Munateli Kukañesha Kweseka

“Hinakeñaleña kutala nyevulu yanzekesuku. Ilaña neyi nidi haIntaneti wukukashimuka mwevulu wanzekesi wunenzi. Nelukaña wanyi chiwenzaña, nashikenaña dakwenzununa.”—CODY. *

“Mumbanda wamuwahi wakumudimu watachikili kunkenkamina. Ifuku dimu wanlejeli nindi tuyi kuhotela nakuhema. Neluki yuma yakeñeleñayi.”—DYLAN.

“NATELI kukañesha yuma yejima bayi kwesekaku.” Awa mazu anakumwekesha nawu antu amakwawu achinaña kweseka, ilaña kumbadi elaña yuma yayitwalaña mukweseka. Amakwawu amonaña kweseka neyi hichilumbu wayimakena wafwilañawu nankashi kushinda. Indochu enu? Neyi munaholokeli mukweseka, mukudiñijamu tahindi mukukwishinda?

Hela chochu, bayi neyi kweseka kwejima kwaletaña jomisha mbañaku. Chakutalilahu, muntu wadyaña yakudya yatowala hashikenaña dakufwaku. Ilaña muntu wadiñijaña muyuma yikwawu sweje-e yakojejaña muntu kwila wuvumbi, wamonaña jomisha mbaña. Bayibolu yatusoñamishaña nawu: “[Muntu] welaña wuvumbi . . . hakweti muchimaku. Muntu wakeña kukisañana wumi windi diyi welaña mwenomu.”—Yishimu 6:32, 33.

Neyi muholokela mukweseka kwakwila wuvumbi, mukwila ñahi? Bayibolu yahoshaña nawu: ‘Imu dimwanakeñiyi Nzambi, nakeñi nindi mujili, muleki wuvumbi; wejima wenu mwiluki chakuhemba nyijimba yenu nakujila nakalemesha.’ (1 Atesalonika 4:3, 4) Munateli kwikala ñahi nampwila yakujila chikupu? Talenu yuma yisatu yinateli kuyikwasha.

Chuma Chatachi: Hembenu Mesu Enu

Kutala nyevulu yanzekesi kukutuleñela kwila yuma yatama. Yesu wahosheli hakunuñañana kwekala hakutala nikufwila nindi: “Muntu wukutala mumbanda namesu akumufwila, neli dehi nindi wuvumbi mumuchima windi.” Wazatishili cheñi nkinji nindi: ‘Neyi disu deyi dachidiilu dinakukudimbwisha, ditubuli wudinati.’ (Matewu 5:28, 29) Watalishili mudihi? Hakwila tubuli kuholokela mukweseka, twatela kudikasa mumuchima nakuleka kutala nyevulu yanzekesi.

 Chakutalilahu: Twili netu munamoni nsashi yinakufuma kwikina dakushomeka nachu. Mukwimana nakutala nsashi? Inehi! Mukutala kwacheñi hela mukujika chikasa hamesu kulonda mukiñi mesu enu. Munjila yoyimu, neyi mumona nyevulu yanzekesi mumukanda, hachisanji chanyivwimbimbi hela muntu wudi nzekesi mwatela kutala kwacheñi swayi-swayi. Kiñenu yitoñojoka yenu kulonda yibuli kuluwankana. Juan wateñukili nanyevulu yanzekesi wahosheli nindi: “Neyi nimona mumbanda wamuwahi, nekalaña nampwila yakukeña kumutala cheñi. Dichi nadikanjikijaña kutala kwacheñi nawa nadilejaña nami: ‘Lombaku kudi Yehova! Watela kulomba chakubula kukwata kumatahu!’ Hanyima yakulomba, mpwila yamanaña.”—Matewu 6:9, 13; 1 Akorinda 10:13.

Toñojokenu hadi iyala washinshika Yoba wahosheli nindi: “Natiyañana dehi namesu ami; indi chañadima nukumutala ñahi?” (Yoba 31:1) Anenu nawa kwila mudikasa mumuchima wenu nehi?

Esekenu iyi njila: Neyi mumona nyevulu yanzekesi, mwatela kutala kwacheñi swayi-swayi. Imbujolenu nsoneki waBayibolu walombeli nindi: “Mbalumwini mesu ami abuli kutala yuma yamukunkulwayi.”—Masamu 119:37.

Chuma chamuchiyedi: Hembenu Yitoñojoka Yenu

Chineli wonsu wetu twawanina wanyi, mpinji jikwawu twafwilaña yuma yatama. Bayibolu yahoshaña nawu: “Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi.” (Yakoba 1:14, 15) Munateli kwila ñahi kulonda mubuli kufwa muniwu muhetu wakala kusopokamu?

