KUHANJEKA NAMWINIITALA

Komana aYinsahu jaYehova Amukuhwelela Yesu?

Iyi mpanji yinalondeluhu diyavula kuhanjekawu aYinsahu jaYehova nawantuñi nawu. Tufwikijenu Chinsahu wejina daAntoni nayi kwitala deyala wejina daTimi.

KUMUKUHWELELA YESU KWALEMA

Antoni: Mudi ñahi aTimi. Natiyi kuwaha chinayiwanuhu.

Timi: Anami nawa natiyi kuwaha chimunenzi

Antoni: Nayileteli Kaposhi Kakutalila niAwake!’ yayiha. Nakuhweleli mukudiluñisha kutaña nyitu yidi munawa magazini.

Timi: Kusakililaku mwani. Chinawahi nankashi chimunenzi lelu muloña kudi yuma yinakukeña kuyihula.

Antoni: Mwamweni, hiyumanyi yenoyu?

Timi: Adina ifuku, nadiña nakuhanjeka namukwetu mutwazatilaña. Namulejeli hayina nyikanda yimwanyinkeli ninsañu yayiwahi yidimu. Ilaña wanlejeli nindi nileki kuyitaña muloña aYinsahu jaYehova hiyakuhwelela mudi Yesuku. Komana dimu? Namuleja mukwetu mutwazatilaña nami nakayihula neyi anenzi.

Antoni: Natiyi kuwaha chimunañihuli. Chinawahi chimunehuli chinsahu chaYehova kubadika kwihula muntu wacheñi. Muloña kumwihula muntu diyi njila yayiwahi yatela kuyikwasha mwiluki yuma yakuhwelelayi.

Timi: Anami nawa dichinatoñojoka.

Antoni: Kuhosha hohu chalala, aYinsahu jaYehova akuhwelela mudi Yesu. Nawa tweluka netu kukuhwelela mudi Yesu dichuma chalema hakwila tukapuluki.

Timi: Ami dichineluka, ilaña nahayama hakutiya mukwetu mutwazatilaña hakuhosha nindi himwakuhwelela mudi Yesuku. Nakuhweleli enu nanami kanda tuhanjekeñahu dehi haniyi nsañu.

Antoni: Komana mukukeña niyitañiluku mavasi amuBayibolu ashimunaña chichalemena kukuhwelela mudi Yesu? Awa diwu mavasi avula kuzatishawu aYinsahu jaYehova mumudimu wakushimwina.

Timi: EÑA MWANI.

Antoni: Tutachiki namazu ahosheliyi yomweni Yesu asonekawu hamukanda waYowanu 14:6. Awa mazu diwu ahanjekeliyi Yesu nakapostolu kindi. Twatañañahu nawu: “Yesu hakumwila nindi, Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” Kwesekeja naniyi vasi, njilanyi yimu hohu yakumusolomokelamu Tata?

Timi: Yidi yakuhitila mudi Yesu.

Antoni: Dimu. Nawa aYinsahu jaYehova dichakuhwelelawu chikupu. Niyihuluku ntahi: Kwesekeja nachimweluka hayuma yakeñañayi Nzambi, neyi muntu nakulomba, mwijina danyi mwatela kulombelayi?

Timi: Mwijina daYesu.

Antoni: Omu dimu. Dimuloña waweni wunalombelaña kuhitila mwijina daYesu. Dichalombañawu aYinsahu jaYehova ejima.

Timi: Chinawahi hakutiya iyi nsañu.

Antoni: Mukanda wukwawu wutwatela kutaña himukanda waYowanu 3:16. Iyi vasi yalema nankashi muloña ayitenaña nawu nsañu yayiwahi yantesha. Dikwila nawu neyi mushinshika hansañu yejima yasonekawu hachihandilu chaYesu chahanu hamaseki nimudimu windi wakushimwina nakuyisha muvasi yimu, mukwiluka nenu hinsañu yayiwahi yantesha. Hadaha mwatela kuyitaña iyi nsona.

 Timi: EÑA MWANI. Yinakuhosha nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”

Antoni: Kusakililaku mwani. Mwayiluka iyi vasi?

