NSAÑU YACHIHANDILU

Yuma Yankoleshaña Muwufwayi Wami

Washimwini Maite Morlans

Kwosi muntu wukutoñojoka nindi nikweti ñovu neyi yamona chinakumwekana mujimba wami wudi namakeji 29 wudi mukakinga kawayeji. Hela chakwila mujimba wami wunakuzeyelaku, ñovu yami yamukachi yinakuswejelaku. Añiteji niyilumbulwili yikatu niñovu chiyinahimpi chihandilu chami.

Nazañalalaña nankashi neyi nanuka chinahandileña chiwahi kuwansi hitwashakamineña mukaditala kanyanya nawanvwali jami kukabeta kambwela kaFrance. Atata antuñilili muyeka nawa natiyileña kuwaha kutemujoka hanji. Mu 1966, aYinsahu jaYehova enjili hetala detu nawa ahanjekeli mpinji yeneni nawatata. Chimwahitili tukweji 7, atata ekalili aChinsahu. Nkumininaku, amama niwena ekalili aChinsahu, chumichi chankwashili kwikala muchisaka chamuzañalu.

Yikatu yami yatachikili hampinji yitwafuntili kuSpain kwafuminiwu anvwali jami. Makasa ami nimutupokosu mwatachikili kuyeña nankashi. Chimwahitili yaaka yiyedi yakuzebela kudi andotolu amavulu, twadiweni nandotolu weluka jamafwaha wanlejeli nindi, “Wunalabi.” Amama atachikili kudila. Ndotolu wayilejeli anvwali jami nindi nakata chikatu chamumafwaha nawa tukiña mujimba tunazeyi chakwila mumanuñi munakunana nikukata. Hela chakwila hinelukili yuma yayivuluku hinadiña nayaaka 10, nelukili nami yikatu yamaneni.

Ndotolu wahosheli nindi nishakameña muchilombu chawayeji anakuyekela natunkati kulonda añukileñamu. Chinashikili muchilombu, natiyili woma. Kwadiña kukenkama wanyi: Nkoñi wamumbanda wamuchilombu wantewili nsuki nawa wanvwikili yinifomu yayikulu. Nayeñashanini nakudihula nami ‘nukuhanda ñahi kunu?’

YEHOVA WANKWASHILI

Nakaanini kudiñija mutushidikilu twawaKatolika muloña avwali jami adizishili kumukalakela Yehova. Chayikalilili ankoñi awambanda amuchilombu kwiluka chinakaanini. Nalombeli kudi Yehova nami bayi yashiyaku, hohenohu natiyili Yehova chankolesheliyi nakunkumbata neyi nvwali wukweti kukeña.

Anvwali jami ayitejeli kuhempulaña Hamposu hakapinji kantesha. Anleteleleña nyikanda yashindamena haBayibolu yakutaña kulonda nikali nachikuhwelelu chakola. Anyana amavulu hiyayitejeli kwikala nanyikandaku, ilaña nkoñi wamumbanda wañitejeli kwikala nanyikanda niBayibolu yinatañileña ifuku niifuku. Nalejeleñaku anyana  awambanda hakuchiñeja kwami kwakushakama haya nyaka muParadisa hanu hamaseki mwakabula yikatu. (Chimwekeshu 21:3, 4) Hela chakwila naneñeleña nikutiya wuudi mpinji yikwawu, nadiña namuzañalu muloña chikuhwelelu chami mudi Yehova chakoleleleñaku.

Chimwahitili tukweji tutanu nakamu, ndotolu wanlejeli kuya kwitala. Nakoleli wanyi, ilaña natiyili kuwaha kufunta kwitala kudi anvwali jami. Mumanuñi mwananininiku nawa mwakatileña nankashi. Chinashikili muyaaka yawunsanda mujimba wami wadiña wazeya chikupu. Ilaña chinashikijili yaaka 14 napapatisheweli nawa nafwilileña kumukalakela Tata yami wamwiwulu hakumina ñovu jami. Hela chochu, mpinji yikwawu namuhililileña Nzambi. Nalombeli nami, “Yowenami hohu? Ñukenu mwani. Munakumona wanyi chinnakukabakana?”

Nakabakeni nankashi muyaaka yawunsanda. Nelukili nami namba kakola cheñi wanyi. Nalekeli kudesekeja nawakwetu akola muloña nelukili nami chikunkwasha wanyi. Nadimweneña neyi nidi wamukunkulwayi nawa natiyileña nsonyi. Ilaña, chisaka chami niamabwambu jami ankundejeleña. Namwanukaña nankashi Alicia wekalili ibwambu dami chikupu wambadikili nayaaka 20. Wankwashili kulonda nileki kutoñojoka nankashi hayikatu yami nakukeña antu amakwawu chatela nisheña hohu muchima hayikatu yami.

