Komana Ankakulula Jami Akasañuka?

YAAKA yakunyima, muchipapilu chansañu chaThe Chosun Ilbo chakuKorea asonekelumu mutu wansañu yakuhayamisha. Mwadiña lwihu lwakwila nawu: “Komana Shim Cheong muntu wamuwahi wabulili kumwiluka Yesu, Waya Muhelu?”

Iwu mutu wansañu wahilishili antu muloña Shim cheong wadiña kankaña wamumbanda akeñeluwu nankashi mutwanu twanineñawu aKorea wadihanini muwumi windi kulonda yakwashi tata yindi mputamesu. Hayaaka yayivulu yahitiluhu, iwu kankaña wamumbanda amuhamekeleña chikupu. Eñañi, muKorea, Shim Cheong amumonaña nawu himwana wamumbanda washili chakutalilahu chachiwahi.

Antu amavulu chayineñeshaña hakutiya nawu muntu wamuchidiwu, amubabesha kuhitila mukumusha mukesi kahelu, hamuloña wakwila nawu wadiña mukwaKristu wabula kupapatishewa. Sweje-e dinu, iyi nsañu yatela yamwekeni yaaka yakunyima kwakweni henohu ninsañu yaKristu kanda atachiki kuyishimwina mumukala mwadiñayi.

Muchina chibaaba mwadiña ninsañu yamwihujoleluwu mukulumpi wansakililu. Amwihwili neyi antu ejima afwili chakubula kumwiluka Yesu ayinatilili mukesi kahelu. Komana wakwili nindidi? Nindi “tweluka wanyi. Twatoñojokaña hohu netu [antu amuchidiwu] kudi njila mwamba kayipulwishilayi Nzambi.”

YUMA YAKEÑEKAÑA HAKWILA MUNTU YAKAPULUKI

Mukanda wa The New Catholic Encyclopedia wahosha nawu: “Hakwila muntu yakapuluki watela kupapatishewa. Neyi chochahosheliyi Kristu nindi, chiña muntu yavwalika cheñi mumenji nikuspiritu yajila, neyi nehi hakutwesha kwiñila muwanta waNzambuku (Jn 3.5).” Hamuloña wakukuhwelela mwenimu, antu amakwawu akuhwelela nawu ana antu afwili dehi chakubula kuyipapatisha akayinatila mukesi kahelu hela akakabakana chakafwawu.

Hela chochu, antu amavulu atoñojokaña nawu kukuhwelela mwenimu kwamukunkulwayi. Kudi mamiliyoni awantu afwa chakubula kudiza Bayibolu. Komana akayumbila mukesi kahelu? Indi Bayibolu yahoshaña nawudi haniyi nsañu?

KUCHIÑEJA KWAKANAWU MUBAYIBOLU

Bayibolu yashimuna hatooka nawu Nzambi hadiwula antu afwili chakubula kwiluka nshimbi yamuBayiboluku. Mukanda waYililu 17:30 watulejaña nawu: “Nzambi wadiwili oyu nyaka yakuyamba.” Komana Bayibolu yahoshaña nawudi hadi antu afwili dehi chakubula kudiza nshimbi yaNzambi?

Tunateli kuwana ñakwilu mumazu amulejeliyi Yesu ona kapondu wafwilili hamutondu hamu nayena. Ona iyala wamulejeli Yesu nindi: ‘Wukañanukaña chiwakeñila muwanta weyi.’ Indi Yesu wamwakwili nindidi? ‘Lelu nukukuleja chalala nami, wukekala nanami muParadisa.’—Luka 23:39-43.

Komana Yesu wamulejeleña ona iyala nindi wukaya mwiwulu? Inehi. Iwu iyala wadiña kanda “yavwaliki cheñi” kumeji nikuspiritu, hakwila yeñili muwanta wamwiwulu. (Yowanu 3:3-6) Ilaña, Yesu wamukanini ona kapondu nindi wakashakama muParadisa. Chineli wadiña kaYudeya, iwu iyala welukili Paradisa yahamaseki—itempa daEdeni—dashimunawu mumukanda watachi wamuBayibolu. (Kutachika 2:8) Kukana kwamukaniniyi Yesu kwamwinkeli iwu iyala chikuhwelelu chakusañuka nakushakama muParadisa chikela iseki dejima dinekali dehi Paradisa.

