Komana Nzambi Weteja—Nsakililu Kulombela Hamu?

“Komana nsakililu januñañeshaña antu tahindi jayambulaña?” Ilu dilwihu lwayihwiluwu antañi achipapilu chansañu chaThe Sydney Morning Herald. Hakachi kawantu akwili, antu akushika kumapesenti 89 ahosheli nawu nsakililu yambulaña antu.

ILAÑA antu ahoshaña nawu nsakililu yatela kulombela hamu atoñojokaña mwacheñi. Eboo Patel watachikili Izanvu Dawatwansi Dakulombela Hamu wehwili nindi: “Nlejenu nsakililu yabulaña kutiyila antu wushona . . . , yabulaña kukwasha antu . . . , yabulaña kumwekesha chisambu.”

Mpinji jikwawu, aBuddha, aKatolika, aProtestanti, aHindu, aMuzilemu ninsakililu jikwawu adipompeshaña kulonda awani njila yakumanishilamu wuzweñi, kwila kampeni kulonda antu abuleña kuyiyandisha, kukaanisha tupata hela kuhosha hansañu yakuhemba maluña. Nsakililu jajivulu japompaña nakuhanjeka chakuleta kuwunda nikudikolesha. Hayidika yeniyi ambulaña twandulu, adyaña yakudya nakunwa, kwimba, kulombelela nikwila yuma yikwawu.

Komana kubulakana kwamuchidiwu kwamanishaña yikonkojola yidi mujinsakililu? Komana kulombela hamu diyi njila mwakaletelayi Nzambi ituña dadiwahi?

HINYI AFUTALELAÑAWU HAMULOÑA WAKUFWILA KUNUÑAÑANA?

Izanvu dimu deneni dalombelaña hamu dadisambaña nawu dikweti mamembala akubadika ha 200 amunsakililu jashiyashana nawa anakuzatila mumatuña 76. Idi izanvu dafwilaña ‘kuzatila hamu nansakililu jikwawu.’ Hela chakwila ahoshañamu chayikalilaña kwilamu. Chakutalilahu, kwesekeja nachahosheli anloñeshi anichi chidika, mukanda wawu wanshimbi awusonekeli chiwahi kulonda abuli kuneñesha nsakililu jajivulu nimazanvu amakwawu afwachikili kuniwu mukanda. Muloñadi? Muloña antu aditadikishileña neyi chakwila atela kumutena Nzambi muniwu mukanda wanshimbi hela nehi. Chafuminimu, Nzambi hiyamusonekeli muniwu mukandaku.

Neyi akaana kumutena Nzambi, indi chikuhwelelu chikukola ñahi? Cheñi nawa, nsakililu jamuchidiwu jikwambuka ñahi namazanvu akwituña akwashaña anginga hela enkaña antu mali awaana? Dimuloña waweni ana anloñeshi ansakililu yitwatena chiyaditenenenuwu nawu “tudi izanvu dazatilaña hamu namazanvu amakwawu” bayi neyi mutayi wansakililuku.

KOMANA NSAKILILU YATELA KUKUMINA HAKWILA YUMA YAYIWAHI HOHU?

Dalai Lama, iyala waya mpuhu wahakwilañaku nsañu jakulombela hamu wahosheli nindi, “Tushidikilu  twamaneni twansakililu twekala totumu: tudi neyi kukeña, wushona nikudanakena.” Wahosheli cheñi nindi: “Twatela kumwekesha iyi yililu mafuku ejima.”

Iyi yililu yidi neyi kukeña, wushona nikudanakena yalema nankashi. Yesu wahosheli muLushimbi Lwalema nindi: “Yejima yimunakeñi antu kuyililenu, ninenu nawa yililenu mwomumu.” (Matewu 7:12) Komana nsakililu yatela kukumina hakwila yuma yayiwahi hohu?

Kapostolu Pawulu wahosheli hadi antu amavulu aditeneneña nawu amukalakelaña Nzambi nindi: “Ami nichinsahu chawu nami asweja iyena hansañu yaNzambi, ilaña abulaña kushinshikamu.” Kukalanyi kwadiñahu? ‘Muloña wena hiyelukili kuloña kwaNzambuku,’ Pawulu nindi ‘akeñeleña kukolesha kuloña kwawu aweni.’ (Aroma 10:2, 3) Hamuloña wakubula kwiluka chikupu yuma yakeñeleñayi Nzambi nindi eli, nyidimu yadikitileñawu nichikuhwelelu yadiña yamukunkulwayi.—Matewu 7:21-23.

