MALWIHU AMUBAYIBOLU ANAYAKULI

Muloñadi dinu iseki chadileñeleluwu?

Adinu iseki adileñeli nawu mushakameña yuma yikweti wumi. Mwekala menji amavulu, atela kuhandisha yuma yonaña. Iseki dekala heluña datelela, chidanyeñumukaña niiluña mudanyeñumukilaña, yuma yejima iyi ayileña chatelela kulonda tuluñalwiji tubuleña kusweja kututa nikwikala mayimakanza hela kuuma. Mpepela yamuluzwizu niñovu yakokaña yakiñaña iseki kuyuma yafwana yafumaña kumwaana. Twahayamaña hakumona yuma yamenaña hamaseki chiyashindamena hayuma yikweti wumi yekala hamaseki, niyuma yikweti wumi niyena chiyashindamena hayuma yamenaña hamaseki. Dichi, antu amavulu anashiki hakwiluka nawu iseki adileñeli kulonda dibuli kwikala damukunkulwayi.—Tañenu Isaya 45:18.

Ilaña munateli kudihula nenu, ‘Komana iseki adileñeli nawu mukekaleña makabi niyuma yatama?’—Tañenu Kuhituluka 32:4, 5.

Komana nkeñelu yaleñeleluwu dinu iseki yikashikijewa?

Iseki adileñeli kulonda mushakameña antu amuzañalu adilemesha wumu namukwawu nawa akeña Nleñi yawu. Dichi, antu alema nankashi kubadika nyitondu nianyama. Tunateli kwiluka chekalayi Nleñi yetu, kumulemesha nikwimbujola kukeña niwuñaji windi.—Tañenu Mukwakutaŋisha 12:13; Mika 6:8.

Nleñi yetu nateli kwila yuma yejima yafuukulayi. Dichi tunateli kukuhwelela netu wukafumishahu makabi ejima niyuma yatama nawa wakelisha iseki detu kwikala dadiwahi nankashi mwakashakamawu antu.—Tañenu Masamu 37:11, 29; Isaya 55:11.

Neyi munakukeña nsañu yikwawu, talenu kapetulu 3 kawunu mukanda, Chumanyi Chacheni Chatañishaña Bayibolu?, wasonekawu kudi aYinsahu jaYehova

Iwu mukanda wudi cheñi ha www.pr418.com/lun

[Mwevulu wudi hefu 16]

Iseki adileñeli kulonda mushakameña antu amuzañalu