Timi: Eña, nayitiyaña kakavulu nankashi, nawa namonaña chayisonekañawu hayipamba yahamukwakwa nihayuma yikwawu.

Antoni: Hivasi yelukawu antu nankashi. Shinshikenu chachiwahi haniyi vasi, kulonda mwiluki chahosheliyi Yesu. Wahosheli nindi, kukeña kwaNzambi dikwaleñela antu akatambwili wumi wahaya nyaka, hanu dinu chumanyi chitwatela kwila?

Timi: Twatela kukuhwelela.

Antoni: Eña. Sweje-e, kukuhwelela mudi Mwanindi weyala wasemuka nkawindi, Yesu Kristu. Nawa ichi chikuma chakwila nawu kukuhwelela mudi Yesu kwenzululaña njila yawumi wahaya nyaka, anachilumbululi hefu 2 dayinu magazini yinayileteli. Kwesekeja nankeñelu yaKaposhi Kakutalila, kanakuhosha nawu hakachi kayuma yikwawu, ayinu magazini “yakoleshaña antu kukuhwelela mudi Yesu Kristu, watufwilili kulonda tuheti wumi wahaya nyaka nawa nakuyuula neyi Mwanta waWanta waNzambi.”

Timi: Eña, mumunahoshi dimu. Chakubula nikujina, muniyi magazini yenu mudi wunsahu wunakumwekesha nawu aYinsahu jaYehova akuhwelela mudi Yesu.

Antoni: Mwamweni.

Timi: Hanu dinu, muloñadi antu chahoshelañawu nawu mwamukuhwelela wanyi Yesu?

Antoni: Kudi yuma yayivulu nankashi yaleteshaña antu ahosheña mwenimu. Mpinji yikwawu, antu ahoshaña mwenimu hamuloña wakwila atiyaña antu amakwawu anakuhosha hadi aYinsahu jaYehova nawu hiyakuhwelela mudi Yesuku. Hekwawu ayidizishili nsañu yakutwamba kudi akulumpi jawu jansakililu.

Timi: Anami nawa inakutoñojoka nami, hekwawu antu ahoshaña nawu mwakuhwelela wanyi mudi Yesu muloña mwaditenaña nenu mudi aYinsahu jaYehova, chatela muditeneña nenu tudi aYinsahu jaYesu.

Antoni: Hadaha dichaleñelaña.

Timi: Muloñadi chimwahoshelaña hadi Yehova nankashi?

“NAYILEJI IJINA DEYI KULONDA ADILUKI”

Antoni: Mwatela kwiluka nenu, twakuhwelela netu chalema nankashi kuzatisha ijina daNzambi, daYehova, neyi chocheliliyi Mwanindi Yesu. Toñojokenu hamazu ahosheliyi Yesu hampinji yalombeleñayi kudi Tata yindi. Ayisoneka hamukanda waYowanu 17:26. Kwila mutaña iyi vasi nehi?

Timi: Eña mwani. “Nayileji ijina deyi kulonda adiluki, namba kayilejadu nawa kulonda akadiluki; kulonda kukeña kuwankeñeli nachu kwakekali mudi wena ninami nakekali mudi wena.”

Antoni: Kusakililaku mwani. Talenu Yesu wahosheli nindi wayilejeli ijina daNzambi kulonda adiluki. Munakutoñojoka nenu muloñadi Yesu chelililiyi mwenimu?

Timi: Aaa. Neluki wanyi.

Antoni: Chachiwahi, namoni twatela kutaña nsona yikwawu yinakulumbulula chikupu iyi nsañu. Tutañi nsona yaYililu 2:21. Haniyi nsona twatañañahu nawu: “Muntu wakatambika ijina daYehova wakapuluka.” Namoni, muneluki nenu kutambika hejina daYehova dichuma chakeñekaña hakwila nawu muntu yakapuluki, chakubula nikujina Yesu welukili nindi kutambika hejina daYehova kwalema.

Timi: Eñañi welukili.

Antoni: Dichi Yesu welukili nindi hakwila nawu atumbanji twindi akapuluki ateleleli kwiluka nikuzatisha ijina daNzambi. Dimuloña wumu watuleñelaña tuhosheña nankashi hadi Yehova. Tweluka netu chalema nankashi kutiyakesha ijina daNzambi nikukwashaku amakwawu kutambika hanidi ijina.