YUMA YANKWSHILI KWIKALA NAMUZAÑALU MUCHIHANDILU CHAMI

Chinashikijili yaaka 18, naholokeleli cheñi muyikatu yamaneni chakwila neyi nayi nakupompa nazeyeleña nankashi. Hela chochu, nadizileña Bayibolu chachiwahi hetala ‘haniyi mpanji.’ Mukanda waYoba niwaMasamu wankwashili kwiluka nami chayinu mpinji Yehova Nzambi hatukiñaña kumujimba mpinji yejimaku, ilaña watukoleshaña kulonda twikali nawubwambu wakola neyena. Hamuloña wakulomba nekalili ‘nañovu jabadika nankashi’ ‘nikuwunda kwaNzambi kwabadika maana ejima.’—2 Akorinda 4:7; Afwilipi 4:6, 7.

Chinashikijili yaaka 22, nelukili nami nukwendelaña hohu mukakinga kawayeji. Natoñojokeleña nami antu akummonaña wanyi ilaña akumonañaku hohu kakinga mudi mumbanda wakata. Ilaña, aka kakinga kankwashileña kwila yuma yikwawu nawa munafumi nkisu yayiwahi. Ibwambu dami Isabel wanlejeli nindi tukuzatilaña hamu mumudimu wakushimwina, dichi natela kwimika chikonkwanyi chakushikija maora 60 hakakweji.

Hatachi, natoñojokeli nami nakunsumpisha. Dichi nalombeli wukwashu kudi Yehova nawa chisaka chami niamabwambu jami akwashili, nashikijili chikonkwanyi. Kana kakweji kamanini swayi-swayi muloña nadiña namudimu nawa woma ninsonyi yinatiyileña yamanini. Nadiluñishili chikupu chakwila mu 1996 nekalili payiniya wampinji yejima, nashikijileña chipimu chamaora hakakweji mumudimu wakushimwina. Nafuukwiluhu chuma chachiwahi, chumichi chankundamishili kwakwihi naNzambi nawa chankolesheli kumujimba. Kushimwina kwankwashili kuleja antu amavulu yuma yinakuhwelela nikukwasha amakwawu kwikala amabwambu jaNzambi.

YEHOVA WUCHINDI KUNKWASHA

Mu 2001 nanoña, nadiña mumaposu nawa nakotokeli nyendu yejima. Chinabileña hakadidi muchipatela, nalombeli nankashi wumweneni nami: “Eyi Yehova, bayi wunshiyaku.” Hohenohu, mumbanda wadiña kwakwihi nakadidi kami wañilili nindi, “Wudi Chinsahu chaYehova?” Nadiña nañovu yakwakula wanyi, netejeleli hohu kumutu. Yena nindi: “Nayiluka! Natañaña magazini enu.” Awa mazu ankundejeli nankashi. Hela chakwila nadiña muyikatu, namwimeneneñaku Yehova. Kwenoku kukooleka!

Chinakoleluku chanti, natwalekeluhu kushimwina. Amama ahitañesheleña muyilombu yawayeji iku nyendu yami yidi mupulasita. Hefuku hefuku, twahempwileña ayeji antesha, twayihwileña chiyatiyileñawu nichahandileñawu nawa twayinkeleña nyikanda yashindamena haBayibolu. Nazeyeleña nankashi, ilaña Yehova wanyikeli ñovu.

 Yaaka yantesha yinahituhu, yikatu yinaswejeluku nawa chelili nijimbeshi niatata chineñi chaswejeleluku. Hela chochu, nafwilaña kutoñojoka hayuma yayiwahi hohu. Munjilanyi? Nekalaña nawamabwambu niantaña nawa chumichi chankwashaña kubula kusweja kutoñojoka hamakabi ami. Neyi nidi nkawami, natañaña Bayibolu hela kushimwinaku antu amakwawu hanshiña.

Nakeña cheñi yuma yantesha yanzañaleshaña yidi neyi, kukunka kwampepela hela ivumba dankenu. Yumiyi yanleñelaña kumusakilila Nzambi. Cheñi kwikala namuzañalu mpinji yejima kwankwashaña. Ifuku dimu ditwayili nakushimwina, ibwambu dami, wanshinjikileña mukakinga wemeni chanti nakusoneka hachipapilu. Hohenohu natachikili kukunkumuka nichinadihumini mumotoka yemeni. Wonsu wetu twahayamini, ilaña chitwamweni netu hosi kukala kweneni kwamwekeni, twaseheli nankashi.

Kudi yuma yayivulu yinakañanyaña kwila. Iyi diyuma yinakukeña nami nakeli. Kakavulu najibalalaña nakudifwikija neñili mwituña dadiha dakanayi Nzambi. (2 Petulu 3:13) Nadifwikijaña nidi namujimba wakola inakwendujola nawa inakuluña chikupu. Nazañalalaña namazu aMwanta Davidi akwila nawu: “Muchiñeji Yehova, dikwatishi wudikoleshi mumuchima.” (Masamu 27:14) Hela chakwila mujimba wami wunazeyi nankashi, Yehova nakunkolesha. Natwalekañahu nakukeña yuma yankoleshaña muwufwayi wami.

[Mazu ekoku adi hefu 9]

Kakavulu najibalalaña nakudifwikija neñili mwituña dadiha dakanayi Nzambi

[Mwevulu wudi hefu 9]

Kushimwina nsañu yayiwahi hanshiña kwanzañaleshaña

[Mwevulu wudi hefu 7]

Hinadiña nayaaka yiwana

[Mwevulu wudi hefu 9]

Mpinji yinadiña nawanvwali jami mu 2003