MUTU WUDI HEFU DATACHI | NZAMBI CHAMONAÑAYI KUNWA MAKANYA

Nzambi Wamonaña Ñahi Kunwa Makanya?

Naoko, atenawu muchibaba chatachi, chalekeliyi kunwa makanya wahosheli nindi, “Nahimpili chihandilu chami muloña wakudiza nsañu yalala yahoshaña hayililu yaNzambi niyuma yafuukulayi.” Nsañu yadiziliyi yekala muBayibolu. Hela chakwila Bayibolu hiyahosha hansañu yamakanyaku, yatukwashaña kwiluka Nzambi chamonañayi kunwa makanya. * MuBayibolu mwekala nsañu yinakwashi antu amavulu kushinda hela kuleka chaaku chakunwa makanya. (2 Timotewu 3:16, 17) Tuhanjekenu hayuma yisatu yafwana yafumaña mukunwa makanya kulonda twiluki chahosha Bayibolu haniyi nsañu.

KUNWA MAKANYA KWATEÑULAÑA

Mumakanya mwekala yuma yateñwishaña yatenañawu nawu nikotini. Yasañumunaña nikuleñela muntu yaleki kuneña. Neyi muntu nakunwa makanya nikotini yanyakala kutemukila kuwoñu nawa mukusinsashana. Chineli kukoka kamu kumakanya kwiñijaña nikotini, muntu chanwayi musanga wumu hefuku dikwila nawu haavaragi nakoki nikotini yakushika ku 200, iyi yikwikala hiyitumbu yashetana chikupu kubadika yitumbu yidi yejima. Kusweja kunwa makanya muniyi njila kwaleteshaña muntu kuteñuka. Neyi muntu nateñuki dehi, chabulayi kukoka nikotini hakutiya chachiwahuku.

Bayibolu yatukwashaña kulonda twiluki chiyahosha chachiwahi hansañu yakunwa makanya, yahosha nawu: “Mweluka dehi, neyi mukudilubula kudi muntu mwili anduñu jindi akumwovwahila, muneli dehi anduñu janowu mwovwahilaña.” (Aroma 6:16) Neyi yitoñojoka yamuntu niyuma yelañayi yimwekesha nawu wakeña makanya, wekalaña nduñu yayuma yatama yinakwilayi. Ilaña Nzambi, wukweti ijina daYehova, nakukeña nindi tufumi kuyaaku yakisañanaña mujimba nikuyuma yatama yinateli kuluwañesha yililu yetu, dikwila nawu yuma yitwatoñojokaña. (Masamu 83:18; 2 Akorinda 7:1) Dichi, muntu chatwalekahu nakumwiluka nikumulemesha Yehova, welukaña nindi watela kumukalakela chikupu Yehova nawa hakwila yamukalakeleña Nzambi chakufuma hamuchima watela kuleka yaaku yafwana. Kwiluka chumichi kwakwashaña muntu kulonda yaleki kufwila yuma yafwana.

Olaf, washakamaña kuGermany watachikili kunwa makanya hadiñayi nayaaka 12, dichi walekeli kunwa makanya amuteñwili hadi yaaka 16. Olaf watoñojokeleña nindi, kunwa makanya kwafwana wanyi. Ilaña mukuhita kwayaaka wakañenyi kudiyuula nawa wateñukili. Wahosheli nindi: “Ifuku dimu makanya amanini, dichi nahilili nankashi chakwila nanoneli tushiki twejima twamakanya twadiña mukachikopu, natwichikili hamu nakusangila makanya hachipapilu. Kuhosha hohu mwalala, chumichi chadiña chakutiyisha nsonyi chikupu.” Walekeli ñahi chaaku chatama chakunwa makanya? Wahosheli nindi, “chuma chankwashili nileki  kunwa makanya nafwilileña kumuzañalesha Yehova. Kukeña kwakeñayi Yehova antu nikuchiñeja kwayinkayi kwankwashili kuleka chikupu kunwa makanya.”

KUNWA MAKANYA KWAKISAÑANAÑA MUJIMBA

Mukanda waTobacco Atlas mwekala nsañu yahosha hamakanya washimuna nawu, “Asayansi awana nawu kunwa makanya kwatamishaña yidi yamujimba yejima nawa kwaletaña yikatu yayivulu nawa antu amavulu afwaña.” Antu amavulu eluka nawu kunwa makanya kwaletaña yikatu yabulaña kusambukila yidi neyi kansa, chikatu chakumuchima nichikatu chakumapwapwa. Hela chochu, kwesekeja namutayi waWorld Health Organization (WHO), kunwa makanya cheñi kwajihaña antu kuhitila muyikatu yasambukilaña yidi neyi TB.

Kuhitila Mwizu dindi Bayibolu, Yehova Nzambi watudizishaña chitwatela kumona wumi wetu, mujimba wetu niyitoñojoka yetu. Mwanindi Yesu wahosheli kutalisha haniyi nsañu nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Matewu 22:37) Mwamweni, Nzambi wakeñaña nindi tuhembeña wumi nimujimba wetu chachiwahi nakuwulemesha. Chitwadiza hadi Yehova niyikaninu yindi, twamukeñaña nikulemesha yuma yejima yatwililayi. Chumichi chatukwashaña kutondolwela yuma yidi yejima yinateli kutamisha mujimba wetu.