Neyi munakutoñojoka hayuma yatama, anukenu nenu mwatela kufuukula chuma chimukwila. Kañeshenu yitoñojoka yamuchidiwu. Yifumishenu muyitoñojoka yenu. Lekenu kutoñojoka hayuma yazonda. Iyala wumu wejina daTroy wateñukili nanyevulu yanzekesi yahaItaneti nindi: “Nalwishili chikupu hakwila nileki kutoñojoka hayuma yatama kuhitila mukutoñojoka hayuma yayiwahi. Chadiña chakala. Navulileña kutoñojoka hanyevulu yamuchidiwu. Mukuhita kwampinji, natachikili kuyuula yitoñojoka  yami.” Mumbanda wejina daElsa, wakabakeni nayitoñojoka yakukeña kwila wuvumbi hadiñayi kankaña nindi, “Hamuloña wakusweja kudikita nikulomba kudi Yehova natwesheli kukañesha yitoñojoka yatama.”

Esekenu iyi njila: Neyi mutachika kutoñojoka hayuma yatama, lekenu kutoñojokahu hohenohu nawa lombenu. Kañeshenu yitoñojoka yatama kuhitila ‘mukutoñojoka yuma yalala yejima, yalumbwa yejima, yaloña yejima, yitooka yejima, yasweja kuwaha yejima, yampuhu yayiwahi yejima. Neyi kudi kashinshi kakeni, neyi kudi yahamekañawu.’—Fwilipu 4:8.

Chuma chamuchisatu: Hembenu Nyendu Yenu

Neyi muntu wudi nampwila yakwila chuma nawa ochu chuma chinamwekeni, nateli kuvulumuna. (Yishimu 7:6-23) Munateli kwila ñahi kulonda mubuli kufwa mumuhetu?

Bayibolu yatufumbaña nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala.” (Yishimu 22:3) Dichi hembenu nyendu yenu. Ilukenu yuma yinateli kuyiletela kukala nawa yitondolwelenu. (Yishimu 7:25) Iyala wejina daFilipe, walekeli kutala nyevulu yanzekesi nindi: “Nasha kompyuta yazatishaña chisaka hatooka nawa nashahu progiramu yahaIntaneti yakañeshaña nyevulu yazonda. Nenzununaña Intaneti neyi hadi antu.” Troy niyena itwatena dehi nindi: “Natondolwelaña kutala mafwilimu asañumunaña wuvumbi nikudikunda nawantu ahoshaña nsañu jawuvumbi. Hinakeñaña kudisha mukukalaku.”

Esekenu iyi njila: Shinshikenu chiwahi hakukala kumukweti nawa diloñeshenu chadimu kulonda mutondolweli kukala kukuyumbila mukweseka.—Matewu 6:13.

BAYI MUZEYAKU

Indochu neyi muneseki chikupu, ilaña munaholokeli cheñi mukweseka? Bayi muzeyaku, twalekenuhu. Bayibolu yahoshaña nawu: “Muntu waloña wadimbukaña mapampa katanu nakayedi chanyamukayi hohu.” (Yishimu 24:16) Eñañi, Tata yetu wamwiwulu watulejaña nindi ‘tunyamuki.’ Mukwiteja yayikwashi? Dichi bayi muleka kumulombaku. Dizenuña Izu dindi kulonda mukoleshi chikuhwelelu chenu. Yenuña kukupompa kwawakwaKristu kulonda mwikali akola chikupu. Kuhwelelenu chikaninu chaNzambi chakwila nawu: “Nakakwinkaña ñovu; chalala nakakukwashañaku.”—Isaya 41:10.

Cody itwatena dehi nindi: “Nadikitili chikupu hakwila nileki chaaku chakutala nyevulu yanzekesi. Kwadiña yuma yayivulu yankañesheleña, ilaña Nzambi wankwashili.” Dylan niyena itwatena dehi nindi: “Kachi nelili wuvumbi namukwetu mutwazatilaña. Ilaña nemikili mushindu nakumuleja nami ‘Inehi!’ Natiyaña kuwaha hakwikala nachinleji chitooka. Sweje-e dinu, neluki nami namuzañalesheli Yehova.”

Neyi mwimika mushindu nakukañesha kweseka, anenu nawa mukumuzañalesha Nzambi.—Yishimu 27:11.

[Tumazu twaheshina]

[Mwevulu wudi hefu 13]

Neyi mumona nyevulu yatama, talenu kwacheñi

[Mwevulu wudi hefu 13]

Neyi mutachika kutoñojoka hayuma yatama, lombenu

[Mwevulu wudi hefu 14]

“Nenzununaña Intaneti neyi hadi antu”