Timi: Hela chakwila antu eluka wanyi ijina daNzambi hela kudizatisha, ilaña elukaña watenañawu neyi anakuhosha hadi Nzambi.

 Antoni: Hadaha dimu. Hela chochu, kuhitila mukutuleja ijina dindi, Nzambi nakukeña nindi tuswili kwakwihi nayena.

Timi: Munatalishi mudihi?

Antoni: Chakutalilahu: Hitwateleleli kwiluka ijina daMosuku. Twadi kumwiluka hohu netu iyala wambwili menji haKaluñalwiji Kachinana hela netu iyala watambwilili Nshimbi Ikumi. Chochimu niNowa niyena, muloñadi chitwelukila ijina dindi? Ateleli kumutena hohu nawu iyala watuñili watu mwapulukilili chisaka chindi niatunyama. Munjila yoyimu, Yesu Kristu niyena twadi kumwiluka hohu netu iyala wafumini mwiwulu nakutufwila kukola nshidi jetu. Hidimuku?

Timi: Namoni dimu.

Antoni: Ilaña Nzambi wakeñeleña nindi twiluki chikupu majina anawa antu. Kwiluka majina awu kwaleñelaña iyi nsañu yikali yalala kudi etu. Hela chakwila kanda tuyimoneñahu dehi aMosi, Nowa niYesu, kwiluka majina awu kwatuleñelaña twiluki netu awa antu adiñakoku.

Timi: Kanda nitoñojokeñahu dehi muniyi njila, ilaña mumunahoshi mwalala.

Antoni: Iwu himuloña wukwawu waleñelaña aYinsahu jaYehova azatisheña ijina daNzambi nankashi. Tunakukeña kukwasha antu amukuhweleli Yehova Nzambi nawu wekala kwoku nawa anateli kukundama kwakwihi nayena. Hampinji yoyimu, twakonkomwenaña hamudimu walema watukoñelayi Yesu hakwila nawu tukapuluki. Hadaha tunateli kutañaku nsona yikwawu yinakulumbulula ichi chikuma.

Timi: Kukala kwosi mwani.

Antoni: Hatachi twataña mukanda waYowanu 14:6. Anukenu nenu, Yesu wahosheli nindi “yami njila, yami walala, yami wumi.” Tufuntenu kumavasi adi hanyima kulonda twiluki mazu ahosheliyi ekala haYowanu 14:1. Tañenu mwani mazu ahosheliyi Yesu adi mumukuku wamazu wakukumishaku muniyi vasi?

Timi: MWANI. Anakuhosha nawu: “Mwamukuhwelelaña Nzambi, nkuhwelelenu ninami nawa.”

Antoni: Kusakililaku. Komana kwikala nachikuhwelelu chakola kwashindamena hohu hakumukuhwelela Yesu bayi kumukuhwelela Yehovaku?

Timi: Inehi. Yesu wahosheli nindi twatela kuyikuhwelela wejima wawu.

Antoni: Omu dimu. Nakuhweleli munateli kwiteja nenu hitwatela kukumina hohu hakukuhwelela mudi Nzambi niYesuku. Mwamweni, mukuhanda kwetu twatela tumwekesheña netu twayikuhwelela chikupu.

Timi: Munahoshi mwalala.

Antoni: Hanu dinu muntu nateli kumwekesha ñahi nindi chalala wakuhwelela mudi Nzambi niYesu? Namoni ilu lwihu twakahanjekahu ifuku dikwawu. *

Timi: Chikawaha nankashi.

[Tumazu twaheshina]

Komana kudihu nsañu yikwawu yaBayibolu yimwajinokaña? Kudihu yuma yikwawu yakuhwelelawu hela yelañawu aYinsahu jaYehova yimwakeñaña kwiluka? Neyi dimu, mwatela kwihula chinsahu chaYehova wudi wejima. Wukutiya kuwaha hakuhanjeka nenu hansañu yamuchidowu.

[Mazu ekoku adi hefu 8]

Kumukuhwelela Yesu kwalema nankashi hakwila tukapuluki