MUTU WUDI HEFU DATACHI

Yuma Yinayililiyi Nzambi

“Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”—Yowanu 3:16.

Iyi diyi nsona yelukishawu antu hadi jinsona jejima nawa ayitena muBayibolu kakavulu. Antu ahoshaña nawu iyi diyi vasi “yahoshaña hatooka to-o hawulunda wekala hakachi kawantu naNzambi ninjila yawamwinu.” Dichi mumatuña amavulu iyi nsona hela mazu ekala “haYowanu 3:16” ayisonekaña hamaluña kwapompelaña antu kuyidika, hanyotoka, mumaluña mwahitaña antu amavulu nimumaluña amakwawu.

Awa antu asonekaña iyi nsona, akuhwelela chikupu nawu kukeña kwaNzambi kukaleñela akekali nawumi wahaya nyaka. Indochenu? Mwatoñojokañahu nenudi kutalisha hakukeña kwaNzambi? Munakutoñojoka nenu yumanyi yelayi Nzambi yamwekeshaña nawu wayikeña?

“CHASWEJELIYI NZAMBI KUKEÑA MPATA YAMUNU MWISHINA”

Antu amavulu amuhamekaña Nzambi hamuloña wayileñaleña yamwiwulu, yileñaleña yamaseki kushilahu niantu aweni. Yuma yikweti wumi ayileña munjila yachihayamisha nawa yayiwahi chakwila yamwekeshaña nawu kudi nleñi wukweti maana wayileñeli. Antu amavulu amusakililaña Nzambi ifuku dejima hawumi wukwetiwu. Eluka cheñi nawu Nzambi diyi wayinkaña yuma yejima yayikwashaña kumujimba, yidi neyi mpepela, menji, yakudya nikuhimpika kwayilaaka kulonda atwalekuhu kuhanda nikuzata nyidimu yawu.

Dichi twatela kumusakilila Nzambi hakutwinka yuma yejimiyi muloña diyi Nleñi yetu nawa Watudiishaña. (Masamu 104:10-28; 145:15, 16; Yililu 4:24) Neyi tutoñojoka hayuma yinakutwililayi Nzambi kulonda tutwalekuhu nakuhanda, tukwiluka netu Nzambi watukeña. Kapostolu Paul nindi:  “[Nzambi] diyi wenkaña antu wumi nimuuya niyuma yejima. Muloña mudi yena dimu mutwahandilaña, dimu mutwendelaña, dimu mutwekalilaña.”—Yililu 17:25, 28.

Hela chochu, Nzambi wamwekeshaña kukeña kwindi muyuma yayivulu kubadika kutwakamena hohu kumujimba. Ilaña watulemesha kubadika atunyama muloña watwinka mpwila yakukeña kumwiluka nawa watukwasha kulonda tumwiluki. (Matewu 5:3) Chumichi chaleñelaña antu ovwahila ekali nachikuhwelelu chakwikala muchisaka chaNzambi neyi ‘anyanindi.’—Aroma 8:19-21.

Neyi chahosha Yowanu 3:16, Nzambi watumwekesheleli kukeña hakutemesha Mwanindi Yesu, kulonda yatudizishi hadi Nzambi Tata yindi nikutufwila. Hela chochu, antu amavulu ahoshaña nawu eluka wanyi chuma chaleñeleleli Yesu yafwi kukoola antu nawa eluka wanyi kufwa kwaYesu chikwamwekeshaña chatukeñayi Nzambi. Tusambilenu kutala chahosha Bayibolu chafwililiyi Yesu nikufwa kwindi chikwalemena.

“WAHENI MWANINDI WUMU HOHU”

Antu ejima akataña, ashinakajaña nikufwa. Ilaña iyi hidiyi yadiña nkeñelu yaYehova Nzambi hatachuku. Wayinkeli antu atachi kukooleka kwakushakama haya nyaka muparadisa hamaseki. Ilaña wayinkeli lushimbi: Ateleli kumwovwahila. Nzambi wahosheli nindi neyi akaana kumwovwahila akafwa. (Kutachika 2:17) Muntu watachi wakaanini chiyuulu chaNzambi nawa wadileteleli kufwa yomwenindi nianyanindi. Kapostolu Pawulu washimwini nindi: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.”—Aroma 5:12.