BAYIBOLU CHIYAHOSHA KUTALISHA HANSAKILILU JALOMBELAÑA HAMU

Yesu nindi, ‘Adi namuzañalu wowu aletaña kuwunda.’ (Matewu 5:9) Yesu welileña yuma yadizishileñayi kuhitila mukubula kwila yuma yamadombu nawa wayilejeleña antu amunsakililu jashiyashana nsañu yakuwunda. (Matewu 26:52) Antu elileña yuma yayilejeleñayi ekalili mumpanda yakukeña. (Akolose 3:14) Komana Yesu wakeñeleña hohu kunuñañesha antu akuyitachi yashiyashana nindi ashakamaña mukuwunda? Wadibombeleña nawantu amunsakililu jacheñi nakudifukula nawu?

Akulumpi jansakililu jawakwakusekesha awaFwarisi niaSadusi amukaanini Yesu chikupu chakwila akeñeleña nikumujaha. Indi Yesu welili ñahi? Yesu walejeli atumbanji twindi nindi: “Yilekenu tuhu kwawu, hiyanlomboli amputamesu.” (Matewu 15:14) Yesu wakaanini kulombela hamu nawantu amuchidawa.

Chimwahitili mpinji, chipompelu chawakwaKristu achituñili muKorinda, muGreece musumba wayili mpuhu yamazanvu ashiyashana ninsakililu jajivulu. Indi akwaKristu ashakamineña ñahi mwituña damuchidiwu? Kapostolu Pawulu wayisonekeleli nindi: “Bayi mudibombaña nawabula kwitiya mumpanda yoyimuku.” Muloñadi? Pawulu nindi: “Kristu nawantu atama akutwesha kutiyañana? Mukwakwitiya wukutwesha kudibomba ñahi namuntu wabula kwitiya?” Kufumahu wayilejeli nindi: “Fumenu mukachi kawu, ambukenumu.”—2 Akorinda 6:14, 15, 17.

Eñañi, Bayibolu yahisha chaaku chakulombelela hamu. Hanu dinu mwatela kudihula nenu, ‘Antu anateli kunuñañana ñahi?’

CHINATELI KUNUÑAÑAWU

Makampani atuñaña yuma ekalaña nawankoñi amavulu. Komana awa makampani anateli kuzata nyidimu yawu chiwahi neyi chakwila anaditeji wanyi pulani yikuzatishawu hakutuña?

Iku dikukala kunakumwekana munsakililu jamakonu jinakulombela hamu. Hela chakwila aditeja kuzatila hamu nikudilemesha, ilaña hiyikweti nshimbi hashindamena nsakililu yawuku. Chinakufumamu, yililu yawu nintañishilu yinakutaminaku.

MuBayibolu mwekala nshimbi jaNzambi jidi neyi pulani yakuzatisha hakutuña. Tunateli kuwahisha chihandilu chetu kuhitila mukuzatisha yuma yahoshaña Bayibolu. Antu azatishaña iji nshimbi hiyakweti chaambu chekowa nawa anadizi kuzatila hamu mukuwunda nikunuñañana. Nzambi washimwini nindi: “Nakabalumuna madimi anyuza akekali idimi ditooka, kulonda wejima wawu akatambikaña ijina daYehova, kulonda akamukalakelaña namuchima wawu wumu.” Antu anuñañanaña neyi adiza “idimi ditooka” hela netu nshimbi jaNzambi jakundama kukudifukula.—Zefwaniya 3:9; Isaya 2:2-4.

A Yinsahu jaYehova anayitambiki nawu mwakenzi Kwitala daWanta didi kwakwihi nakumwashakamaña kulonda mwakadimweni chadiluñishañawu kuwunda nikunuñañana.—Masamu 133:1.

[Chikasha chidi hefu 10]

Komana Chalala Chekala Kwoku?

Antu akeña kulombela hamu ahoshaña nawu kwosi nsakililu yatela kuhosha nawu yeluka chalala chikupu. Ahoshaña nawu kudambola kwansakililu dikunakuleta kukala kwakuvulu kutunakumona makonu.

Kwambukaku naniyi yitoñojoka, Yehova amushimuna nawu ‘hiNzambi wachalala’ nawa waditena nindi: “Hinabalumukañaku.” (Masamu 31:5; Malaki 3:6) Yesu wahosheli hadi Nzambi nindi: ‘Izu deyi hichalala.’ (Yowanu 17:17) Ichi chalala achisoneka muNyikanda yonenawu kudi Nzambi, yekala muBayibolu. Yatulejaña nikutufumba kulonda ‘tuwahili nyidimu yayiwahi yejima.’—2 Timotewu 3:16, 17.

[Mwevulu wudi hefu 11]

Nsakililu yabulakeni nakulombela hamu mu 2011. Komana kubulakana kwamuchidiwu kwamanishaña yikonkojola yidi mujinsakililu?

[Mazu aKusakilila]

Photo by Franco Origlia/Getty Images