Chakubula nikujina, Bayibolu yakana nawu “kwamba kekala kusañuka kwawaloña nikwawabula kuloña.” (Yililu 24:15) “Abula kuloña” hiyantu ana afwili chakubula kwikala aloña muloña hiyelukili mwaya kukeña kwaNzambuku. Yesu wukamusañula ona kapondu wakaniniyi, kushilahu tuhu nimamiliyoni awantu hela mabiliyoni awantu amakwawu afwili chakubula kumwiluka Nzambi. Hampinji yakaletawu Paradisa hanu hamaseki, akayidizisha nshimbi jaNzambi nawa akekala nakukooleka kwakumwekesha nawu amukeña Nzambi nikwovwahila nshimbi jindi.

 HAMPINJI YAKAYISAÑULAWU ANTU ABULA KULOÑA

Neyi antu abula kuloña anayisañuli dehi, komana akayisompesha hanyiloña yawu yakoñeluwu kunyima? Inehi. Aroma 6:7 yahosha nawu: ‘Muntu neyi nafwi nayiñi dehi, nshidi yinamani dehi.’ Antu abula kuloña chafwawu dikwila nawu anayiñi dehi kunshidi jawu. Dichi, akayisompeshela hayuma yikakoñawu neyi anayisañuli dehi, bayi hayuma yeliluwu kunyima henohu kanda eluki chalalaku. Akahetelamu ñahi?

Chikayisañulawu, antu abula kuloña akekala nakukooleka kwakudiza nshimbi jaNzambi, jikekala hanyivuñilu yachifwikija yakenzununawu. Dichi akayisompesha kwesekeja ‘nanyidimu yawu yikakoñawu,’ chili akamwovwahila Nzambi hela nehi. (Chimwekeshu 20:12, 13) Kudi antu amavulu abula kuloña, iku bayi neyi kukekala kukooleka kwamuchiyeduku, ilaña kukekala kukooleka kwakweni kwatachi kwakwikala nawumi wahaya nyaka hanu hamaseki kuhitila mukudiza nikwila mwaya kukeña Nzambi.

Iyi nsañu yamuBayibolu yinakwashi antu amavulu kumukuhwelela cheñi Nzambi. Yeong Sug niyena watachikili cheñi kumukuhwelela Nzambi. Wakulilili muKatolika. Antaña jindi amavulu adina atupristu. Chineli wakeñeleña kwikala nkoñi wamumbanda, wayili nakushakama muchilombu chawankoñi awambanda. Chimwahitili mpinji, wafuminumu muloña waneñeli nayuma yatama yamweniyi yelileñawu. Sweje-e dinu, wakanini kwiteja ntañishilu yakesi kahelu muloña welukili nindi kuyandisha antu nakuyocha mukesi kahelu hinjila yatama nawa hiyamwekeshaña kukeñaku.

Ifuku dimu, Chinsahu chaYehova wamutañilili Yeong Sug awa mazu amuBayibolu akwila nawu: “Amomi eluka dehi nawu, Twakafwa; hakwila afu hiyeluka chumaku, hiyakamona nawa cheñi wulokuku.” (Mukwakutaŋisha 9:5) Chinsahu wamukwashili iwu mumbanda kwiluka nindi ankakulula jindi hiyadi mukesi kahelu nakuyikabishaku. Ilaña adi mutulu twakufwa, anakuhembelela mpinji yakusañuka.

Yeong Sug chelukiliyi nindi antu amavulu kanda atiyi nsañu yalala yamuBayibolu, wovwahilili mazu aYesu ekala hamukanda waMatewu 24:14 akwila nawu: ‘Nsañu iyi yaWanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.’ Chayinu mpinji washimwinaña nsañu yayiwahi nawa walejañaku antu amakwawu yuma yayiwahi yakuhwelelayi yamuBayibolu.

“NZAMBI HAAKAMINAÑA ANTU KUMESUKU”

Bayibolu yatulejaña nawu “Nzambi haakaminaña antu kumesuku, hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.” (Yililu 10:34, 35) Iwu diwu wuñaji waloña wutwatela kukuhwelela wejima wetu kudi Nzambi, “wakeña nikuloña niwuñaji.”—Masamu 33:5.

[Mwevulu wudi hefu 11]

Mazu akaniniyi Yesu nindi: ‘nakekala neyi muParadisa’ atalisha mudihi?