBayibolu yatulejaña nawu Yehova Nzambi wamonaña yuma yamwekanaña nawa wakayibabesha ayiluwañimbi hampinji yatelela. Izu dindi datulejaña nawu ifuku dinakwinza hakafumishayi yuma yatama yejima. (Masamu 37:10, 11) Munateli kudihula nenu: ‘Komana wunsompeshi waNzambi washindamena hakubabesha hohu? Tahindi wamwekeshaña niluwi?’

“WUNAMONI CHANADIZOZIYI AHABI”

Hadaha Elija wahayamini hakumona Ahabi chelili natiyi dehi mazu awunsompeshi waNzambi. Bayibolu yatulejaña nawu: “Chatiyiliyi mazu owu hakutabola mahinindi, hakuvwala chikeleyi hamujimba windi, hakushakama nanzala, hakukama hachikeleyi, hakwenda nakudiwoña.” (1 Anyanta 21:27) Komana Ahabi wabalumukili mumuchima?

Tuneluki netu wahimpikiluku muyililu. Ahabi wadikehesheli, ichi chililu chayikalilaña akwakudinka wanta. Hanu dinu wabalumukili chikupu? Talenu chaambu chidi hadi Manase mwanta wakoñeli yiluwa yamaneni kubadika Ahabi. Yehova chamubabesheliyi Manase, wadizozeli, walombeli wukwashu kudi Yehova. Ilaña kudi chuma chikwawu cheliliyi. Wabalumukili chikupu nawa wafumishili yifwikija yatuñiliyi, kulonda yamukalakeleña Yehova, nawa walejeli antu jindi kufumisha yifwikija kulonda adifukuleña kudi Yehova. (2 Kushindulula 33:1-17) Komana Ahabi niyena dicheliliyi? Inehi.

Komana Yehova wamweni nindi Ahabi wamwekesheli kuneña hatooka? Yehova wamwilili Elija nindi: “Wunamoni chanadizoziyi Ahabi kumesu ami, tahindi? Ichi chanadizoziyi dehi kumesu ami, hinukumuletela yatama hamafuku induku; ilaña hamafuku amwanindi dihu hinakaletela mutaña windi yatama.” (1 Anyanta 21:29) Komana Yehova wamwanakeneni Ahabi? Inehi, Nzambi wadi kumutiyila luwi hohu neyi wabalumukili chikupu. (Ezekeli 33:14-16) Chineli Ahabi waneñeli nayuma yeliliyi, Yehova wamutiyililuku luwi. Ahabi amupulwishili hampinji yatombwesheluwu chisaka chindi chejima.

Hela chochu, Yehova hahimpili wunsompeshi winduku. Nkumininaku Yehova wayihwili añelu jindi kulonda ashimuni njila yayiwahi yakumudimbilamu Ahabi kulonda yakayi kunjita kwakamujahilawu. Nkumininaku, Yehova wamubabesheli Ahabi. Chamukatishiluwu kunjita, Ahabi wapwekeli mashi nakufwila mwikalu dindi. Nsona yabombelahu cheñi nsañu yikwawu yansonyi: Chakoseleñawu ikalu damwanta, atuwa atachikili kulasha mashi amwanta. Ichi chuma chamwekeni hatooka chamwekeshaña nawu izu daYehova damulejeluwu Elija nawu yamuleji Ahabi dashikijeweli: “Mwalashililuwu atuwa mashi aNaboti dimu mwakalashilawu nimashi eyeyi nawa.”—1 Anyanta 21:19; 22:19-22, 34-38.

Kufwa kwaAhabi kwayanukishili aElija, Elisha niantu amakwawu ashinshika hakachi kawantu jaNzambi nawu Yehova halalameneni kuhamuka nichikuhwelelu chaNabotuku. Nzambi wawuñaji hakañanyaña kubabesha antu avulumunañaku, chili hakushimbula ñahi, nawa hakañanyaña kutiyila antu luwi hakuyisompesha neyi chakwila anabalumukuku. (Kuchinda 14:18) Elija wadizili yuma yayivulu hadi yaaka yayivulu yomikiliyi muchiyuulu chamwanta watama. Mwaholokelahu dehi muyihuñu? Mwafwilaña kumona chakololayi Nzambi yuma? Dichi mwatela kwimbujola chikuhwelelu chaElija. Hamu namulundanindi washinshika Elisha, watwalekeluhu kushimwina mazu aNzambi, nikuumika yihuñu.

[Tumazu twaheshina]

[Mwevulu wudi hefu 13]

Elija wadizozeli hakutonda Elisha kulonda yekali nswana yindi

[Mwevulu wudi hefu 14]

“Eyi chilumbu chami, wunawani dehi”