Jayavanth, ndotolu wakuIndia, wanwini makanya hadi yaaka 38. Wahosheli nindi: “Nelukili kukala kwafumaña mukunwa makanya kuhitila mukutaña magazini yahoshaña hansañu yayitumbu. Nelukili nami chatama kunwa makanya nawa nayilejeleña ayeji kulonda aleki kunwa makanya. Ilaña ami hinalekeluku hela chakwila nesekeli kuleka mapampa katanu hela katanu nakamu.” Chumanyi chamukwashili kulonda yaleki? Washimwini nindi: “Nalekeli kunwa makanya hamuloña wakudiza Bayibolu. Kukeña kumuzañalesha Yehova dikwanleñeleli nileki kunwa makanya.”

KUNWA MAKANYA KWALETAÑA WUBANJI KUDI ANTU AMAKWAWU

Wishi wafumaña mukanwa neyi muntu nakunwa makanya niwishi wafutumukaña kwikanya wafwana. Kwoona iwu wishi kunateli kuleta kansa niyikatu yikwawu nawa chaaka nichaaka kwajahaña antu akushika ku 600,000 abulaña kunwa makanya, sweje-e ambanda ninyana. Chileji chakufuma kumutayi waWHO chasoñamishaña nawu: “Kwosi njila yitwatela kutondolwelamu kwoona wishi wafumaña kumakanyaku.”

 Kwesekeja nachahosheliyi Yesu, twatela kusambila kukeña Nzambi, kuhiñahu antuñi netu, chisaka chetu, niantu atunyeñumuka. Yesu wahosheli nindi: “Keñaku mukwenu neyi chiwadikeña eyi aweni.” (Matewu 22:39) Neyi twilaña yuma yinateli kuleta wubanji kudi akwetu itwadikumashana nawu, dikwila nawu atuñi netu hitwayikeñaku. Kukeña kwalala kwatusañumunaña kulondela kufumba kwamuBayibolu kwahosha nawu: “Bayi muntu alonda yakudiwahisha nachu yomwenuku, chiña yakuwahisha nachu mukwawu.”—1 AKorinda 10:24.

Armen, washakamaña kuArmenia wanukaña nindi: “Chineli chisaka chami chadiña muwubanji muloña wamakanya ananwineña, anlembeleli nawu nileki kunwa makanya. Ilaña nakanineña kwiteja nami makanya inanwineña anateli kuleta wubanji kudi wena.” Walumbulwili chuma chamuleñeleli yahimpi yitoñojoka yindi nindi: “Kudiza Bayibolu nikumukeña Yehova kwankwashili kuleka kunwa makanya nawa netejeli nami kunwa makanya kunateli kuleta wubanji kumujimba wami nikudi antuñi nami.”

KUNWA MAKANYA AKAKWIFUMISHAHU HAYA NYAKA

Kudiza Bayibolu kwakwashili Olaf, Jayavanth, niArmen kuleka chaaku chatama chakisañeneña nyijimba yawu ninyijimba yawantu amakwawu. Alekeli yililu yatama bayi neyi hamuloña wakwiluka nawu kunwa makanya kwafwanaku, ilaña hamuloña wakumukeña Yehova nikufwila kumuzañalesha. Lushimbi lwalema lwakukeña alukonkomwena ha 1 Yowanu 5:3, hahosha nawu: “Kumukeña Nzambi yowu kwila mwatulejañayi; mwatulejañayi himwakalaku.” Hela chochu, kulondela nshimbi yamuBayibolu hikwapelaku, ilaña neyi muntu wamukeña Nzambi chikupu, hichikumukalila kumwovwahilaku.

Kuhitila mukampeni yakudizisha antu mukaayi kejima, Yehova Nzambi nakukwasha antu amavulu kuleka hela kufuma kuwunduñu wakunwa makanya. (1 Timotewu 2:3, 4) Kuhitila muWanta windi, nfulumendi yamwiwulu yinakuyuulewa naMwanindi, Yesu Kristu, Yehova wukafumishahu nyidimu yamukaayi yakulanda nakulandulula yinakuleñela mamiliyoni awantu ekali muwunduñu wakunwa makanya. Wukafumishahu kunwa makanya kunatandi mukaayi kejima haya nyaka nawa wakelisha antu ovwahila kwikala nanyijimba yawanina niyitoñojoka.—Isaya 33:24; Chimwekeshu 19:11, 15.

Neyi munakufwila kuleka kunwa makanya, bayi muzeyaku. Kuhitila mukumukeña Yehova nikwiluka chamonañayi kunwa makanya, kukuyikwasha kulonda muleki kunwa makanya. A Yinsahu jaYehova akutiya kuwaha kuyikwasha, kuyidizisha nikuyileja chakuzatisha nshimbi jamuBayibolu. Ilukenu chikupu nenu neyi munakukeña nenu Yehova yayikwashi kulonda muleki kunwa makanya ayiteñula, wukuyinka ñovu yimunakukeña.—Afwilipi 4:13.

[Tumazu twaheshina]

[Mazu ekoku adi hefu 4]

“Muneli dehi anduñu janowu mwovwahilaña.”—Aroma 6:16

Komana munateli kumwovwahila Nzambi chikupu neyi mudi muwunduñu wakunwa makanya nawa mwateñuka dehi?

[Mazu ekoku adi hefu 5]

“Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.”—Matewu 22:37

Komana munakumwekesha nenu mwamukeña nikumulemesha Nzambi neyi munakutamisha mujimba wayinkayi Nzambi kuhitila mukudiñija muchaaku chatama?

[Mazu ekoku adi hefu 6]

“Keñaku mukwenu neyi chiwadikeña eyi aweni.”—Matewu 22:39

Komana mwakeña chikupu ntuñi nenu nichisaka chenu neyi muyileñela oneña mpepela yawishi wafwana wamakanya imwanwaña?