Ilaña Nzambi “wakeña wuñaji.” (Masamu 37:28) Hela chakwila wamubabesheli ona iyala watachi hachiluwa chakoñeliyi mumushikila, Nzambi hayilekeli antu nindi akabakaneña nikufwa kukoola muntu wumu wavulumwinuku. Ilaña kuzatisha lushimbi lwahoshaña ‘hawumi nawumi,’ Nzambi wesekeja yuma yejima kulonda antu ovwahila akekali cheñi nawumi wahaya nyaka. (Kwidika 21:23) Hanu dinu, wumi wawanina wajimbesheliyi Adama wadi kufunta ñahi? Ñakwilu: Kwateleleli kwikala muntu wadi kuhana wumi windi wawanina wesekana kulema nawumi wajimbesheliyi Adama.

Chakadi nikujina, Yesu hohu diyi wateleli kuhana wumi wamuchidiwu bayi mwana kaAdama wabula kuwaninaku. (Masamu 49:6-9) Yesu wadiña waloña neyi chadiñayi Adama muloña havwalikili nanshiduku. Chahaniniyi wumi windi, Yesu wakulili antu kuwunduñu wanshidi. Yesu chayikuuliliyi antu, wayinkeli anyana kaAdama naEvu kukooleka kwakwikala nawumi wowumi wawanini wadiña naAdama niEvu. (Aroma 3:23, 24; 6:23) Kudihu chuma chitwatela kwila kulonda tuheteli muniku kukeña kwasweja?

 “MUNTU WUKUMUKUHWELELA”

Yowanu 3:16, yahosha nawu “muntu wukumukuhwelela [Yesu] aheti wumi wahaya nyaka, akabuli kunoña.” Chumichi chinakumwekesha nawu, hakwila tukaheti wumi wahaya nyaka twatela kwilahu chuma chimu. Neyi tunakukeña kwikala ‘nawumi wahaya nyaka,’ twatela kumukuhwelela Yesu nikumwovwahila.

Mwatela kudihula nenu: ‘Indi kwovwahila kunafumi hadihi? Komana Yesu hahosheli nindi “muntu wukumukuhwelela” wakaheta wumi wahaya nyakaku?’ Eñañi, chikuhwelelu chakeñekaña. Hela chochu, twatela kwanuka netu Bayibolu yatuleja nawu kudi yuma yayivulu yitwatela kwila kubadika kwiluka hohu nawu Yesu wekala kwoku. Hakwila twikali nawubwambu naNzambi, kudi yuma yikwawu yitwatela kwila yinabadiki hakwiluka hohu nawu Yesu diyi Chamwinu. Mukwakwitiya watela kwikala namuchima wakwila yuma yashimwiniyi Yesu. Neyi nyidimu kwosi, chikuhwelelu chidi chikwikala chamukunkulwayi. Bayibolu yahosha nawu ‘chikuhwelelu chakadi nyidimu chafwa.’ (Yakoba 2:26) Munjila yikwawu, mukwakwitiya watela kumwekesha nindi wamukuhwelela Yesu, dikwila nawu watela kwila yuma yakuhwelelayi muchihandilu chindi.

Pawulu walumbulwili ichi chikuma nindi: ‘Kukeña kwaKristu kwatukakejaña; muloña tuneluki chalala netu iyala wumu [Yesu] wafwilili antu ejima, . . . Wafwilili ejima kulonda antu akuhanda abuli kudihandila cheñi awenawu, amuhandilaña yena wayifwilili, wasañukili mudi afu.’ (2 Akorinda 5:14, 15) Neyi twasakililaña hamulambu waYesu chinateli kutukwasha kuhimpa yililu yetu, nakubula kudihandila etu aweni ilaña tukumuhandila Yesu watufwilili. Dikwila nawu muchihandilu chetu twatela kutwamijaku yuma yashimwiniyi Yesu. Kwila mwenimu kukuleñela tuleki kulondela yuma yitwamonaña netu yalema, yuma yitwakeñaña, niyuma yejima yitwelaña. Wulokwinyi wukatambwila antu amukuhwelela Yesu?

“AHETI WUMI WAYAHA NYAKA, AKABULI KUNOÑA”

Chibalu chakukumisha chaYowanu 3:16 chatulejaña chakanayi Nzambi antu akuhwelela mwifutu danyiloña nawa ovwahilaña nshimbi jaNzambi. Nzambi wakeñaña nindi antu amuchidiwu ‘akaheti wumi wayaha nyaka, akabuli kunoña.’ Hela chochu, kudi mazanvu akahetela mukukeña kwaNzambi.

Yesu wakanini nindi wukenka izanvu datachi wumi wahaya nyaka mwiwulu. Wayilejeli atumbanji twindi ashinshika nindi wukaya nakuyiloñeshela iluña hakushakama kulonda akayuulileña hamu nindi mukulema kwindi. (Yowanu 14:2, 3; Afwilipi 3:20, 21) Antu akasañulawu nawumi wakuya mwiwulu “akekala atupristu ambala aNzambi niaKristu, akayulila hamu nindi ikombakaji danyaka.”—Chimwekeshu 20:6.

Antu antesha hohu diwu akekala naniku kukooleka. Yesu wahosheli nindi: ‘Enu kamukanka kanyanya, bayi mutiya womaku, muloña Tata yenu watiyaña kuwaha kuyinka wanta.’ (Luka 12:32) Indi iwu ‘mukanka wanyanya’ mukekala antu ñahi? Mukanda waChimwekeshu 14:1, 4 wahoshaña nawu: “Nami nitali, hinukumona Kana kamukoku [Yesu Kristu wasañwiluwu] nemani hampidi yaZiyona [mwiwulu], wudi nankulakaji yamakombakaji namakombakaji makumi awana nawana, akweti ijina dindi niijina daTata yindi akusoneka hamahamawu. . . . Diwu akuuliluwu mukachi kawantu ekali nyikabu yaNzambi niyaKana kamukoku yatachi.” Kwambukaku nawantu amavulu akadi kuchinda, a 144,000 diwu atuña “kamukanka kanyanya.” Awa antu ayitenaña nawu anyanta, dichi akayuula anyi?

Yesu wahosheli hadi mukanka wamuchiyedi wawantu ashinshika akayuulewaña naWanta wamwiwulu. Neyi chinashimuniwu haYowanu 10:16, Yesu wahosheli nindi: “Nikweti anyikoku acheñi, hiyamwiyinda dinuku; chiña nakayileta niwena; wena akatiya izu dami; akekali mukanka wumu nikabiña wumu.” Awa “anyikoku” afwilaña wumi wahaya nyaka hanu hamaseki, wumi wadiña  naAdama naEvu hakusambila. Tuneluki ñahi netu akashakama hanu hamaseki?

Bayibolu yavula kuhosha nawu Paradisa yikekala hamaseki. Hakwila mwiluki yumiyi, bakulenu Bayibolu yenu kulonda mutañi iyi nyikanda: Masamu 37:9-11; 46:8, 9; 72:7, 8, 16; Isaya 35:5, 6; 65:21-23; Matewu 5:5; Yowanu 5:28, 29; Chimwekeshu 21:4. Awa mavasi ashimunaña nawu njita, nzala yakapwelendendi, yikatu nikufwa jakamana. Ashimunaña cheñi nawu kwakela mpinji yakatuñawu antu amawahi matalawu, yakadimañawu matempa nikuvwala anyana mwituña dawunda. * Komana himwazañalalaña hakutoñojoka hampinji yamuchidiwuku? Iyi diyi yuma yatuleñelaña kukuhwelela chikupu netu iyi yikaninu keña yishikijewi.

NZAMBI NAYILILI YUMA YAYIVULU

Neyi mweseka kutoñojoka hayuma yejima yinayikoñeliyi Nzambi niantu ejima, tukwiluka netu Nzambi natukoñeli yuma yayivulu. Tudi nawumi, maana, twakola kumujimba niyuma yikwawu yatukwashaña kuhanda chiwahi. Sweje-e, chawaana chatwinkayi Nzambi chefutu danyiloña kuhitila mudi Yesu watufwilili, twakatambwila wuloku weneni neyi chitunadizi haYowanu 3:16.

Wumi wahaya nyaka mwituña dadiwahi dakuwunda, mukabula yikatu, majita, nzala yakapwelendendi hela kufwa, yumiyi yakaleta muzañalu ninkisu jahaya nyaka. Dichi chidi kudi enu neyi mukatambwila iji nkisu hela nehi. Dihulenu nenu, Chumanyi chinnakumwilila Nzambi?

[Tumazu twaheshina]

[Mwevulu wudi hefu 4]

Yesu wenjili hamaseki nawa waheni wumi windi kulonda yakuuli antu kunshidi nikukufwa